ابن الجيران-بارت دو

من وانا بيبى صغير كنت كلبوظة وبتشال كتير وكل شقق العمارة كانت بتبوس فييا خصوصا اللى فى الدور اللى قودامى ..بناتهم كانوا معايا فى المدرسة وكانوا بيشيلونى ويطلعونى اتوبيس المدرسة ويتأكدوا ان كل حاجة تمام معايا..احساس بالامومة ناحيتى ..كانوا بيسلفونى العرايس ألعب بيها وهما مش عارفين انى اصلا..انى اصلا بحب قوى العربيات والتليفون والمسدسات(كل شوية تسألونى ..ادينى رديت اهوه) ..ما علينا دى حدوتة تانية..المهم كبرنا شوية ووصلت لسنة خامسة ابتدائى السنة اللى كل الاطفال بتوضح الروئية للحياة بالنسبة ليهم..انا الصراحة رؤيتى خرجت برة العمارة من اساسه..بحب شجر المانجة اللى فى الشارع اعمل ايه؟ شجرة من هنا حاضنة صاحبتها من الناحية التانية وعاملين ضليلة بطول الشارع على الصفين..مع التلوث كله اختفى طبعا مفيش اللا كام زعزوعة وكل الفيلل اتهدوا الا كام واحدة..الفيللا اللى على الناصية دى كانت ساحبة مننا كهربة كتير قوى نقعد نفكر يا ترى حنهز الشجرة بتاعة المانجة من بره ؟ واللا حنرمى طوب عليها ؟واللا حد ينط السور ويلم المانجة من الارض وياخد اكبر نصيب فينا ؟ كنا مساريع على المانجة اللى مكانتش بتنقطع من قوضتنا الصراحة ومعظم المانجة كمان كان اخضر بس كننا بنلمها الصراحة مش عارفة ليه ..كانت بتضحكنا الحاجات دى ..لحد فى يوم ما جه اتنكرنا فى لبس جلاليب وجايين نلم المانجة قامت واحدة شحاتة طلعت لنا وقالت امشى ياد منك ليه من هنا دى منطقتى..وبكده بعدنا عن الفيللا لحد دلوقتى ساعات بشوف المانجة واقعة فى الشارع ممكن ابص لها واضحك او بخدها لو كويسة..البنت بتاعة الجرايد هى اللى ماشية على المسيرة الصراحة بتحدف الشجر بالطوب لسه ..غريبة ان اهل الفيللا دى عمرهم ما اشتكوا ولا انا عمرى شفتهم ..الفيللا ساكتة وكل اللى حواليينا بيتغير فى المنطقة تغيير جذرى بلا رجعة اللا دى ..موقعها حتة موقع تجيب ملايين والله مش عارفة ايه الحدوتة بتاعتها ؟اللى ساكنها قطط بس دلوقتى ..مرة قطة منهم كانت سرحانة وواقفة على السور مدييا ضهرها للشارع ومش حاسة انى ماشية وراها امت زغزغتها فى ديلها اتسرعت ونطت فى السما وقعدت اضحك..دى كانت اخر علاقتى بالفيللا دى من كام شهر غير كده مفيش اللا ناس عاملة بيبى جنب سورها والزبالين بيجمعوا الزبالة عندها والقطط طبعا وأزايز دوا الكحة المشروبة بكمية بالرغم من انها على الجدول ..العمارة اللى جنبها فيها ناس شكلهم فى حالهم اللا واحدة دايما حسها طاير لدرجة مرة افتكرت ان فى مصيبة وقعدت تصرخ وبعدين سكتت انا قلت جوزها قتلها ..ماما قالتلى مفيش حد اتقتل عندنا فى الشارع ..مفيش ؟ طيب اسمعى دى ..انا كنت بعدى جنب الناصية واستنى اتوبيس المدرسة ..زمان كان ممكن تعرف الناس وتعرف حاجاتها وتقدر تميز بين الوحش عشان كان واضح قوى والكويس عشان كان واضح قوى برضه ..كنت تقريبا عارفة كل عربيات الشارع..اللا الريجاتا دى اللى جت مرة واحدة من المجهول وركنت على الناصية ..ريحتها وحشة وشكلها عجيب وكان فيه نقطة دم على الباب اللى ورا السواق..اقولهم نبلغ القسم عن العربية المركونة المريبة دى يقولولى بطللى تقرى رجل المستحيل وفلاش ومغامرات ميكى وبندق..حاضر يا ماما..رجعت مرة من المدرسة لقيت هيصة فى الشارع وبوليس وفيلم اتاريها اتعمل بيها جريمة واترمت فى شارعنا وصاحبها بيدور عليها بقاله شهر..حصلت جريمة اهيه..ها ؟تسمعوا جريمة تانية؟اصل ظلم الانسان لاخيه الانسان موجود لدرجة ان بيبى صغير خنقوه فى الشارع اللى ورانا عشان 500 جنية كان ساكن مع اهله فى العمارة اللى بركن تحتها ..كانت جريمة جامدة جدا شقة اجانب والولد البيبى مش مصرى وكان مع الشغالة بتاعته قامت فتحت الباب لما رن الجرس دخل عليها الراجل قتلها وخنق البيبى (طب ليه؟)ودعبس فى الشقة مكانش فيها اللا ال500 دول ..طب ليه قتل البيبى اللى لا حول له ولا قوة ؟معرفش بس سمعت انه خنقه غلطة يعنى..لفه فى ملاية السرير عشان يبطل عياط قام اتخنق والحرامى كان بيمر بأزمة مالية عشان كده سرق وقتل وخد اعدام..الازمة المالية كانت عشان يكمل اقساط الجواز..ينعل ابو الجواز يا اخى..المهم الست اللى بتصوت دى متقتلتش بالعكس تنضرب العلقة دى تانى يوم تلاقيها مفرفشة فى الشارع كدة ومليانة حيوية ونشاط.(اول مرة اعرف حاجات عن السادية والماسوخية )المهم من الاخر الضرب ده كان الفور بلاى قبل السيكوسيكو(ناس عجيبة..ده الانتيميسى المصرى واللا ايه؟وما دام دكر كده ايه اعلانات الفياجرا دى كلها ؟خصوصا الاعلان بتاع الراجل اللى واقف وبنفخ قوى فى البوق ده انا لما شفته على صيدلية فى وسط البلد مقدرتش امسك نفسى من الضحك والله ..افتكرت امتحان الشفوى فى السيكسولوجى..يا فضحتى )..الست تمشى فى الشارع بكل كرامة ولا كأن فى حاجة ..سبع البرمبة معرفش شكله بس العمارة دى اهتمينا بيها لما عرفنا ان فى الرووف بيربوا كلاب وولف تجنن كنا بنحبوهم قوى ..اول مرة شفتهم لما طلعنا على السقف بنعدل الايريال ونسأل ها لسه ؟يقوم الكلب يهوهو فنعللى صوتنا لسه الصورة يا ماما ؟الكلب يهوهو اكتر ..مش فاكرة اسم الكلب ولولا ماما مش عاوزة كلاب والله كنت ربيت واحد فى المنور ..ما علينا فى بقى واحد فى الشارع مجرد بس يلمح اى عربية بتفكر تنحرف ناحية الجراج بتاعه يقوم نازل ورادح وكاتب على الجراج ممنوع يا حمار(يافطة كبيرة ملفتة..الناس عرفت انه ممنوع الركنة بس مش ممنوع البيبى قاموا خاللو المكان كله صننة لا مؤاخذة ريحة الامونيا بتاعة الانسان من انيل ما يكون الله يكون فى عون اللى عندهم فشل كلوى مزمن ..الحاجة دى جننت الراجل ) وكل شوية انزل الشارع الاقيه بيتخانق على اى حاجة هبلة ..خناقة كبيرة(سترس برضة؟ اشك)المهم هوب..الراجل مات واستريحنا من دوشته بس ساعات بنفتقده..اللى كان بقى ميحلالوش الصهللة اللا بعد نص الليل بواب فى فيللا فى الشارع..والله يفضل يغنى طول الليل ويضحاااااااااك قوى قوى..افتكرته عفريت وانا صغيرة اتاريه البواب ده كان بيضرب حاجات كده وبيشرب كمان ..كنت بشوف أزايز منقوع البراطيش على ادوية الكحة مترمية جنب الشجرة كل يوم وانا مستنية الاوتوبيس..كبده اتهرى اكيد واكيد هو السبب فى حططان ادوية الكحة على الجدول (مرة واحد جه المستشفى بيحلفنا بكل الايمانات اننا نكتبله ازايز دوا..ازايز؟ اه..كام يا حبيبى ؟10..على طول : ألووالقسم ؟ كده خبط لزق معدش فييا نفس للهطل ده ..يقوم الواد يطلع يجرى)..على عكس البواب ده كان جالنا بعد ما أم سحلول ما مشيت بواب مشفتش اطيب منه ولا حد عنده امانة وضمير زييه وكان صوته جميل فى الادان وهادى وبيعمل شغلة بضمير وكل السكان عندنا اعصابهم هديت والله ..طفشوه فى الاخر الله يحرقهم وجابولنا واحد ينطبق عليه كل الامثال المصرية الصميمة التى تصل الى مسامعنا من ايام الفراعنة..شارعنا من الاخر متعدد الجنسيات وكثير المواهب ..ازاى ؟ المرة اللى جاية بقى باذن الله وميقطع ليناش عادة