يا للذكريات

بحاول اذا خرجت الصبح اني لازم علي قد ما اقدر ارجع قبل الساعة واحدة عشان ألحق برنامج الطبيخ بتاع قناة الحياة .. الشيف يسري بيعمل حاجات انا باخود منها قواعد وافكار .. انا بعايب عليه بس كمية السمنة والزيت اللي بيستعملهم عشان كتيرة اوي .. بس انا جربت مرة الاكل بسمنة او زيت كتير بصراحة يجنن .. ماما لو عملت الرز بسمنة بسيب كل حاجة وممكن الغدا يبقي رز بس .. بس عشان الدايت وعشان اني عملت المرارة انا وهي فعايشين يا مسلوق يا ني في ني يا بمعلقة زيت قليل السعرات ... مرة سمعت ان زيت الرز اللي في اولاد رجب اقل زيت في السعرات بس مش عارفة تمنه كام .. المهم معلقة زيت علي حلة مش مشكلة .. مش زي الشيف يسري .. والله كان نفسي مرة اتصل بيه واقول له طيب ازاي انت مش بتتخن مع الاكل الحلو ده كله ؟ بجد والله ممكن يدينا افكار .. ما علينا كلنا حنخس اجباريا مع الانهيار الاقتصادي بعد الدين ما بقي ١٥٠٠ مليار تقريبا والرقم ده في حد ذاته اكتر من خساير الحرب .. انا مش حفتح بقي والله .. انا اصلا خرجت ومعايا ميزانية رفيعة عشان لبس الشتا .. كنت عايزة شراب تقيل بدل اللي اتحرقوا وبرنس جديد عشان ألبسه علييا واقفله علي صدري خصوصا بعد علقة الالتهاب الرئوي .. وعايزة سويت تشيرت واشوف اذا كان ممكن اجيب بلوزة اقضي بيها الشتا ودمتم .. وقال انا واخدة معايا ٣٠٠ جنيه .. باين علييا هبلة .. المهم حتة من هنا علي حتة من هناك جبت الحاجات وقطعت ٢٦٢ جنيه .. كنت فرجة المحل وانا بقيس البرنس .. طيب ما انتوا مش عاملين ستارة ولا بارافان ولا بتاع .. كله سايب البضاعة وبيتفرج علييا .. والراجل بتاع المحل بيقول اللون البمبي عليكي يجنن .. اتهبل ده كمان .. الناس والله اتهبلت .. زغرتله قام اتلم .. اخدت الفزدقي عشان ارخص .. وانا بدفعله قاللي بس والله البمبي احلي .. قلت له البمبي غالي قام عمللي تخفيض ٢ جنيه عملا بمبدأ " كلنا لازم نشيل بعض يا حورية " .. انبسطت اوي بال٢ جنيه اكتر من انبساطي بالبرنس نفسه .. تلاقيه كسبان اكتر من تمنه بكتير ف ٢ جنيه مش مشكلة .. وأهوه يبقي كسب زبون او اعتذرلي بطريقة غير مباشرة ..ما بقيتش بدق خلاص .. بعد وصلة الردح اللي ردحتها للراجل اللي ضايقني في الصف عند فاتورة النت ورغبتي الشديدة اني اقلع الجزمة واديله بيها عشن زودها اوي وبعد كده نيتي السودة اني اشتري اليكتريك .. قررت اني اشتري دماغي من قلة الادب والانفلات الاخلاقي اللي الناس بقم فيه .. طالما بيتلم البني ادم بزغرة او بوصلة ردح يبقي خلاص .. جمب المحل بياع ورد ، قال دستة البلدي الاحمر ب ٣٠ قال .. ٣٠ اه ممكن يا حبيبي لو حشتريه واكله او اعمله مربي .. ده حيدبل قبل ما اوصل البيت ..ماشية بالبالانس شيت في دماغي برضة .. كملت بقية ازازة اتش تو اوه بطعم اليوسفي اللي بقالها سنين في التلاجة .. اه وفرت تمن ازازة ميه بس يا تري ركنتها في التلاجة فترة طويلة انهت تاريخ الصلاحية واللي فيه كام بكترياية عايشين فيها ؟؟ .. بصراحة بعد ما شربتها قرفت من احتمال التلوث مع اني انا اللي بشرب منها بس ركنتها فترة في التلاجة .. مش حعمل تاني كده .. من ضمن اساسيات الاقتصاد اللي بلتزم بيها رعاية الصحة عشان نوفر العلاج بعد الشر طبعا .. المهم عديت علي بتاع الجرايد نسيت اجيب الجرنان وجبت ميكي جيب وكتاب عن الاقتصاد - دراسة عنه وازاي توفر فلوس وبتاع - مع اني حالفة ما اشتريش كتب بس مقدرتش اقاوم وكتاب اخبار اليوم عن لماذا ثار المصريون - قال يعني انا مش عارفة السبب - برضة الناس ماشية تتكلم عن الفلوس .. اللي في السوبر ماركت بيقرا الجرنان بحس عالي عشان اللي داخل يسمع واللي خارج يسمع .. الولد الصغير خارج من المدرسة مع ابوه بيقول له ، يعني ايه ازمة اقتصادية يا بابا ؟ .. يعني مش انا لوحدي اللي عنده هس هس من الاقتصاد وبيحاول يوفر في النفقات .. بعمل بس تجديد للقديم واحلال للي دايب في اللبس .. وجزمة الصيف هي جزمة الشتا .. وحعمل الصبغة لشعري بنفسي واعمل شعري بنفسي .. واهتم بصحتي اكتر عشان ما اخودش علاج كتير الشتوية دي .. وهما جوز شرابات .. ألبس واحد وأغسل التاني .. رجعت بيتنا ولحقت الحمد لله الشيف يسري .. بيحشي فراخ باللحمة .. فكرني بالارهاب والكباب والله .. تقومي يا اختي جايبة ايه الفراخ .. وتحشي الفراخ باللحمة ..اممم اه اومال ايه ...قمت جوعت الصراحة .. جبت بقيت ربع الفرخة اللي بقالي تلات ايام باكول فيه .. لقمة والتانية مع بيضة مسلوقة .. بطني باظت وقمت رجعت .. بكمل الغدا بيبسي .. انا و٣ قطط يتامي بناكول في الربع ده بقالنا ٣ ايام تقريبا .. بس الاكل مش بايظ انا بطني اللي باين عليها تعبانة شوية .. كنت باكول حتت بتنجان مخلل معاهم يمكن هو اللي قلب بطني ؟؟ بس في الفيلم كان عادل امام بياكول بتنجان وبيتفرج علي حشو الفراخ باللحمة .. ياللذكريات .. الفيلم ده انا شوفته من زمان اوي ومش عارفة ليه مش بيجيبوه كتير مع انه روعة .. القط الابيض في اسود اللي تحت البلكونة هو اللي كان موجود من ال٣ قطط النهاردة الصبح بس .. بفتح البلكونة بجيب حاجة من علي الغسيل قعد يبصلي اذا كان فيه فطار واللا لأ .. مكانش عندي اللا الربع ده .. طنشت القط الصراحة ، قعد ينونو نونوة طويلة اوي واخرها كأنه بيعيط .. والله صعب علييا .. قمت قطعت حتة من الربع وشيلت العضم كله ولفيتهم في كلينكس ورميته ليه .. اهوه يفطر والربع بتاعي يبقي الربع الخالي بقي اجي اكله علي طول .. اديني اكلت منه حتة ورجعت .. القط باين كان حاطط عينه فيه .. بابا بيلوم علييا اني بفطر القطط .. بقول له دول اكيد بيدعوا ربنا .. يمكن يدعولي دعوة حلوة علي الصبح ربنا يفرجها .. يمكن بيدعوا ربنا يطعمك ما يحرمك .. قطط مصرية بقي لازم دعوتهم تبقي كده .. مش زي قطط اليابان المساريع المسلوعين المؤرفين امات دم يلطش .. القطة المصرية تحس انها زينا كده ، متبهدلة وهمها العيال وراجلها هاجرها ومبهدلها .. مصرية مصرية .. مش بستغرب لما ألاقي قطط عند محكمة الاسرة ، جمب الرجالة والستات اللي كتير بلاقيهم بيعيطوا .. ما علينا .. القنوات اللي بتجيب الاكل افتكرت اني انا بس اللي بتابع برامجها زي الحياة كده .. ما بقيتش بقول لحد اني بتابع برنامج المطبخ عشان محدش يضحك علييا .. انا باجي افضح نفسي هنا بس .. اتاريني مش انا لوحدي .. صحاب لييا بيفتحوا قنوات الاكل خصوصا فتافيت بعد ما يرجعوا من الشغل .. والله العظيم اجدع من قنوات وتوك شوز عجب خصوصا قناة الفطيرة .. اعلام مدوحس .. جهاز التليفزيون اوسخ اختراع ف ي العالم لو انت اسأت استعماله .. بيستعبدك فعلا .. فانا كام برنامج واذا كان معاهم مسلسل يسندهم وكفاية .. وساعات بطنش خالص واختصر اليوم علي قراية شريط الاخبار وانا عاملة التليفزيون سايلنت .. الشيف يسري خللص خلاص .. وانا شكلي حقوم اكمل غدايا بالبيبسي الدايت واريح شوية .. عشان اقوم اشوف ايه نظام الميزانية الايام دي معايا .. يا انا يا هي