Human Gear

انا كنت ترس في النظام .. كلنا تروس في النظام مش انا بس .. الدنيا حطانا في دايرة وكلنا بنجري فيها .. نلهث اوي ونفضل نجري نجري لحد ما نفسنا ينقطع ونقعد ننهج جمب الحيط ونطلع لساننا لبرة زي الكلب العطشان - اعزكم الله - لمجرد اننا نحقق شذ في الدنيا دي .. وفي وقت ما جرينا علي الدنيا ، نسينا ديننا واهلنا واسرتنا وعلاقاتنا والقراية والعلاقات الانسانية وتقدير الاخرين وعدم المساس باحساسهم وكرامتهم ومحاولة مساعدتهم والرفق بالحيوان واماطة الاذي عن الطريق .. باختصار نسينا نبقي بني آدمين .. يعني ليه ربنا قال " ولقد كرمنا بني آدم " .. يعني عشان افضل اجري في ترس عشان احقق حاجات كلها مادية ؟ واللا العالم اللي حوالينا اجبرنا علي اننا نكون ترس في مكنة اذا وقفت وقفت حياتنا ؟ .. هل السيطرة علي العقول وصلت لدرجة اني مجرد ترس في مكنة ولما آجي استريح لازم اكول الشئ الفولاني وألبس الشئ العللاني واسمع الموسيقي دي مش دي واقرا اكتب دي من دول ؟؟ .. حتي الترس بييجي عليه وقت ويتبري .. طيب لما اتبري ويضطروا يبدلوني بترس تاني اكتر كفاءة وشباب وقابل للاستهلاك جوة المكنة .. انا حيبقي مكاني فين ؟ وحيبقي ايه اللي فاضل معايا ؟ .. يا تري الماديات حتكون ساعتها بتحقق لي السعادة ؟ واللا تنميتي لشخصيتي وكياني واخلاقي ومعاملاتي وعلاقاتي وقراياتي وكتاباتي حيكونوا لييا السكن والراحة ؟