يا سيجارتي ليه كنتي انتي الحل ؟

الحمد لله مش بشرب سجاير .. مش حملها خالص .. ايام القنابل كان وشي بيصفر وبيبيض وبيروح ألوان ..ورجعت للكورتيزون لفترة تاني لدرجة ان وشي نفخ بعد ما كان هدي .. عشان كده عذرت سمية الخشاب انها لجأت للكورتيزون .. دوا سحري بس ليه مضاعفات .. شجاعة انها عشان لقمة العيش ما اهتمتش بانها تظهر مليانة في المسلسل وتاخود كمية التريقة دي كلها من خلق الله .. بجد شجاعة ..ما دفنتش راسها في الرمل زي النعامة وهربت من الواقع ، بالعكس واجهته بكل شجاعة وفي الاخر هي اللي كسبت .. بحب انا اسلوب المواجةه للمشاكل الموجودة ..وخللي اللي يقول يقول ..مهي الناس محلتهاش اللا الكلام وبس .. وبمناسبة الكلام .. انا كنت اخدت عهد علي نفسي ما اتكلمش عن رأيي في اي حاجة لان الناس مستعدة للهجوم عليك قبل ما تقول وتوضح رأيك بالكامل .. وده مش اسلوب للحوار الناجح ..ده اسلوب للحمار الجامح .. المهم ، نزلت اشتري مستلزمات للبيت وكتبت كل اللي عايزاه في ورقة قبل ما انزل كأسلوب للحد من النفقات .. يعني عارفة انا عاوزة ايه ، مش اجيب اللي عايزاه وحاجات من ده علي ده مش محتاجة ليها اوي دلوقتي او ممكن اشتريها وقت تاني يعني لما الامور تتعدل ... نزلت جبت حاجتي وعارفة ان الكاشير حيضرب رقم من اياهم - ما بين ٥٠ ل ١٠٠- وده الرينج العادي لاي حاجات عادية للبيت من السوبر ماركت ..طب والنبي انا اتحكم في الاسعار ازاي ؟ يعني وقفت السينما وشرب القهوة برة وشرا جزمة جديدة وعملت جرد للبس الشتا قبل ما احدد عايزة ايه .. وكنت فاكرة ان البورنس اتحرق بس لاقيته مدفوس جوه في الدولاب - فرحت اوي الصراحة - ،لاقيت كمان مدفوس جمبه بيجاما شتوي شكلي ممكن زلبسها لما الجو يبرد بجد واكون حتي خسيت لها شوية .. يعني باقدر اتحكم في اللبس والرفاهية .. حتي عمرو دياب بسمعه دلوقتي من علي النت .. وبحاول امسك نفسي قودام الكتب .. كل شهر كتاب او ٢ جداد وخلاص .. وساعات بشتري بالعبيط لما بلاقي تخفيضات علي الكتب حتي لو ما قريتهاش عملا بمبدأ اذا لاقيت كتاب حلو اشتريه حتي لو مش حتقريه دلوقتي .. لما بفرز مكتبتي بعد كده بلاقي عندي حاجات حلوة والله وبييجي وقت لقرايتها فعلا .. يعني معظم الفلوس دلوقتي علي الاكل .. ومش اكل برة يعني .. لأ بجيب الخضار وحاجة السلطة وبقية المستلزمات للاكل العادي جدا .. الفلوس بتتبخر بجد .. ماشية بنوتة دلوقتي كاتبة فيها رأس المال والمصروف ..بالانس شيت بحاول ألتزم بيها جدا علي قد ما اقدر .. اتاريني مش انا لوحدي .. الست اللي علي الكاشير التاني لاقيتها بتزعق بنرفزة قلقتني عليها - وهي في اوائل الخمسينات - لا يحصل لها حاجة في المحل من النرفزة .. كانوا بيتخانقوا علي سعر ماجي .. قلت لها يا مدام اهدي كل حاجة غليت ومفيش رقابة للاسف ..المحل مش بيسرق يعني صدقيني الاسعار زادت .. لما خرجنا برة وجت معايا للعطار - بتشتري سماق ..اللا ايه ده يا خويا ده ؟؟-لاقيت الست اصلا لسه متنرفزة وقالت لي مش اول مرة يغالطوني .. وابتدت تتكلم علي التضخم وزيادة الاسعار ..رجعت بالذاكرة لندوة علاء الاسواني وجلال امين الاسوبع اللي فات واللي بعدها قررت اني اطنش الكلام عن الاوضاع عموما في البلد عشان دماغي ما تضربش .. سكت ..بس لاقيت اللي ماشي بيتكلم واللي رايح بيتكلم .. حتي بياع العطارة بيتكلم .. كبت دماغي وروحت اشتريت ايس كريم بوبس بتاع نستله .. صغير وكتير ب ٤ جنيه ..فيه ايس كريم صغير كتير ..اهوه كده له فايدتين .. اولا سعرات قليلة عشان باخود في اليوم واحدة ويبقي اسمي اكلت ايس كريم لزوم الدايت ومن ناحية تانية توفير للنفقات ..رجعت تاني اشتري ربع كيلو بسكوت بالقرفة - ارخص واقل سعرات من بيتي فور بالقرفة ومربة التين او الخوخ مع انه احلي- بقالي كذا يوم عاوزة حاجة بالقرفة .. دوقني الراجل واحدة بسكوت وبيحط ربع كيلو وانا بفكر اني اقول له كفاية البسكوتة اللي اديتهالي وبلاش الربع وعاوزة اضحك علي الافكار دي .. لاقيت الست اللي اتخانقت علي الماجي قعدت في عربيتها وبتولع سيجارة وسرحانة .. اه والله انا عارفة السرحان ده وعارفة تعبير الهم اللي علي الوش ده .. بصيت لي وقالت عشان يتبصطوا بتوع كل جمعة وبتوع الاضرابات .. ربنا حيفرجها مش انتي بس اللي تعبانة .. ومشيت بقي بسرعة عشان احرق احساس النرفزة اللي اتكون جوايا..روحت البيت وانا بفكر ان مش الحل في السيجارة بجد .. الحل مش اني احرق نفسي عشان المشاكل اللي حوالييا .. تاني يوم في اتجاه المستشفي لاقيت يافطة كبيرة بخط احمر .. العمل هو الحل !