اقتصادي يا مه
الواحد لسه راجع من برة وبيفتح التليفزيون بيلاقي بلاوي .. اي والله بلاوي .. ده غير الناس اللي بترجع في وشنا باخبار ونيلة .. المهم بعد ما طفحت الغدا قودام التليفزيون .. فتحت ورقة عرض السوبر ماركت اللي جمبي .. حلو اوي الستايل الجديد ده .. ورقة العرض المرة دي جديدة .. اشتري الكمية الفلانية ب ١٠ او ٢٠ .. شاركنا مهرجان ال ١٠ وال ٢٠ .. فكرة ممتازة لزيادة معدل الشرا .. طريقة بصراحة عملت لي دماغ .. في الفلي ماركت - او ماركت البرغوتة اللي ممكن تبيع فيه اي حاجة بالسعر اللي تحدده وينفع الناس تفاصل معاك - بيعملوا نفس الاسلوب ده تقريبا .. بتلاقي حد فارش واي حاجة بسعر معين .. يعني اي حاجة مثلا ب ١٠ او اي حاجة ب ٢،٥ .. مش عارفة ثقافة الفلي ماركت عندنا واللا لأ ..بس اسلوب ممتاز - اشبه بالمقايضة - للتعامل المادي بين البشر خصوصا لو عايز ترشد النفقات .. يعني ممكن انت تكون بتبع حاجة وجمبك حد بيبيع حاجة تانية وحركة بيع وشرا شغالة .. مرة اشتريت قهوة من عند الفلي ماركت كان نفسي فيها بس كانت غالية جدا .. لاقيتها بسعر مناسب وتاريخ الصلاحية لسه قودامه ٧ شهور واللا حاجة والعبوة مقفولة .. بصراحة فكرة ال flea market فكرة ممتازة ويا ريت تتطبق بجد ... تاني حاجة لفتت نظري عن التوفير في حياة المصريين .. انهم بيقروا عنواين الجرايد عند البياع علي الماشي .. يا بيوفروا او زي حالاتي بيقرا العناوين من مواقع الجرايد علي النت .. يعني انا لو اشتريت ٥ او ٦ جرايد في اليوم حقراهم امتي وحلمهم فين وحجيب لهم ميزانية منين دول كمان ؟ .. ففكرة قراية العناوين عند بياع الجرايد فكرة اقتصادية ميه الميه .. تالت اسلوب توفير شوفته النهاردة وكان مسخرة بس فه نسبة الريسك عالية .. الشعبطة .. لاقيت عيال خارجين من المدرسة واستغلوا البطء في سير العربيات .. قاموا اتشعبطوا علي العربيات النص نقل او اللي بتنقل البضاعة .. بصراحة اسلوب مسخرة في توفير فلوس الركوب .. يتشعبطوا حتة ويمشوا التانية .. برضة المصري لما يحب يوفر بيوفر برضة .. بس ساعات بأسلوب كوميدي .. والنبي بلدنا دي عسل
posted by reham @ 10:46 AM
5 Comments:
الشعبطه فى المواصلات دي حاجه عاديه .
عندنا من زمان . دا العادي فى المناطق الشعبيه زي اللى انا عايش فيها دي
انهارده وانا راكب المترو العيال الصغيره اللى هربابنين من المدارس راكبين المترو وواقفين فى وش الباب الناس مش عارفه تركب ولا تدخل وبعد ما نزلو قعدوا يخبطوا فى المترو . مزاجهم كده هنقف ضد مزاجهم يعني
This comment has been removed by the author.
اقتصادي يامه ههههههه نايس تيتل
This comment has been removed by the author.
فيه اسامي كتب كتير للازمة الاقتصادية يا محمود .. ممكن تلاقيها في مدبولي .. بس انا بحب اقراها من اللي عايشين فيها وبلغتهم .. اي كتاب فيه عنوان meltdown بيكون بيتكلم فيه عن الازمة دي بالتفصيل ..
Post a Comment
<< Home