على كل لون

مش عارفة عندى نقص فيتامينات واللا ايه ..الواحد مجهد ودماغى مش مركزة..بس اكيد من الهيصة..دخلة اغسطس علييا كانت جامدة قوى..من اول جدول النبتشيات لحد الاكل اللى بنزل اشتريه..كنت متفائلة ومقبلة على الحياة-خصوصا وان الاستشارى بتاعى كان واخد كام يوم غطس فى المصيف مع العيال-..وحضرت فرح ايهاب واتكلمت مع شاكر على المقابلة اللى عمالها عشان السفر برة للسعودية..قاللى انه كل يوم كان بينام على صوت القران جمبه وعمال يعيط..انا بتخض من كده يا جدعان..المهم سمعت وانا فى العمليات من الناس -وانا باخود اللبن اللى اشتراهولى شاكر عشان لسه برضع-ان فيه زميل لينا اتقفل عليه باب قوضة وفين يوجعك..افتكرت حاجة مماثلة حصلت من كذا سنة برضة..علقة كده ورمت عينيه زى كريم فى حريم كريم-انا عرفت ليه بحب الفيلم ده-..المهم الواحد خرج من العمليات على الطوارئ لقيت زميلى بيتكلم معايا على القصص اللى بقراها وقرر يشترى زيهم ..ماشى يا عم..اسامة قاللى كويس انك ما جيتيش القاعة اللى ايهاب عمل الفرح فيها..معرفتش ايه السبب..زمايلى ما بقتش اشوفهم..بحضر شغلى واروح وعشان كده..النايب السانيور الامور قرر انه يلخبط المجموعة الاولى على التانية على دخول شهر تمانية-ربنا يعمر بيته- وراح فاكك ورايح مارينا-اه والله-..انا قايلاله انى عاوزة اواخر اغسطس اجازة..معملش اللى انا عاوزاه-حسبى الله ونعم الوكيل فيكوا يا عيال-..اتلخمت مع الشغل بين المجموعة دى والمجموعة دى..لما الواحد بقى مخه بالوظة..مش بفوق اللا على شوية ورق لازم اخلصة..مقابلة مع المحامى..عجلة نايمة..ايميلات تترد عليها..نزول السوق اشترى حاجات..الحاجات بقت غالية جدا احه يعنى..اللى كنت بجيبة من شهر ب50 جنية..لقيت الراجل بيقوللى 70 جنية..دفعتله وانا بقول يا لهوى بحس عالى..المرتب زاد 50 جنية واكيد اللى انا فيه ده عين الصراف ..طبعا ال50 جنية فى ايد الدكتور عجبة..من ساعتها وانا مدوحسة..واحد اغسطس..الويندوز وقعت لوحدها ملحقتش اسندها..تانى يوم التليفزيون فرقع وعمل قفلة لوحدة والانترنت فصلت تماما..تالت يوم لقيت سلك الانترنت مقصوص من الشباك..بحسبن على الجيران اللى عملوا كده..مش ده بفلوس يعنى واللا ايه ؟..حطيت جزمة فى بوقى ونزلت السوق فى باب اللوق جبت من عبد المعبود بن وجبت سلك من عند اسكندر عشان ب75 قرش المتر- ربنا يديمها نعمة-..بس نفسى اعرف مين اللى قص سلك النت..صوحابى بيقولولى اكيد ملكيش اعداء واللا ليكى ؟ بقولوهم والله انا كائن أليف..لولو منطهضنى الايام دى بينام مكانى جمب ماما ولما ازوقه عشان انام مكانى بيعض ويرفس وبعدين يتزنق فييا ويزقنى بضهره..خايفة انى اصحى الصبح الاقى نفسى تحت السرير..الحمد لله اوان الورد خلص ولقوا العيل وجه بداله نافذة على العالم...بصبن وبغسل الايام دى ومش مركزة وربنا يستر ان الالوان ما تبهتش على بعض..بيجيبوا على ام بى سى تو افلام حلوة الايام دى بس انا مش فايقة لامها ..فاتنى فيلم حرامية فى تايلاند اللى بحبه..عدم التركيز بيطاردنى ومش بنام كويس يعنى..علييا ضغط جامد..بنت خالتى عملت عملية الديسك اخيرا بعد ما جالها فوت دروب يعنى رجلها جاله فيه شلل بس الحمد لله هى احسن دلوقتى..واحد تبع جوزها عمل حادثة ودخل الفرنساوى فى حالة خطيرة ومراته متهمنها فى الموضوع ده مش عارفة ازاى..ومش عارفة ايه اللى خلى الحديث بتاعنا يحود على البانجو عشان نضحك شوية..الشوكولاتات اللى اكلتها الاسبوع ده طعمها مضروب..ومش لاقية فى السوق اندومى بطعم الجمبرى..يا رب ينزل السوق ..الحمد لله عديت فى امتحان الفرنساوى عشان بس ما يحصليش حاجة بس طبعا كل حاجة وليها ديل فلازم ولابد اكمل شوية اوراق لذيذة كده قبل رمضان خاصة وانه معروف بين الناس انه شهر العبادة يبقى نأنتخ فيه..محدش عارف ان العمل عبادة..ما علينا مش حنقلب فى الحلل...مزنوقة فى الشيفت بتاعى يجيلى تليفون ان مرات ابن خالتى جابت على..بعد شوية مروة تكلمنى وصوتها مش عاجبنى..فيه ايه ؟ بابا مات امبارح..يعنى جالى يوم التلات اللى فات ده خبر ولادة وموت فى نفس الوقت..بنت خالتى التانية حامل وبتفكر تنزله..هو حد طايل ريحة عيل ..ايه الناس دى ؟..فى المستشفى هناك رومورز ان النبتشيات حتزيد والله اعلم..اخيرا غطيت اجازاتى وبسحب من رصيدى القديم..فى شئون العاملين قالولى اكتب ورقة اطلب فيها علاوة..مش عارفة ايه طقم الحنية ده؟ مش عوايدهم ..انا قلقان!...عماد اخيرا بقى نايب مدير ألف مبروك بس عاوزين الحلاوة..عاوزنى انا اللى اعزمة بالمناسبة دى..الظاهر ان الطقم اللى جبتة ليوسف ابنه وشة حلو عليه..بس هات الكتاب اللى سلفتهولك يا عماد..بلاش الطقم ده..زمايلى داخلين الزمالة البريطانية..عقبالى انا كمان بس لما عرف اخرتها ايه فى السكة اللى انا ماشية فيها دى..بحاول الايام دى اوفق راسين فى الحلال..على الله الموضوع يمشى...عقبال ما اوفق راسى فى الحلال انا كمان..نشوان خطوبتها الايام اللى جاية..الف مبروك وعقبالنا..عقبالنا ايه ؟ انا معنديش وقت للخطوبة..انا حدخل فى الموضوع على طول...نايب المسالك بيسألنى انا ليه قافشة كده على المستشفى من ساعت ما رجعت..مش عاوزة اتكلم فى الماضى ..ماضى اسود بلا نيلة..المهم كان بيحاول يهدىلى اعصابى خصوصا وان العيان كدب علييا وكان عاوز يلبسنى فى الحيطة عشان ألاقى مصيبة مستنيانى فى النقابة..وحياة ربنا كنت حلاطشله..جه معاد الشيفت سلمت ومشيت وينعل ابو العيان اللى بيكدب..قطيعة ..فيه شيت مكتوب فيه عنوان العيان السودان..حصلت خناقة كبيرة انه ليه عنوانه مش مكتوب بالتفصيل ؟ بسيطة يا حبايبى اكتبه ورايا السودان الخرطوم ورا محطة البنزين..قال يعنى الداتا بيز حتوقف على ده..طوارئ عجيبة..التمريض بعد ما جم يغيظونى بانهم واحدة خست عشرة كيلو والتانية 5 فى شهر..وعرفت انهم ماشيين على نظام كيماوى..اول ما جسمهم استوهلك فى الطريقة دى..وابتدوا يضربوا كشرى-شميت ريحتة فى القوضة يا حلوين-كل واحد ة زادت ما لا يقل على 4 كيلو فى خلال كام يوم ..المهم بحاول افكر ارجع فى ادارة المستشفى تانى..بس لسه مخدتش القرار..اخيرا جيمى حيناقش الرسالة اللى قعدنا نكتب فيها احنا الجوز وانا عملتله تظبيطة للداتا شو..يا رب الموضوع يكمل على خير..المهم الواحد بيتنقل من حال المستشفى الفنى والادارى والشخصى والانسانى..لحال قرايبة ..لحال صوحابه..وأهو كله برتقال