تعريفات -تابع

العيان ذو الشخصية البهيمية: هو العيان اللى مهما حلفتله بايمانات المسلمين كلهم فى مشارق الارض ومغاربها ان اللى انت كاتبهوله لازم يمشى عليه بدل ما الجرح يضرب..يلف عليه اسبوع ويجيلك جارحه برضة ضارب وتلبس انت فى حالة تسمم فى الدم
العيان اللى على البلاج:هو العيان اللى تقوله راسك كده يا حبيبى على السرير ..يقوم مريح على جنبه الشمال ويحط ايده تحت خده ويتفرج على الطوارئ كأنها بلاج فى ميدان العباسية
العيان ذو الشخصيتين: هو العيان اللى يجيلك لابس نضارة ..ياخودله لفة فى الطوارئ ويرجعلك من غيرها..تقوم تسأله انت مين ؟ يقوم قايلك انا..تقوم تقوله والله من غير النضارة ما عرفتكش يقوم وشه يحمر ويتكسف ظانا ظن السوء انك بتعاكسه وانت يا حرام مش شايف قودامك عشرة سانتى وغالبا النضارة بتاعته فى جيبك
العيان اللى كما ظلك : هو العيان اللى يمشى وراك فى اى حتة فى المخروية اللى انت شغال فيهاومهما تحاول تسربه يلف ويرجعلك لأ وكمان تجيله الجرأة انه يكسر عليك وانت ماشى فى طرقة المستشفى
العيان الاسبور: هو العيان اللى يستأذن من حضرتك عشان يروح البيت يغير هدومه ويرجعلك عشان تخيطه وهو شكله حلو
العيان البلطجى: هو اللى يجيلك بيسب ويلعن فى اللى اداله شومة على راسه ..وبيحلفلك انه راح يديله واحدة فى الشارع يجيبهولك هنا تصلحه..وانت بتقول له بلاش الاذية دى ..وانت بتقول فى سرك أه يا شمحطجية يا ولاد الوس...الهى تعدموا عافيتكوا
العيان أبو ايد بتنزف: هو العيان اللى بتطلبله اكس راى على ايده وانت بتتمنى من كل قلبك ان عضم ايده يكون فيه كسر عشان العظام تشتغله بدالك عشان مفيكش نفس اخر النبتشية..يقوم
يطلع فيه كسر فعلا..شوفت النصيب؟
كوباية الشاى : هى الكوباية اليتيمة اللى بيشترك فيها نبتشى الجراحة ونبتشى العضم وفى الاخر العيان بتاعكواييجى يقولكوا لو سمحتم و يقوم شاربها كلها