Rush Hour
انا من يوم الاربع اللى فات والواحد فى دوامة..انا بسميها رش أور عشان الهيصة والزحمة الكتير اللى انا فيها..يوم الاربع الصراحة كنت فى هايبر وان مع اخواتى اللى جم من السفر اسبوعين طيارى وباى باى..لف فى السوبر ماركت وبعدين فى منطقة المصانع لما عينى اتأورت من الحر والشمس..تانى يوم الخميس كان عندى شيفت طوارئ اتناشر ساعة-حسبى الله ونعم الوكيل-وبعدين جالى تليفون عاوزين يروحوا الصوت والضوء مع صفوان..ماشى ..رجعت البيت ولبست شتوى عشان سفح الهرم تلج ..وبرغم انى مكنتش شايفة قودامى عشان قعدت طول الشيفت بحاول اخلص كتاب عايزة اتجوز بتاع غادة واللى التمريض كان بيقراه معايا خلسة..مع وجود اسئلة من نوعية هو حضرتك متجوزة ؟ هو الكتاب ده عن كيفية التعامل مع الخطيب ؟ اصل انا خطيبى مورينى الويل..مش بارود غير انه كتاب كوميدى..وما بين جملة والتانية اخيط عيان ..نعمل اشعة..ندخل خراج ونفتحة..أهو زى ما ترزق..على رأى زميلى اللى اختفى الاسبوع ده فى ظروف غامضة..الجمعة برضة كان شرحه..نبتشية طويلة..حسبى الله ونعم الوكيل تانى ..مع قاعدة على كوبرى الطوارئ حوالى ساعتين بنتكلم فى موضوع يتيم قتل بحثا و الله يحرقه: نروح القصر شوية ونسيب هنا واللا نسيب القصر ونقعد هنا ؟..وطبعا ما وصلناش فى المباحثات لحاجة خاصة وان زميلى اللى فتح الحديث راح يجيب كارت موبايل واختفى والتانى خلص السيجارة ومشى وانا قعدت ابحلق فى الستات الحلوين اللى متزوقين وخارجين من العربية اخر موديل وانا بستغرب: هما الحلوين دول بيعيوا برضة ؟..أصل انا كل عيانينى عينة ما يعلم بيها اللا ربنا..مشيت وانا بفكر انى عمرى ما كونت فيميل رقيقة..حاولت افتكر امتى كنت موززة مفتكرتش ..المهم روحت البيت واستنيت يمكن اخويا ييجى من الخروجة بتاعت الفرجة على العروسة-جواز صالونات يعنى-اتأخروا..أغمى علييا على السرير...لما فقت تانى يوم وقررت البلطجة وماروحش الشغل عشان معدش فييا نفس قلت اسأله لقيته ضارب بوز ومش بيكلم حد..قعدت اضحك عشان انا شكلى بيبقى كده لما برجع من العزومة على عريس..تانى يوم سافرت واخدت الحر كله ..يوم الاتنين كنت خلاص والله جبت اخرى ومفياش طاقة خالص..قمت برضة زوغت ونمت كتير مع اخدان فيتامينات كتير لما ريحة الحمام بتتقلب الى ريحة صيدلية لما بعمل بتاع..طبعا منستش انى اشرب طن ميه عشان دايما نقص السوايل والاملاح بيكون سبب رئيسى فى الاجهاد..خلصت قصة صغيرة فى نبتشية الجمعة خصوصا وانى قضيتها على الكوبرى ما بين كوباية الشاى وكوباية الشاى ابو نعناع وجرنان الاخبار..على كام حادثة على رغى مع زمايلى ..نبتشية بلاج يعنى..الحمد
لله انها عدت اوك..المهم عدى التلات فى عيادة الغيار زى ما عدى وادينى النهاردة الاربع مع الحر والمترو حاسسة انى مفيصة لسه ..ولسه عندى شغل كمان بكرة..
posted by reham @ 12:46 PM
3 Comments:
وحشتنى تفاصيلك و تعاطفى الشديد معاها و احيانا حسدى للزنقة و الحياة المزدحمة دى .... بس بردو لسة انتى مش فى مود الكتابة اوى ... سلق بيض ... ربنا معاكى يا دكتور يا رب ... يوم الاربع دا كان يوم غريب اصلا و عملت فيه مييت مشوار و مواقف محرجة ضحكت الشارع عليا و نور يتقطع افلام رعب .. من الاخر ... يوم غريب
ربنا معاكى
الاستاذه الفليسوفة الطبيبة
بعد التحية
أعتقد أن سر روعة وجمال اسلوبك يكمن فى " البساطة والعفوية" ؛ ودائماً أفكارك مثل ( الزهور البرية ) ؛ التى لم تمتد إليها يد بشرية.
أنا أسعد دائماً بقراءة ما تكتبين لأن الكتابة عند حضرتك ليست قرار ؛ ولكنها ترجمة وتعبير عن مشاعر وأفكار ؛ تتدفق فى عفوية ) دون تجميل أو تنميق أو الوان اصطناعية ) .
فليحفظكى الله وشكراً جزيلاً لتلك الشفافية التى تعيد الينا الشعور بالصدق وسط هذا الكم الهائل من التكلُف والتجمُل وارتداء الأقنعة
نبيل
hend:معلش الاربع كده بيعمل قافلة دايما ممكن توصل للكهربا كمان...ما تحسديش حالى يا بنتى بكرة لما تشتغلى ويبقى كمان لسه بتدرسى حتبقى كده واكتر من كده كمان..متستعجليش يا هنود وعيشى حياتك على حسب سنك(نصيحة لوجه الله )
..سلق البيض الايام دى كتير معلش نظرا ان دماغى والله فيها دوشة يا ما ..انا واخده فى جنابى وساكتة والله ربنا يقومنا من قطمة الوسط اللى احنا فيها الايام دى على خير
nabil : والله انا بقول اللى يجى على دماغى عشان بس افرغ الشحنة بدل ما انفجر والله..اذا كان ده بيعجبكوا كده يبقى الحمد لله
Post a Comment
<< Home