بعد مساء الخير

اتصلت بييا زميلتى الانتيم و قعدنا نتكلم على الكلام العادى و الوكسة بتاعتنا و محاولاتى المستميتة لتحسين ظروفى كدكتور بدون فقدان العقل ..شكوى من هنا على نكتة صايعة من هنا على مين حلل بول على وظايف مين على كارديك ارست و ما هى السوبرا فنتريكولر و الفى تاك و مين معاه عربية شكلها اية على عريس..الجديد (سلامات يا عريسنا بس كمل بقى معاها دماغنا بقى)على فاتورة الموبايل على شامبو ايه على ..حتولد امتى ...كلت دماغى بس والله بحبها..فضلت تلف و تدور فى الكلام و انا وراها لحد ما زنقتها فى الحيطة:ها يا بنتى جبتى جون وللا لسه؟ للاسف دى مش بتاعت اجوان
و عشان محدش يفهمنى غلط المقصود بالجون هنا الوقوف فى وجه غباء اتخن تخين فى بر المستشفى دى
يا بنتى مش قلنا انها فيوكروموسايتوما؟ ألطم؟ الولية كدة حتموت
و انا اعمل ايه ؟ كل ما اقولهم على الفيوكرومو يضحكوا علييا
يا بنتى و الله دا انا لو اتليفت بورقة التحاليل و بالسى تى حشوف انها فيوكرومو
بس هما بيعلجوها كأنها مجرد ضغط بس و كتبين ليها ادوية كدة هبلة
طيب يعنى من الاخر جبتى جون؟ دى لازم لها تحضير كويس قبل العملية كمان
اه جبت
والنبى؟
اه و الله حولتها على واحد بيفهم
ايوه كده يا لولو طولتى رقبتنا
اصحابى من الدكاترة اللى على القهوة : بعد مساء الخير
و النبى عشان خاطر ربنا ..ممكن نقرا شوية ؟
ارحمونى شوية من الحالات الترمينال اللى بتجيلى ..كفاية علييا الحوادث بس
و كفاية بقى ان العيان نفتح بطنه نلقيها معشقة فيبرس تيشو من كترة التيومر اللى فيها
و كفاية العيان ييجى فى مرحلة ما يقومش منها من على الترابيزة بتاعتى
وبلاش سفسطة و استعراض عضلات و يا ريت نشتغل كتيم واحد