و الحلو ..جيليه

وصلتنى اعداد مهولة من التليفونات
كلهم على كلمة واحدة : تحفة تجنن
نفس الكلمة اللى كنت بسمعها لما بقفل الجرح تجميل
فقت من ذكريات العمليات و ريحة البنج اللى بتنيمنى لما بكون واقفة بالريتراكتور
على راس العيان
على سؤالى المباغت الى المتصلة:
مين اللى تجنن يا طنط؟
المربة تجنن ..فراولة تحفة
احنا عدينا خلاص يا ريهام
مرسى يا طنط
و فى سرى بقول امال لو دقتى الكشرى بتاعى حتقولى ايه
و الله انا اتعاملت مع موضوع مربة الفراولة بموضوعية
يعنى جبتها و طلع طعمها وحش ..شغل صوبات و الكلام ده
مش طبيعى يعنى و منها للارض و السما
قمت جبتها و نضفتها و حطيت عليها سكر و سبتها شوية
كام ساعة كده و حطيتها على النار مع التقليب
و لما تخنت فى ايدى طفيت عليها و عصرت لمونة
مش اختراع يعنى
حاجة مش صعبة و فى نفس الوقت مكانش فيه اهدار للموارد
مخرجتش الفراولة فى الاهلاك يعنى
واستثمرت فيها
و نجحت
و الله بفكر اسوق بقى
كشرى الدكتورة ريهام
و مربة رومة
و اهو كله حلو
و بيزنس شريف
يعنى انتاج و تسويق فى حلة واحدة