مسلسل نور

انا كنت بتابع يا عيال مسلسل اسمه نور الصباح..مش هو؟ ده تركى ؟..طيب..الظاهر كل نصيب المصريين جاى من اسيا..والله اسيا دى موززة كبيرة وادينا حنتبارك بكرة على خيرة الله يوم تمانية فى شهر تمانية الساعة تمانية بالبتاع بتاع بكين..أوعدنا يا رب..المهم مسلسل نور ده فوجئت بهجوم العيال علييا انى مش بشوفه..يا ابنى انا بعد ما شفت الرقة بتاعت مسلسلات كوريا الرومانسية خلاص دماغى ظبطت عليها..المهم كنت سهرانة ولقيت على ام بى سى فور مسلسل نور..الحلقة مية تمانية وعشرين..ده انتوا فاضيين بقى ؟ انا اخرى 30 حلقة ودماغى..لقيتهم فى العربية بينزفوا كاتشب وبيعزموا على بعض انهم ينزلوا قبل ما العربية تفرقع..روحت مقدرتش على الموحن ده وحولت على هانيبال رايزينج..أينعم انا بسمع مقدمة المسلسل الموسيقية دلوقتى وانا بكتب بس ده عشان بحب عزف القانون على الالات الوترية كلها..يعنى اللى فيها اوتار..القانون..العود..الجيتار..البيانو كمان بموت فيه..قمت من على الكنبة ولقيت على الفيس بووك واحدة من صوحابى من ايام الهجرة بس ما رديتش علييا ..احنا بجد مفتقدين الاحساس الحقيقى فى كل حاجة..مش انا بقول دايما اللى على الكورنيش معظمهم ان ما كانش كلهم بيضحكوا على بعض..واهى كام بوسة على تقفيشة والسلام؟..ده غلط ونوع من السرقةوهباب وتفاصيل كتير للموضوع ده..اقل حاجة اقدر اقولها ان الراجل لو بيحب بجد حيحترم الست اللى معاه ومش حيقفش كده عينى عينك فى الولية..ما علينا بلا نيلة..عدم الصدق فى المشاعر يتفاتلها بلاد..ما زال مسلسل هجرة زمايلى مستمر ..كله بينط على اسيا..شوية على امريكا الشمالية..عمل المعادلات فى الطب برضة شوطة وجاية فى العيال..لسه برضة بعانى من عدم التركيز...اشتريت جبنة على اساس انها ملح خفيف..وباكول منها على هذا الاساس..ماما لسه قايلالى امبارح بقى اقولك تجيبى ملح خفيف تجيبى اسطمبولى ؟...طب والله شفتها ملح خفيف..روحت للراجل بتاع التفاح الاخضر ابو تفاحة ب4 جنية..الظاهر اتقفش ..ما لاقيتوش ولاقيت دكانه جاى فوقه تحته..ايه اللى حصل ؟ بصراحة مسألتش بتاع البيض اللى جمبة..بدل ما يقوللى حاجة تطلع بيض..المهم نفسى اعرف عمى مزوغ فين ؟..عمتى عجبتها ألكس ولابده هناك..الاستشارى بتاعى من ساعة ما رجع من المصيف اللى حس فيه انه بنى ادم من حقه يتنفس ويعيش-اخيرا حس بكلامى-وشاف الناس اللى عايشة بجد وفهم اننا كدكاترة مدفونين بالحيا..راجع والله فى اكتئاب..أمى مش هاممها حاجة فى الدنيا والهيصة اللى انا فيها اللا انى لازم اجيبلها كوزبرة..مش مهم حالى المدوحس ولا الورق اللى ملخومة فيه..أهم حاجة يا ريهام جبتى الكوزبرة واللا لأ؟ كل شوية تقوللى وانسى..واخيرا جبتها وجبت نص عين جمل بقشره وشوية لوبيا على فاصوليا..الراجل بيقوللى عاوزة قد ايه يا هانم؟..ايه هانم دى...فاكرنى حشيل بقى..اسأله بكام الكيلو وبعدين اتنحله..واقوله ربع أو تمن كيلو..يقوم يبصلى بقرف..يمكن وانا بحاسب يقوللى هاتى 13 جنية يا ولية..الجزمة والصندل اتقطعوا فى يوم واحد..عاوزة اتطقم بقى..ملقيتش ملابس داخلية كالعادة عدلة فى الدولاب قمت قلت اتشبرق بال50 جنية الزيادة فى المرتب..جبت طقم فوق بس طقم اللى تحت لسه..يمكن على الشهر اللى جاى..مشروع شرا الجزمة مش عارفة مين حينفذه خصوصا وانى اذا غطيت مصاريف مترو الشهر ده يبقى خير وبركة..انتهزت فرصة ان الدكتور المسؤل عن الاطباء غاطس فى المصيف-بصراحة مش عارفة ايه نظام المصيف السنة دى مع الناس؟ ناس تسافر وترجع مكتأبة وناس بنتها ماتت فى حادثة مرسى مطروح وناس راجهة متخانقة وناس راجعة عايزة ترجع تانى وناس راحت وما رجعتش-والمهم روحت مضيت اجازة يومين اعتيادى من القائم بأعماله ..راجل طيب ما عصلجش معايا الحمد لله ولا قاللى حاجة العمل وحاجة البتاع ...المستشفى فيها اجتماعات كتير مش عارفة ليه ونظام دورات تدريبية..طب اسأل على ايه بالظبط..يقولولى صحة المرأة وبتاع ..انا مش ناقصة فقعة ..معنديش فكرة عن مسلسلات رمضان ولا حاجة..الله أعلم حعرف اتابع واللا لأ..ربنا يجيبه بالسلامة ويكون شهر خفيف والصيام فيه يبقى هادى..الايام دى نفسى اعرف الاقى وقت اروح ارفه عن نفسى شوية..اروح اسكندرية يوم وارجع حيبقى مش لطيف عشان الزحمة والجو الولعة والرطوبة الجامدة..بس بسمع اغانى حلوة فى الاف ام..ايوة انت مصطفى قمر..مستنى ايه حمادة هلال وفيه واحد بيقول يا خسارتك فى الليالى حلوة جدا..اسمه عبد الفتاح درينى..بس جامد..يا رب يعدى الصيف ده على خير وياخدوا قرار ..العيال حيدخلوا المدارس امتى ؟