خد أحلى كلام من العيان

انا بحبك قوى يا دكتورة انا بحبكوا اوى هنا حقكوا علييا انا غلطان محدش يزعل منى انا اسف حقكوا علييا-عيان دخل فى سيكوزيز من الرعاية بنطلعه فوق فى الادوار عشان يهدى شوية من الموت اللى حواليه
انا مش خايف من الموت انا شفته قيل كده-طيب نام بقى بدل منيمك
مش عارف انا بحب اجى المستشفى هنا كتير وببقى مبسوط-واحد عايش لوحده
ماما سكتت ليه ؟مع نظرات بريئة فيها دموع-قلبى بيتقطع اقوله ايه ده ؟
ممكن اشرب سجارة ؟-عيان قلب
كان نفسه فى الولد وادينى جبتهوله-ست قبل ما تتحط على جهاز تنفس صناعى وبعدين تموت من مشاكل الولادة
مش عايز اموت مش عايز اموت مش عايز اموت-يا سيدى انت حتموتنى انا كده اهدى شوية-مجرد تركيب كانيولا عشان محلول ملح بس
اه ه ه ه ه ه ه ه ه ه ه ه ه ه ه ه ه ه ه ه -مجرد شكة دبوس-واحد ممرقع
انا لما اخرج من هنا حعمل كذا وكذا وكذا اللى كان نفسى فيه-مش بيخرج
انا مر علييا الدكتور فلان من مستشفى كذا والدكتور علان من مركز كذا وهنا قالوللى كذا وصاحبى قاللى كذا وطلبت استشارة كذا....-عيان مليون ايد اتمدت فيه -مش بيقوم منها
عيان يقلعلك ملط ويتمشى فى الطرقة ومحدش قادر على قوته-عيان عامل عملية فى المخ ولسه فايق -مش كلهم
عيان يدخل فى كذا أرست ييجى 35 مرة أرست فى خلال 10 ايام ولما تاخد قرار انك تسيبه -دى ان ار- دو نت ريساسيتيت-يقوم يصعب عليك وترجعه بدى سى واحدة وبعد كدة نفسه يتظبت ووظايفه تتحسن ويفوق ويتكلم ويروح لاهله ويتجوز ويخلف-معجزة من الله سبحانه
انا ما يمشيش معايا شغل الشر....ده ولا شغل المن..ة ده ..انا مش قادر استحمل اللف اكتر من كده فى الاسعاف على مستشفى-عيان ملوش مكان وبندورلة على مكان وبنلف بيه بعربية الاسعاف
عاوز ...عاوز..كوببببباية ميييه-بيموت من نزيف داخلى نتيجة حادثة كبيرة ومتلحقش تعملله حاجة وبقى اى عيان فى كارثة يقوللى كده وانا بشتغل عليه بلا استثناء بيدخل فى ارست ايريفرسابل بدون رجعة
توأمه مات-ام بتقوللى مأساة طالب هندسة كان مع توأمه فى العربية عملوا حادثة واحد مات والتانى فى الرعاية
انا والله حاخد بتارى منكم-واحد عيان ضلوعه اتكسرت وهو فى الارست وبنشتغل عليه وبيحاول يرد الجميل بعد ما رجع
انا حقتلكم وبيجرى ورانا مع تكسير لباب الرعاية وازاز الطوارئ-واحد جايبلنا عيان تبعه كان ميت اصلا ساعة ما استقبلناه
حطونى على الجهاز مش قادر اه ه حطونى على الجهاز ابوس اديكوا ومستعد امضى على اى موافقة لاجراء اى حاجة طبية-عيان مش عارف ياخد نفسه وبنديله فرصة على النيبولايزرشوية مع حاجات فى الوريد وبنحضر ماسل ريلاكسنت وبنجيبله الحهاز اللى عاوزه :جهاز التنفس الصناعى
دى صور ولادى حلوين مش كدة؟معلش حطولى الصورة جنبى على الكومودينو مش قادرة اخليهم يشفونى وانا كده-حالة ذئبة حمراء -مرحلة نهائية-وفاة جنب الصورة-العمر 31 سنة
شاب زى الورد مبتسم اوى ونور طالع من ملامحه:انا محسن يا دكتورة مش فاكرانى ؟
لا والله انا معرفش ناس فيهم نور ربنا واضح اوى كده
انا محسن اللى حضرتك حطيتينى على الجهاز..سرير 7 فى الباطنة..بتاع العضلات-حالة ماياثينيا جرافيز
حطيته على الجهاز ولما نفسه اتعدل وعمل فصل بلازما اتصاحبنا على بعض بلغة الاشارة وبعد ما خف جه يسلم علينا
انا احمد..مين احمد ؟طالب الهندسة اللى جيت فى الحدثة والتوأم بتاعى مات -اللهم صلى على النبى خف من الغيبوبة العميقة وفاق ولحق المذاكرة بتاعته وجاى يقوللنا انه نجح وطلع من الاوائل
كفاية ابرة فى بطنى بقى تعبت خلاص-عيان بنعمله بزل استسقا عشان كبد او سرطان فى البطن
يا ولاد الكلب المرة بنت الشر...والواد الخ..كلهم علييا وانا ايه يعنى ع..قصادكم؟يا ولاد اللى واللى واللى -عيان كبد فى اوائل مرحلة الغيبوبة مع العلم انه لما بيفوق بيبقى فيه من صفات الادب والخجل انك تحس انك مش متربى
والله انا اسف متزعليش منى ولادى قالولى اللى قلته انتى زى بنتى والله مكنت حاسس-انا عارفة يا حج ولا تزعل نفسك-نفس عيان الكبد بتاع الغيبوبة لما يفوق بالادوية وغسيل قولون متين
انا عاوز مدير المستشفى-اى حد عموما
حدخلله -بنت عندها 17 سنة داخله لجوزها اللى عنده 50 سنة
ممكن اطلع اكول برة واجى ؟- عاوز اذن بساعتين عشان قرب يرمى نفسه من الشباك
على حرف الشباك:حرمى نفسى والله لو حد قربللى-عيان منفسن شوية من عيلته
اه يا ربى ده ابنى الوحيد الولد الوحيد يا رب-اب شايل ابنه بعد ما دخل فى ارست ومات وجاى يخده
كل ده من قرش بلعته غلط اه يا ربى ريحنى-بنت 7 سنين بتتعذب من توابع شيل القرش بالمنظار كان عندها تهتك فى المرئ وفاتح على الرئة وداخلة فى سبتيسيميا اى تسمم دم 7 سنين وبتطلب الموت اللى بقى زى الرحمة لييها
انا عاوز بابا-ولد صغير قبل ما يدخل فى ارست ويموت
حموت والله يا بنتى -بطن قد كده فيها جرح كانت عامله مرارة على المفتوح البطن محجرة والعيانة سخنة وريحتها امونيا ولونها اصفر الجرح جايب صديد اصفر على اخضر ..لبست الماكينتوش 2 مش واحد والماسك والبوت و النضارة ويا انا يا الجرح ابن الكلب ده..دبت مشرط على ارترى فورسبس وتحت رجلين الست طشت مليته مرتين على الاخر صديد بعصر فى الجرح وبدخل ايدى من جوه الحمد لله انه تحت الجلد الصديد بس مش فاتح على البطن ..غسلت بسالاين وعلقت محاليل ومضاد حيوى ونضفت بميه اوكسوجين لازم تفور جوه الجرح كذا مرة-شميت ريحة الجرح بعد كده ..فلة..الحمد لله كده البكتريا بنت الكلب ماتت مبدئيا..خيط على ابرة قاطعة مع بنج موضعى اخيط شوية بقى فى الجرح واسيب حتة للتصريف ..درسينج وبلاستر..خافض للحرارة فى الوريد..طلب معامل كاملة مع غازات بالدم ..مفيش اسيدوزيز ولا الوظايف بايظة الحمد لله-دخول للعلاج المكثف والمتابعة 24-36 ساعة-العيانة خرجت فلة والسونار اوك
يا دكتور باى باى يا دكتوووووور-عيان دخل فى ارست ومات بدون اى مقدمات وهو خارج على الكوبرى بتاع الطوارئ