lilac

اول مرة اتعرفت علي الزهرة دي كانت من كام اسبوع فاتوا .. مش عارفة موجودة الليلاك في مصر واللا لأ .. بس هي زهرة جميلة .. بس برضة زهرتي المفضلة هي الجاردينيا .. بحبها من زمان من ساعة ما اتعرفت عليها في معرض زهور الاورمان اللي بيتعمل كل سنة ..وهي اتعرفت علييا اكتر في اليابان كانت اكتر زهرة بتنمو علي النهر اللي جب بيتنا وكان اخويا بيقتفلي منها كتير وانا عيانة .. كانت بتسعدني ولسه بتسعدني بجمالها ولونها وريحتها ..بحب الورد اللي ليه ريحها مش بحب الصناعي او الورد اللي لونه حلو من غير ريحة .. ملهاش روح .. زي البني ادم اللي شكله حلو بس وتيجي تدور علي فكر او روح جواه تلاقيه خاوي وفاضي .. تخبط عليه تسمع صدي صوت الدق عليه .. فارغ وخاوي .. بكره انا النوعية دي .. المهم الليلاك دي اتعرفت عليها جديد .. ورقة عرض اولاد رجب وقعت في ايدي .. ٤ صابونات من تركيا بريحة الفواكة والورد ب ٥ جنية .. ماشي اروح اشوف واشوف بقية احتياجاتي بالمرة .. برضة البالانس شيت مصاحباني في عقلي .. بشوف العروض عشان بيبقي فيها تخفيضات .. بس بشوف حاجات مهمة .. ١- انا محتاجة الحاجة دي بجد حستعملها واللا بجيبها استخسار ؟؟ يعني بنفع المحل كأنه بتاع ابويا واللا حستعملها فعلا ٢- يا تري الكمية اللي حجيبها بتخفيض- وعادة مش تخفيض روعة يعني - متناسبة مع الميزانية ومع معدل استهلاكي ؟؟ ٣- يا تري ايه جودة المنتج ده ؟؟؟ ٤- تاريخ انتهاء الصلاحية وده مهم جدا جدا جدا .. بفضل أقلب في المنتج من فوق وتحت لحد ما ألاقي تاريخ الصلاحية .. زي آخر مرة عرض علبة ماكينتوش ب ٨٠ جنيه من ١٢٠ .. طبعا تخفيض حلو بالنسبة لطعم شوكولاتة من لندن روعة وبحبها من ايام الفراعنة تقريبا .. قلت ممكن اجيبها وتقعد معايا سنة .. يعني واحدة كل يوم في الدايت مش حتبوظ الدنيا .. يعني ممكن اكول النهاردة واحدة بطعم الفراولة وبكرة واحدة بطعم البرتقان واطلع وانزل السلم اكون كده حرقت سعراتها . ميزتها انها سعرات قليلة والطعم رائع .. انا مش بهتم دلوقتي بالكمية اكتر من اهتمامي بالطعم انه لازم يكون بيرضي ذوقي ويسعدني .. زمن الكميات المهولة خلاص توفي ..طلقته طلقة بالتلاتة من فترة مش كبيرة عشان مشروع الدايت اللي انا فيه ده .. المهم احلامي بالماكينتوش انها تقعد معايا سنة راحت علي صخرة تاريخ الصلاحية .. العلبة كيلو وتمنها ٨٠ من ١٢٠ بس حتخلص في اقل من شهرين .. قلت ده انا لو حتي فكرت في الانتحار بالشوكولاته مش حنتحر حتي بعلبة حتخلص في شهرين واكيد ابتدي طعمها يبقي مش طازة .. وكمان انا معنديش اطفال عشان يكلوها معايا .. حتي اطفالي اللي هما القطط اللي تحت البلكونة مشيوا .. مش عارفة راحوا فين مع عدد العمال والصنايعية اللي ابتدوا يشتغلوا في المبني القديم اللي بلكونتي بتطل عليه .. باين طفشوا .. القطط اللي حلتي طفشوا يا حوستي يامه .. بكرة يرجعوا علي الشتا وينونوا تحت البلكونة ويطفحوني النيسكافيه في عز البرد عشان انا بتدفي وهما بيأفأفوا من الجوع وادخل اجيب لهم اي حاجة ان شالله رز وملوخية .. انا بلوم عليهم بس حاجة .. انهم عامليم مسابقة في الخلفة يعني قطة تولد التانية تبقي حامل دي تولد التالتة تبقي حامل تاني .. لخبطوني والله .. وبعد ما يولدوا يجيبوا عيالهم اتفرج عليهم وابتدي اوكلهم مع ابوهم وامهم .. مزرعة تحت البلكونة لدرجة ان جاري اللي تحت لما ضاق بيه - مع انهم في حالهم بس باين عليه شراني - حاول يضرب عليهم مرة نار بخرطوش صيد يمام باين واللا ايه .. اتخضيت لما شفت البندقية طالعة من شباكه .. وكل شوية انا عندي فيلا في مش عارف فين .. طب ما تسيب هنا وتروح هنا يا باشا يعني واللا هو كلام منظرة .. انا عادة بتفاداه عشان عارفة لو قال كلمة لبط حرد عليه وانا حالفة اني أحلق لأ ي حد يقول اي كلام في اي حاجة .. عشان دماغي مش اكتر ..المهم جبت عرض الصابون ٢ بالشاي الاخضر و ٢بالليلاك .. كويسين بس من النوع اللي بيدوب علي حرف الحوض ..عايزة اشتري صبانة بدل اللي اتحرقت .. بنسي اشتريها كل شوية يا ريت افتكر لو نزلت السوق تاني .. نزلت جبت زبادي والجرايد ودورت علي بيبسي دايت لتر مش لاقية وسألت هما وقفوا خط الانتاج واللا ايه ؟ لاقيت دايت حجم صغير جبت اتنين تمنهم اكتر من تمن اللتر .. اه من اللؤم اللي انتوا فيه .. مش جايبين اللتر عشان تبيعوا منتج اصغر بسعر اعلي .. وتقولوا لي محدش بيتحكم في السوق ؟؟؟ ده فيه حيتان يا حبايبي والمستهلك اللي هو انا هو اللي بيشيل الليلة في الاخر .. ما علينا .. قضيت يوم الخميس احلي ٦ اكتوبر في الدنيا .. بنحتفل بيه من ايام الفراعنة تقريبا بس اول سنة السنة دي افرح اوي كده واحس اني بحب مصر بجنون .. حتي لما سيبتها وبعدت هي اللي كانت معايا ويتهيألي العيا اللي جالي جزء منه بعدي عنها .. ربنا يخليهالي ومشوفش فيها حاجة وحشة ابدا .. بحبها بجنون .. وفهمت ليه مدرس الفرنساوي كان بيعيط ايام ثانوي ان عقده خلص وخلاص راجع باريس .. قعدت اقول كتك خيبة بتعيط انك راجع فرنسا ؟ .. دلوقتي فهمت اوي .. بقالي اكتر من ١٠ سنين بفهم .. وايام يناير امي قعدت تقول لي سيبي مصر وسافري .. قلت لها مقدرش امشي دلوقتي .. بحبها وبموت فيها بجنون .. ايه يعني رزق بسيط .. بس هنا الاساس .. قطيعة تقطع قرف برة ونيلته وخراه .. احلي ٦ اكتوبر فعلا .. طيارات الحمد لله المرة دي مكسرتش حاجز الصوت زي في يناير .. ألوان في السما .. امي حلفت علييا اني منزلش التحرير قعدت في البيت واتفرجت علي الاحتفالات .. وبعد الضهر روحت ندوة الاسواني .. اللوا الطيار اللي اتكلم ، اتكلم بمنتهي الصدق .. كلام بسيط بس حلو اوي .. واتكلم عن زميله الطيار اللي عشان يدمر الهدف في الطلعة الجوية .. اضطر عشان يظبط احداثيات الطيران واصابة الهدف انه يفضل متحكم في الطيارة لحد اصابة الهدف بدون انه يطلع من الطيارة .. شاف منظر استشهاد زميله عن اختياره الحر في سبيل بلده .. وبعدين قعد يعيط .. انا كنت حالفة اني معيطش بس لاقيت نفسي متخيلة المشهد وصعوبة القرار اللي اتخذه الطيار لنفسه وان نفسه تهون في سبيل مصر .. مسكت نفسي بالعافية .. فيه شهدا وناس ابطال كتير في البلد دي وجنود مجهولة ياما بس محدش عارفهم .. اكيد معظم اهل الجنة من اهل مصر .. كويس اذا دخلت الجنة حلاقي ناس كتير ارغي معاهم .. ختمت اليوم باني عكيت في الحلويات والجمعة كذلك .. يعني يومين حلويات .. دناوة نفس .. مش عارفة حروح لدكتور الدايت يوم الحد بأنهي وش .. احط برقع بقي علي وشي عشان ما يهزقنيش .. مع انه طيب ومش بيتكلم بس بحس اني حمارة اني عكيت .. بس عكيت وانا مبسوطة ومعنديش احساس الذنب يعني .. بس دلوقتي طبعا جعانة جدا .. الحلويات اصلا بتجوعني اكتر .. فمضطرة اكول تونة بدون زيت ومعاها بيضة مسلوقة .. البروتين بيقفل الشهية وبيضيع الجوع .. بس بيض علي تونة بصراحة يعني مش قادرة اوصف .. يعني اللي بيشوف حد تخين في الشارع ويتريق عليه بصراحة بعتبره حيوان .. مش عارف ان ربنا خلقه بجسم مش بيزيد .. ومش عارف قد ايه التخين بيعاني عشان ينزل وزنه .. ناس بقر باين الواحد عايش في وسطهم .. والعجيب انك لو قلت ماشي علي دايت .. تلاقي كذا واحد بيشدك انك تعك .. مع انك لو سكت محدش حيغريك بجاتوه واللا مصاصة .. اه وبمناسبة المصاصة .. مصاصة تاتوه من احلي انواع المصاصات ف الدنيا ..اجدع من تشوبا تشابس .. وبخمسين قرش .. اخيرا فيه حاجة ب ٥٠ قرش في البلد دي ..وانا راجعة - وبالرغم من اني حالفة اني ما افكرش في المرض اللي فات وافتكر بس التحاليل اللي علييا الايام اللي جايية - لاقيت في وشي الراجل اللي بيسحب العينات من العيانين في البيوت .. افتكرت ايام ما كنت بطلبه ييجي وياخود ١٥ جنيه زيادة علي تكاليف التحليل عشان مكونتش بقدر انزل السلم من تسمم الدم والالتهاب الرئوي .. سبحان من رد علييا روحي مرة تانية ... عاوزة اقعد اكمل قراية كتاب عن تخفيض نفقاتك الشخصية وازاي تتحكم في الميزانية بتاعتك .. عشان الايام اللي جايية ربنا يستر علي الاقتصاد .. غالبا عندي سمعوا ان الاقتصاد مش تعبان عندنا في مصر عشان كده جابوا تورتة وايس كريم يوم ٦ اكتوبر .. طالما برة ميزانيتي يبقي اقتصادي منتعش واكلت طبعا منهم .. فعلا العيشة المشتركة بتقلل النفقات .. ده انا ممكن اتجوز عشان المبدأ ده بس .. جواز من اقل تقليل النفقات ..