لولو السرحان

بيصحى من النوم ويسرح
بيفكر فى ايه مش عارفة..
ساعات بيقوللى بعنيه وحركاته هو عاوز ايه
ياكول يشرب يلعب ينام متضايق
بس اكيد عنده فى دماغه حاجات تانية
انا برضه بسرح لما بصحى من النوم
النهارده مثلا سرحت فى الحلم بتاع امبارح
حلمت ان كان عندى امتحان تشريح جثة..اه والله
والجثة دى مش من جريمة قتل لأ
لما شلت الغطا عن الجثة ..لقيتها جثة تنين صغير لازم اشرحه
التشريح بتاع الاتوبسى يعنى
عشان تحديد سبب الوفاة
قمت فتحت بطنه الاول بالمشرط..مسألة تعود عشان انا بحب عمليات البطن اكتر
بالرغم انى كان لازم افتح صدره الاول
المهم بطنه كانت نضيفة ..مفيهاش مرض يعنى
قمت فتحت صدره ولقيت المرض فى الرئة
اخر حتت فى الرئة منفوخة و شكلها معشق فى بعضها
كان عنده مرض اسمه
bronchiectasis
يعنى اتساع الحويصلات الهوائية مع التهاب وتكوين نسيج ضام
الطب بالعربى فظيع
ايه الاحلام العجيبة دى ؟