l'histoire d'un chariot , c'est l'histoire de la vie

على نغمات اغنية حكايات لعمرو دياب
اكتب هذا البوست الحربى
اخدت من امبارح كمية شمس على قفايا
وبقالى كتير فى مقالب حراميه من زمايلى
بيطفشوا اى حد ممكن يتقدملى
وكمان -مش ده بس
بيقولوا لأ ريهام لأ.. ريهام تخينة ..يا اخى ..واللا بلاش
كل واحدة فيها العبر وانا ساكتة على الاقل عيبى فى الشكل
اما انتوا والله انا سكت عليكوا عشان بس كننا فى المؤتمر
لكن مسير الاحوال تتغير عشان الحاجة الوحيدة الثابتة فى الكون ده هى التغيير
بمناسبة التغيير ..انا لسه مغيره هدومى من شوية
لسه راجعة من بره ..اكدت حجز رحلة النيل وربنا يستر
وظبت شوية حاجات فى البريزنتيشان بعد ما قعدت فى المكتبة ورافعة رجلى على الترابيزة فيها
انا صورت المكتبة من جوه بس كان نفسى اصور رجلييا وهى على الترابيزة فى وش الكمبيوتر
معلش المرة اللى جاية بقى
العربية عملتها فييا..المرش مش بيدور ..طبعا كنت بغنى حلاوتها ام حسن
عشان افتكرت متقال فى الوقت ده
عشان العربية مدارتش فى الشارع
وكنت جنب اعلان حجازى متقال اللى بيقول بص على الحلاوة
عنده حق ..العربية بيحلالها تعملها فييا فى اوقات عجيبة
طبعا ما سافرتش المرة دى
وامبارح كل مشاويرى شعبطة
والنهارده موتو رجل
علييا حاجات كتير
رحت قدمت اشتغل مدرسة علوم فى مدرستى القديمة
وقابلت المديرة وعملت انترفيو بالفرنساوى مبدأيا
وكان اول سؤال بزعيق
ايييييييييييييه اللى خلاكى تدرسى طب ؟
حسيت كأنها بتلومنى ..لأ ارجوكى لا تلومنى
كفاية اللى انا فيه
طبعا كان سبب المقابلة دى فى المدرسة ...قصدى نزولى من دكتور الى مدرس علوم
ان المديرة اللى عملتلى البحر طحينة بالنسبة للشغل جت وقت الاكشن بجد وفلسعت
وصحابى كتر خيرهم ضيعوا سواء بنية مبيتة
crime premedite
او بهبل مستحكم
فرصة شغل لييا فى مكان كويس جدا
فالصيف ده شكله كده حتنتهى فيه حواديت خنيقة بقالها كتير
انا استحملت الهطل ده زمان
دلوقتى اوسخ حاجة بتعملوها فييا هى انكم تعشمونى بحاجة
وبعدين ملاقيش اللا خازوق
والله الدنيا دوارة ده اللى انا اعرفه
وانتوا كده ناويين على خسارتى
ينعل ابوها دى معرفة لما تكونوا بتضيعوا علييا باب رزق
ما علينا ..ادينى بدعبس لوحدى
المهم قلت انزل موتورجل اجيب حاجات الطرد بتاعة اخويا
اتمشيت طبعا فى الحر ده لحد ما عينى اتأورت برضة وشفت النجوم فى عز الضهر
من ضمن الاماكن اللى دخلتها سعود عشان اجيب لستة حاجات عشان البيت
سحبت شاريو من بره ..كانت فى الشمس فا ايدى اتلسوعت بس برضة جريتها بالزق قودامى
دخلت جوه وانا عماله افكر فى تاريخ الفراعنة ويا ترى هو الهرم لسه من العجايب واللا اتشال من اللستة الجديدة ؟
وفكرت فى الشاريو الفرعونية بتاعة الحروب
وبصيت للى قودامى دى اللى بزوقها بطراطيف صوابعى
وقلت ده التطور الطبيعى
ببص حوالييا لقيت امهات حطين عيالها فى الشاريو ..تطبيق فرعونى قديم زى كلمات مام امبو كده
قمت جيت لازم اطلع الدور التانى عشان اجيب صابون غسالة
سبت الشاريو اللى كانت لسه فاضية فى الدور الارضى على جنب وطلعت جبت الحاجة
وانا نازلة لقيت بنت 10 -12 سنة كده بتسحب عربيتى
قلتلها يا ماما دى بتاعتى انا كنت فوق بجيب صابون..كنت شايلاه على صدرى زى البيبى..كيس تقيل بقى
قامت طلعتلى امها من تحت الارض بتقوللى لأ احنا جايبنها من بره..مع العلم انى شايفاها
حلاوتك ياختى ..بتعلميها الكدب من دلوقتى ؟اشربيها الشاريو دى
محبتش اتكلم مع ناس بتكدب عشان شاريو
وقلت بلاش خناقة النهارده ... امشيها شاريو سوبر ماركت
بدل شاريو حربى بتاع الفراعنة