ابوك حيسيب البيت يا سلطان - الحلقة الاولي

قبل ما اتكلم عن عرض الكتاب الاقتصاد اللي معايا اللي اشبه بالاقتصاد المنزلي .. او كيفية ترشيد الاستهلاك وتقليل النفقات لاننا داخلين علي .. مش ريسيشان للاسف ، لأ .. انهيار اقتصادي .. واللي مش شايف كده او حيقول اني متشائمة يبقي ميعطلش نفسه في قراية السبل اللي طرحها الكتاب واللي ححاول اقرا الكتاب معاكو واذا افتكرت طريقة انا طبقتها او عملتها في حياتي سواء هنا او برة ححاول اطرحها برضة .. الكتاب ده مش حل سحري .. مش عصاية حضرب بيها الارض ححل مشكلة الانهيار او زيادة الاسعار .. الكتاب اسلوب حياة لترشيد الاستهلاك .. ببساطة قبل ما اقول اي حاجة عنه انا اخترت اسم الحلقات من مسرحية العيال كبرت .. طبعا كل واحد فينا سلطان في بيت اهله طالما ان فيه ممول موجود - سواء الاب او الام - واللي ينكر ان اهله بيساعدوه الايام دي عشان يكمل مصاريفه او مصاريف بيته يبقي بيضحك علي نفسه .. فطبعا الاب او الام عماد البيت بدون شك .. فاذا الاب او الام قرروا يسيبوا البيت بيبقي فيه انهيار في بناء العيلة .. انا قررت اشبه الجنيه المصري بالاب واللي بوجوده الواحد بيبقي سلطان .. مفيش حد مش بيحب الفلوس ، كلنا بنحبها وبنكره الفقر بدون شك او ضيق ذات اليد .. فلازم - حتي لو الرزق قليل - نعتبر - حتي ولو قيمة الجنيه قليلة - ان الجنيه ده له قيمة .. زي الاب في العيلة .. لازم نديله قيمة ونحفظ هيبته .. معلوماتي في الاقتصاد والادارة مش وحشة .. درست فيهم شوية بس طبعا مش حفتي .. فيه ناس اقوي مني بمراحل اصلا الواحد يخاف يعدي قودام مكاتبهم في كلية الاقتصاد او التجارة .. ناس علي مستوي عالي جدا من العلم والدراية بالشئون الاقتصادية .. انا هنا حتكلم علي قدي .. من واقع الكتاب اللي معايا ومن واقع تجربتي زي ما قلت .. بس قبل اي شئ .. الواحد لازم يتحلي بالايمان القوي لان ربنا قال كلمتين .. ١- الشيطان يعدكم الفقر .. وده شئ اكيد .. ٢- في السماء رزقكم وما توعدون ٣- وما تدري نفس ماذا تكسب غدا ٤- الله هو الرزاق ذو القوة المتين .. وفيه طبعا ايات واحاديث كتير عن الرزق .. يعني كفاية ان فيه حديث عن سيدنا محمد او مقولة لسيدنا علي مش قادرة افتكر .. المهم مضمونه ان الرزق نوعان .. رزق يسعي اليك ورزق تسعي انت اليه .. فكلنا بالبلدي كده بنجري علي رزقنا .. واللي ربنا بيبعته طالما حلال يبقي اكيد حيبارك فيه .. بس اهم حاجة ترشيد الاستهلاك وان انت اللي تتحكم في صرف القرش مش هو اللي يتحكم فيك .. ببساطة ربنا اختصر عدم زيادة الاستهلاك في كلمة .. ان المبذرين كانوا اخوان الشياطين .. دلوقتي مش عارفة ليه افتكرت اني مرة كنت - من سنين - بقلب في التليفزيون ولاقيت برنامج امريكي باين مش فاكرة بتاع اوبرا واللا مين .. جابوا فيه ستات بتعاني من زيادة الاستهلاك .. وقاموا كلهم طلعوا مقصات وقطعوا الكريديت كاردز بتوعهم قودامنا كلنا .. فانا ححاول هنا اني اطلع مقصي واقص النفقات الشديدة اللي كلنا ممكن نكون واقعين فيها للاسف .. بنشتري حاجات كتير بدون داعي وممكن نستعملها مرة واللا ٢ واركن .. وتلاقي تل الكراكيب في بيتك بقي ما شاء الله طوله طول عيل عنده ١٠ سنين .. متربي في البلكونة او المطبخ او في قوضتك .. طبعا انا الايام دي بفتكر سيدنا محمد كتير علي اصعدة كتير مش اقتصاديا بس .. افتكرته لما بيقول اننا من بعده حنلاقي اختلاف كتير ، فعلينا بكتاب الله وسنته .. وانا مؤمنة بالحديث ده جدا .. فطبعا في الاحداِث والظروف دي علينا كلنا اننا نتمسك بالدين بطريقة عملية تفيدنا في حياتنا .. طبعا احنا في زمن الماسك فيه علي دينه زي اللي قابض علي جمرة نار .. بس احنا بنحاول بكل طاقتنا نبقي كويسين .. يمكن ربنا يعتبرنا من الشهداء نظير اننا عشنا الزمن العجيب اللي احنا فيه ده .. زمن سيطرة رأس المال والامبريالية .. واللي يقول غير كده معلش يبقي مش قادر يدي معني للزمن اللي احنا فيه .. احنا مؤمنين بالله ومتوكلين عليه بس لازم نجتهد .. يعني مثلا ، احسن حاجة نبتدي نعملها واحنا داخلين علي الشتا اننا نساهم في التكافل الاجتماعي .. نجرد دولابنا .. ونطلع الشتوي او الصيفي اللي مش بيتلبس ونطلعه لله .. انا مش مكسوفة اني اقول ان عندي لبس ضاق علييا لما تخنت وان عندي بلوزة بقالها اكتر من ١٠ سنين في الدولاب قاعدالي كده كل ما افتحه الاقيها في وشي خلاص حتنطق وتقول لي والنبي سربيني .. اذا انت فكرت ان فيه حد بيأف أف من البرد وانت نايم ومتدفي ومعاك كوباية الشاي السخن او شوية شوربة وعليهم لامونة وبتدلع نفسك ومش لاقي حاجة تستر جسمه حتقوم تفز وتظبط دولابك وتدي اللي انت مش محتاجة للي محتاج .. يعني بالبلدي اللي مليان يكب علي الفاضي .. حتتخلص من دولابك القديم وفي نفس الوقت تكسب ثواب انك سترت واحد .. فانا من مشجعي التكافل الاجتماعي طبعا .. والاقربون اولي بالمعروف يعني الجار او العيلة .. وبعدين الجمعيات .. يعني حتي في التخلص من الهدوم لازم تدي اولويات .. زي في الشرا من السوبر ماركت لازم برضة اولويات واساسيات .. حنحاول نتحكم في استهلاكنا احنا .. نعمل الجزء اللي علينا .. والتحكم في التسعيرة ومطاردة الاحتكار نخليها للي بيعملوا رقابة عليها يقوموا بشغلهم .. لاني مش حقوم الصبح اجري وماما تسألني بتعملي ايه حقول لها بطارد الاحتكار يعني .. اللي اقدر عليه اني اكون انا صاحبة رأس المال وانا اللي اتحكم في استهلاكي .. وهي دي كانت اول فكرة في الكتاب .. انت صاحب قرارك عشان انت صاحب رأس المال .. لازم يكون عندك الولاء انك حتطبق الاليات المطروحة تباعا عشان تتحكم في معدل استهلاكك ..