ما قبل العيد
بقالي ٣ سنين مش بصوم عشان العلاج اللي كنت باخدوه .. فقررت اني مش اصوم ال ١٠ ايام ، اصوم جمعه والسبت الوقفة .. صحيت الصبح لاقيت نفسي مش قادرة وقررت اني اصوم بس السبت وعلي الله بس اعرف .. وقفت اعمل فنجال قهوة علي الصبح قبل صلاة الجمعه والجو هادي وامبارح اول خميس من فترة ما يبقاش عندنا ضرب نار في الشارع .. وقفت اخلص كام طبق في الحوض واول مرة احط القهوة علي النار وما تفورش .. غريبة يعني .. ولاقيت نفسي قعدت فترة عقبال ما القهوة اتعملت والبراد اللي علي العين التانية غلي .. اومال ليه ما اتدلعتوش علييا كده من كام يوم لما القهوة فارت والبراد نسيته علي النار لدرجة ان لونه اتغير وكنت جايباه غالي والله العظيم عشان يعيش .. ماما انقذت البراد الاحمر ده بس انا زعلت عليه ولما لاقيت قلبه لسه كويس ، قلت مش مشكلة الشكل الخارجي اللي باظ - اللون الاحمر الزاهي بقي اقرب للبني - طالما القلب لسه سليم .. بقول حكم والله .. بقالي اسبوعين مش بقرا جرايد خالص وببص علي شريط الاخبار نص عين ويا دوب مشتركة في رسايل اخبار علي الموبايل ب٥ جنيه في الشهر .. واذا ما جابوش اخبار عدلة علي اخر السنة حلغي الاشتراك بقي .. اعصابي اهدي بكتير من بعد ما بعدت عن الاخبار والفيس بوك .. دوشة كتيرة بدون هدف ودوري فيها لا يذكر .. دوري في شغلي وحالي .. ركزت عليهم .. بس بتفع في الشارع .. يعني اللي يرمي كان في الشارع من العربية مع انه ممكن يلم وساخته دي في كيس ويرميه في بيته .. والشارع اصلا نضيف يا معفن .. علي ناصية الشارع يفط كبيرة عن مرشحكم لدايرة كذا وكذا وكذا .. وتحت اليافطة كوم زيالة عمري في حياتي ما شوفت قده .. طب وحياة امك ما انا منتخباك طالما تحت يافطتك كوم زبالة قرب يبقي بحجم جبل المقطم .. عاوز العمل العام يا نيلة ابقي شيل الزبالة .. كتكم نيلة عليكم وعلي اليوم اللي شوفناكم فيه بسحنتكم العجيبة دي .. احلي حاجة في كوم الزبالة انه فوقه بشوف تقرييبا كل يوم قطة جميلة بتدور علي فطار .. اخر مرة لاقيتها مش موجودة لان نوعية الزبالة للاسف كادليز والويز وكلوتات اطفال وستات .. منظر بصراحة مش يكسف بس يقرف كمان ده غير الريحة .. بتخيل اي نوع تلوث وبكتيريا في الزبالة دي.. ويا تري فيها كام عرسة وفيها كام فار .. ده غير الريحة والمنظر اللي عمري ما شوفته .. انا عن نفسي بلم الزبالة من البيت كل يوم او اتنين علي حسب الكمية .. ولو حاجة حتطلع ريحة بحوطها في كيس او اتنين واقفل عليها كويس واطلعه علي الباسطة .. بحاول اني التزم بقواعد النضافة المنزلية .. بستعمل منظفات فيها نسبة مطهر اكتر زي ديتول او كلوروكس .. نسبة المطهر العالية اينعم بتنشف ايدي بس بتشيل بكتيريا بالعبيط وده مهم للصحة .. والديتول مبقاش غالي خصوصا انهم ساعات بيعملوا تخفيظ علي ٣ عبوات ب ٢٠ جنيه وال ٣ عبوات بتعيش مدة .. يعني الفايدة اعلي من التكلفة .. وبحاول بجانب النضافة المنزلية - اللي ممكن تتعمل كل اسبوع او ٢ علي حسب - اني اشطب الحوض وألم الزبالة يوميا قبل ما انام اذا قدرت او كل يومين او ٣ .. المهم التخلص من النفايات والاهتمام بالنضافة وده مش عشان مبدأ نضف بيتك ورشه متعرف مين اللي حيخوشه .. لأ .. النضافة ولم الزبالة بجد من المهم جدا للصحة وعدم نقل الامراض .. بجد ممكت تقتل ٩٠ في الميه من البكتيريا بمجرد غسل الايدين .. والباقي بالاهتمام بالنضافة المنزلية والشخصية .. حاجات بسيطة ممكن تتعمل تحافظ بيها علي الصحة .. يعني ربنا بيتفضل علي الواحد بنعمة الصحة ولما بتروح بتعرف قيمتها .. بجد انا كنت مهملة اوي في صحتي في سبيل الدراسة والشغل لحد ما الدنيا اتربقت علي راسي .. طبعا الاهتمام بالنضافة الشخصية جزء من حياتي بس انا اهملت صحتي في نقطة اني لما كنت بتعب او بيجيلي مغص كنت مش بكشف وباخود مسكن وخلاص .. ولا كأني دكتور ولا حاجة .. لحد ما وقعت وقعة سبحان مين نجاني منها ورد علييا روحي .. يعني الصحة دي ربنا مديها للواحد ببلاش هدية منه ولازم نحافظ عليها .. مش رفاهية والله .. ده جزء مهم جدا .. للاسف الواحد بيفكر انه مش حيعيا .. لكن الجسم عامل زي الماشين ممكن تستهلك بدري لو استعملتها غلط او قاسيت عليها .. ان لبدنك عليك حق فعلا .. يعني سيدنا محمد اختصر كلام كتير اتكتب عليه كتب في كلمتين بساط فعلا .. ان لبدنك عليك حق .. بس للاسف مفيش توعية صحية في مصر .. ولا فيه ناس فاهمة ان النضافة الشخصية دي مهمة جدا .. ابسط مثال في المترو بتشم ريحة عرق رهيبة .. العرق ده مش عشان هو او هي مش فاضي يستحمي .. لأ دي نتانة يا حبيبي .. ده معناه انك منضفتش جسمك بقالك كتير بدليل ان البكتيريا اشتغلت علي الميه اللي بيتطلع من جسمك في صورة عرق وتكاثرت فيها وعملت الريحة الزبالة دي.. شوف كام مزرعة بكتيريا عايشة تحت باطك يا زبالة .. والغريبة يا مكتر الصابون اللي في بلدنا وبرخص التراب وممكن لو حافظت علي الصابونة من المية تعيش معاك مدة .. يعني ب ٢ جنيه تستحمي كل يوم .. طبعا اقتصاديات الشراء لسه بفكر فيها .. بس المغريات كتير مع العيد بقي .. الحمد لله ملياش في اللحمة اوي .. يعني لو لحمة بجد مش بلاستيك ، مشوية يبقي كده تمام اوي لمعدتي .. فيه ساعات لحمة بتبقي زبدة وساعات لحمة بتبقي كاوتش .. الزبدة دي غالية اوي اوي .. الكاوتش هي المتوفرة للاسف .. فمش بشتري لحمة من الاخر ،لو ماما جابت الكاوتش دي يا دوب حتة واقعد اندغ فيها ودماغي بقي .. المغريات الاكتر في الايس كريم والحلويات .. اتقوا ربنا فييا ده انا ماشية علي دايت عشان لازم احسن صحتي ومناعتي بالاكل الصحي ..اكتشفت عند وزارة الزراعة منافذ للبيع حاجات جميلة بجد ...بروكلي طازة وعسل بجد مش بلاستيك وبيض كبير مش بيض حمام احلف عليه وعيش كبير .. كان من فترة كان فيه منفذ بيع جمب هندسة تبع كلية الزراعة .. كنت بتمشي هناك وشميت ريحة عيش بلدي عمري ما شميت ريحته قبل كده - الله يرحمك يا لولو كان بيموت في العيش البلدي الطازة - المهم مشيت ورا الريحة اللي خدرتني دي لحد ما عرفت ان فيه منفذ بيع عيش بلدي وبيعملوه تقريبا نصه قمح ونصه التاني فول صويا .. يخرب بيت حلاوته وريحته وطعمه وفايدته العالية جدا .. والله عيش يتاكل حاف .. كان لولو والله ريقه بيجري لما بنجيب عيش بلدي طازة ويبقي حيموت علي حتة عيش يعضعض فيها .. الله يرحمه الحمد لله اني اكرمته علي قد ما اقدر بالرغم من اني كنت بزعل ان ماما كانت ساعات بتضربه عشان كان جت عليه فترة اتجنن وبقي بيعمل بي بي في كل حتة .. يا ريتني كنت اخدت بالي ان دي اول شكوي ان عنده مشاكل في البول .. العلم برضه مفيد .. انا لو جبت قطة تاني حشتري كتاب عن رعاية القطط ومشاكلهم الصحية عشان بجد لازم مش اربيهم كده لازم اعرف الاحظ مشاكلهم الصحية .. لانه لما بيعيا بعد كده بيبقي في عينيه نظره بتوجعلي قلبي بجد .. كل القطط اللي عيوا عندي بجد ليهم نفس النظرة .. نظرة لولو بتوجعلي قلبي لما بفتكره .. كنت بدعيله بجد ان ربنا يهون عليه واهم حاجة عندي انه ما يكونش بيتألم .. والحمد لله انه مات من غير ألم .. افتكرته لما أكلت القطط اللي تحت العمارة النهاردة الصبح .. بيقعدوا تحت البلكونة وبوكلهم .. اهم يساعدوا في عدم وجود الفيران في كوم الزبالة اللي علي الناصية ..وقفت شوية القراية في كتب الاقتصاديات المنزلية وكيفية الصرف بدون بذخ .. وقلت اركز علي كتب الاهتمام بالصحة .. الغريبة بقرا الكتاب ده دلوقتي وبهرب من الكابتن اللي بيدربني في الجيم .. تناقض عجيب الصراحة .. كل شوية اقول له بعد العيد خلاص والله بعد العيد اخر كلام .. اصل انا بقالي سنين مش بتدرب وبصراحة - غير الكسل - بخاف من وجع العضلات اللي بييجي بعد التدريب .. بس لازم اتدرب عشان عضلاتي لازم تتقوي عشان احرق دهون احسن وصحتي تبقي افضل وجهاز المناعة يبقي اقوي .. سمعت ان جنينة الحيوانات جابوا حيوانات جديدة واللا الحيوانات ولدت قريب ... مش فاكرة .. بس سمعت ان عندهم الراكون .. كميلة الحيوان ده جدا .. يا ريت يبقي كلامهم صح ..عاوزة اشوفه بعد العيد اذا قدرت افضي نفسي ان شاء الله
posted by reham @ 1:14 AM
8 Comments:
يا عيني عليا خلصنا وجيت امشى طلعت على فيصل عشان اركب حاجه للجيزه وقفت مكروباص قالى لا وبعد ما مشى شويه وقف وقالى تعالى ركبت لاقيت مزه قاعده جنبه لابسه عبايه قولت ليك تقول لا .. جه لحد قبل الكوبرى وقالى انزل ههههههههههه يابن الجزمه اداني حجه كده هبله قولت ماشى بعد ما دفعت 75 رجعلى منها نص جنيه وقفت كتير عشان الاقى عربيه تطلع الكوبرى الجو برد اوي فى فيصل اتجمدت فى الشويه دول لاقيت مكروباص جاى يا فرج الله جريت عليه وبقوله جيزه يا اسطي .. اول ما سمع كلمه جيزه جرى ونفضلى ..منظرى بقى وحش دا تاني مكروباس اوقفه وينفضلى . الاولاني كان رايح التحرير مرضيش يركبني كده كده كان هيطلع الكوبرى كان هياخد نص جنيه على الماشى ما علينا ..لاقيت تاكس ابيض راجع بضهره وجاى يقف ادامي عملت عبيط قولت متبصلوش .. اصل السواقين دلوقت تنحين اوي لاقيته بينزل الازاز .قولت يبقى هيسالنى على الطريق وكده لاقيته بيقولى رايح جيزه .. فكرت بسرعه .. كنت هقوله دا منظر واحد بيركب تاكسيات .. بعدين قولتله اها ..قالى طب اركب فهمت انه بيعزم عليا .مش هياخد فلوس ..فتحت الباب جرى .. بيني وبينك كنت لابس تي شيرت لسه شاريه على العيد مخليني ابن ناس اوي ههههههههههه قولت بركاتك .. ركبت وقبل ما يطلع الكوبرى لقى شباب ماشين نادلهم برضو وعمل زي ما عمل معايا وقالهم مش هاخد فلوس قولت دي مش مساله تي شيرت بقى .. بس صاحب التاكس شاب جدع واد محترم بس بدل ما ينزل على شارع الجامعه نزل نزله شارع مراد قولت مش مشكله هو الجو برد بس انا هتمشى الشويه دول وكتر خير الراجل كمان همشيه على مزاجي المهم شكرته ونزلت روحت البيت لاقيت الواد اخويا اللى واخد اجازه من الجيش لسه نايم انا سايبه من الساعه اتنين العصر وراجع الفجر كل ده نوم . صحي على تخبيطي على الباب وبيقولى انا جعان .. انا وهو بس اللى قاعدين فى الشقه والعيله الكريمه كلها سافرت البلد .. قالى تيجي نطلع نجيب اكل من بره
انا لسه جاي من بره ومفيش محلات قولتله طيب تعالى نشوف اى حاجه تتاكل انا بكره العيد الكبير ده عشان مش بلاقى اكل فيه اللحمه اللى سلقانها اول يوم كلها ملبسه وانا مش باكل فتفوته بيضه فى اللحمه .. طلعنا ملقيناش حاجه روحت سوبر ماركت وجبت علبه كوكي ب18جنيه ولاقيت كيرز لسه الراجل بيطلعه من الفرن جبت ب3ولتر بيبسى لاقيت الراجل معلق ورقه بيقول الاتنين لتر ب6.50 قولت اشته دا اللتر ب 4.50 جبت الاتنين لتر وروحت بس كعيت جامد فى اليوم ده ما علينا نسفنا تلت اربع الكوكي وعوضنا على الله بعد كده روحت رايح على الجهاز وقعدت ادور على ميلك جبته ضفته على الميل عندي ودخلت على الفيس ادور مش لاقيه قولت ايه ده هيا عامله الفيس على ميل تاني ولا ايه كنت هشتم بس مسكت نفسى ههههههههههههه معلش يا رومه .. كفايه عليكي لحد كده نكمل وقت اخر (-^)..
اللحمه الكاوتش ... تقريبا نفس الافكار كل حاجه بتقولى عليها بتبقى نفس افكارى بس انتى بتعبرى عنها .. دنا زمان كنت باخد كل علقه وعقله بس اكل اللحمه ده .. امي كان عندها شبب بكعب ناشف وانا صغير كان عندي حساسيه مكنتش باكل سمك ولا مش فاكر ايه ولا كنت بطيق اللحمه ولا الفراخ .. اى بروتين ابعديني عنه وهيا كان تجيب كبده وتقولى كل .. وتقلب وشها .. انا اشوفها كده وابص على الشبشب اللى جنبها وافتكر العلامه اللى فى قصبه رجلى من المره اللى فاتت .باكل انا باكل الكبده العاديه انما اللى بتجيبها دي بيبقى فيها اوانص وحاجات زي الكوتش كده بس مش قادر اتكلم باكل لحد ماتيجي فى بؤي حتت كوتش من دي اقعد اندغ فيها واحاول ابلعها مش قادر وهيا تقوم وخداني باور سلام وتقولى اطفح احاول ابلعها تاني ارجع هههههه واقوم اجرى وهيا قاعده مكانها تنشن عليا بالشبب يجي فى قصبه رجلى تاني بنام مكاني .. الشبشب ناشف وانا كنت دعيف اوي زومان .. نفس الحوار ده بيتكرر ساعه اللحمه الكاوتش هههههههه بتقولى جيبها كده وجبها كده وابلع على طول انت لسه هتمضغ ولو لاقيتني طولت شويه تقوم وخداني منشت على بؤى .. ههههه ناقص تعمل فيا الفنش ....
مش عارف ازاى يا رومه تبقى داكتوره والقط بتاعك يمووت منك بسبب الاهمال دنا ساعات بحس انك تمرجيه ومتنكره فى دور دكتوره هههههههههه
بالنسبه بقى لموضوع الجيم ده انتى كده جيتي فى منطقتي ... امال يا ماما .. اللى قدامك ده حاصل على الاولمبيات لسنه 2010 و 2011 على التوالى هفيدك شويه فى حوارات الجيم .. اصل انا برضو كنت بروح الجيم على فترات كل فتره مثلا بتاخد شهر ولا شهر وشويه وكل مره كنت بتعرض لنفس الالم فى العضلاات وكنت بتخنق جداا من الناس اللى بيدربوني .. بيقولوا انهارده تدخل جنرال ولازم تيجي بكره جنرال وبعدين تريح اول يوم ماشى انما التاني بيتحط عليا من الوجع لحد من يجي اسبوعين قولت not any more ..
وقررت امشى بدماغي روحت اول يوم لعبت رجل ودهر بس وخفيف جدااا اوزان عبيته وريح اليوم اللى بعدها لحد ما حسيت اني مش تعبان كده ورحت لعبت رجل ودهر وبطن وسخنت بسيط جدااا كتف والله يابنتى ما حسيت بوجع يذكر وسخنت جسمي كله يعتبر لو احتجتى اى حاجه فى الجيم ممكن تساليني بس اعتقد ان انتي مش هتشيلى اوزان انتى عايزه تخسى يبقى سويدي .. او لو حبيتي تشيلى اربعه جرام ولا حاجه ميضرش ههههههههههههههههههههه مش بتريق لا سمح الله ..حاشا وماشا بس اللى اعرفه ان المفروض ال- نمشيها بنات - مش بيشلوا اوزان اصلا عشان جسمهم ميبقاش ناشف بس كويس انك ابتديتي تتجهي للرياضه .. افتكر فى مره اني كنت سايب كومنت ليكي على الموضوع ده .. خطوه حلوه منك .. كيب اون
فك ايه الموقع العبيط ده انا كتبت اربعاتشر كومنت اتنين بس اللى يثبتوا دنا تعبت فيهم اجيبهم تاني منين
This comment has been removed by the author.
مش هعيد اللى الموقع طيره ده الا لما يجيلى مزاج ... نرفزني بجد .مسدقت الوحل نزل عليا وابتديت اكتب دا ايه القرف ده والكومنتات ظهرت ادامي بالترتيب راح واخد كومن من فوق على واحد من تحت وشقلطني اول ما دوست باك على الصفحه .. ايه الموقع العره ده
بصى يا ستى , اول كومنت اللى البلوج مسحه منه لله كنت بقول خلصنا الشفت الساعه 1 بليل انا واتنين زمايلى اتفقنا نلعب بلايستشن واحد اسمه اسلام والتاني احمد . اسلام ده اتراهنت انا وهو انى لو كسبته متش هيجيب لتر حاجه ساقعه ولو هو كسبني مش هجيب حاجه ههههههه . اصله كل مره بيطرقعني سبعه تمانيه .. مش عارف اعمله ايه دنا وانا بصلح الجهاز جبت بورده عاليه شويه ومش مشكله الفلوس دلوقت مخصوص عشان اجيب برنامج البلايستشن عندي واتدرب عليها واطرقعه .. ومن الحظ الفقر جبت البورده وجبت الدرعات بس مش معايا فلاشه اجيب عليها اللعبه .. المهم احمد ده بقى معاه مكنه ركبنا وراه وطلعنا على فيصل . لاقيته راح على شارع العشرين بس من ناحيه صفط اللبن . ليه يابنى كده دا من فيصل اقرب قالى فيصل زحمه ومش هنعرف نسلك المهم دخلنا شارع العشرين لاقينا ماسوره ميه منفجره وعامله بحيره البجع والعربيات بتيجي فى الميه وتهدي طب هتعمل ايه يا احمد انا قولت الواد سويق بقى وهيخلصنا من الحوار ده لاقيته راح ماشى ولا همه قولت اشته هيتصرف التاكس اللى قدامنا راح واقف خالص لاقيت احمد راح منزل رجله عشان يسند الموتوسكيل انا كنت راكب اخر واحد .ااه انا محبش حد يركب ورايا ..لاقيته بيقولى انزل يا محمود بصوت عالى ..قولتله المركب بتغرق يا ريس ورحت ناطط من على الموتوسكل ..بووم بس الحمد لله باقل خساير رجلى الشمال اتغرقت خالص والميه دخلت الكوتش واصلا رجلى اليمين كنت حاططها على الشكمان لما ولعت ..بقيت ماشى برجل تلج ورجل مولعه .. مش عارف ابرد ولا اسخن ولا ايه موقفى بالظبط المهم ركبنا ورحنا المحل لاقينا بلايستشن تو بس شكلها تعبان اوي ولاقينا ثرى قولتله دي جامده ياله ..قالى لا هنلغي الاتفاق مفيش حاجه ساقعه عشان انا اول مره العب ثرى ويمكن حظك يكون حلو وتكسب .. واعي الواد اسلام ده.. لعبنا اول متش مسكته طرقعته بس يدوبك واحد زيكو ..جيت الاعب احمد قال مش معايا فلوس قولتله هعزمك وابقى اخدهم بكره .. مردش عليا ابن اللئيمه عشان الكلمه متتحسبش عليه ما علينا هيروح مني فين مسكته قطعته بس ابن المحظوظه جه فى الاخر وجاب جونين ورا بعض .كسب المتش واسلام كسبه وقالى تعالى انت تاني يا حوده قولتله بيس .. طرقعني سته صفر هههههههههههههههههههه خلصنا لعب وخرجنا --التكلمه فى الكومنت التاني
انا قربت ادمن القهوه وانتى السبب منمتش من امبارح . قولت للاوفس بوي عايز قهوه باللبن عملى حتت دين قهوه مشربتش زيها قبل كده دنا على كده كنت بشرب شيح وفاكره قهوه ..
احلى جمله فى البوست ده -واذا مجابوش اخبار عدله على اخر السنه هلغي الاشتراك - بجد اول ما قريتها موت على نفسى من الدحك ....
متفق معاكي فى موضوع الفيس ده انا اصلا مش بطيقه بيضع وقت من غير فايده بفتحه كل فين وفين
انا برضو لما بيبقى معايا اكل ويبتبقى الورقه ولا الشنطه بتاعت الاكل - طبيعي مش هيتبقى حاجه غير كده مش معقول هيتبقى اكل يعني - مش برميها فى وسط الشارع ...برميها على جنب ههههههههه اعمل ايه منا مش بلاقى باسكت يوحد ربنا فى الشارع .. ساعات لو رايق كده وربنا هاديني بخليها معايا لحد ما اروح المكان اللى رايحله وبرميها فى الباسكت مش عفانه والله بس مش بلاقى مكان ارمي فيه الحاجه.. دلوقت بقيت افضل شايلها معايا لحد ما ربنا يفرجها
هههههههههههه وحيات امك منا منتخباك , هدي نفسك يا معلمه ريهام مش كده..صحتك
انتى بتحبى القطط اوي.
انا بحترم الناس اللى بتهتم بالنضافه الشخصيه وبنضافه البيت بس انا لو جبت ديتول ده فى البيت فى ظرف تلت ساعات هبختفوا اول واحده هتروح فى العين والتانيه كيمو هيدخل يغسل ايده ويرميها فى طبق فيه ميه كريم ده البكتريا الصغير لسه بينمو فى ابتدائى ..
جامد اوي المثل بتاع سيق بيتك ورشه ده انا اول مره اسمعه
هههههه عسل اوي وانتى بتردحي - لا دي نتانه يا حبيبى هههههه دنا حسيت انك لسعتي الراجل على افاه ومسحتى بيه الارض . مالك بس يا معلمه ريهام انتى عصبيه اوي على كده
وانا راجع فى المترو لاقيت بت مزه مش مزه اوي يعني ..ولا عبرتها بس واقفه فى وشى وعماله تبص فى الخباثه .. انا عامل مش واخد بالى مش عارف البنات اتهبلت ولا ايه .. ما تيجي تكلمني على طول ههههههههههههه انا برضو ببص بس مش فى الخباثه ببص عادي بس مش بطول بسرعه كده يعني باخد فكره عنها لو كنت نزلت وراها وكلمتها كان هيبقى اشته بس قلقت تسال بقى انا شغال فين وتروح تشتكي للمدير تاني ويجي يقولى انت مش راحم لا فى الشغل ولا المترو اقوله ايه ساعتها بقى هههههههه..المهم نزلت فى المحطه بتاعتي وجيت اركب العربيه لاقيت ورا زحمه وفى واحد بس ادام قولتله حد جنبنك قالى تعالى جيت افتح الباب مش عايز يتفتح قولت (كلمه قبيحه لنفسى )مش عارف تفتح الباب ولا ايه المهم كنت هخلعه هههههه صحه بقى ..ركبت وجاى انزل يانهار اسود هو انت تاني هههههه ضحكت قبل ماافتحه . مش عايز يتفتح طب انا فتحته فى الاول عشان كنت معدول دلوقت اعمل فى الوكسه دي لاقيت السواق بيقولى دوس على الزرار جامد .. جاب التايهه امال انا بدور على منخيرى يعني المصيبه انى بفتحه بايدي اليمين يعني القبضه الداميه قعدت دقيقتين افتح فى الباب حسيت ان الشارع كله واقف يتفرج عليا هههههه .. محدش خد باله اصلا سبحان الله لما السواق قالى دوس على الزرار والله انا دايس عليه اصلا بس اتفتح بعد كلمته شكلى كان وحش اوي ما علينا ..انا عايز اكل مش عارف اعمل ايه .انهارده اجازه لازم اروح الجيم بس مش متاكد هو فاتح انهارده ولا لسه معتبره عيد ..عموما انا اصلا شكلى هقضيها نوم واعوض امبارح بس مش عارف اكل ايه .. انتى بتعرفى تعملى رز يا رومه .. انا بحبه اوي وعندى شربه ولحمه بس مش بعرف اعمله لو تكتبيلى الوصفه تبقى خدمتيني
Post a Comment
<< Home