مشغولون اليومين دولون

لشوشتى.. اه والله..بكتب حاجات وبلف على حاجات..وعندى امتحانات..أول ما رجعت والله مشدودة من عينى ..أل يعنى انا كنت هناك بتدلع ..ماهو كان طالع عينى برضة بس بصورة تانية..جيت هنا عمالة أتشد هنا وهنا وهناك..واللى ليه شوق فى حاجة بيقولها..لما خلاص ..دماغى خيشت أه والله-يعنى ايه خيشت؟-البلوج وحشنى قوى ليه وحشة بجد..طبعا فيه حاجات كتير فاتتنى فى الجو البرد والزحاليق..يا دوبك بجيب العشا وادخل انام من بدرى ..لا عرفت اخر اخبار الجزيرة ولا بتاع..بس كل اللى انا شايفاه انه ما شاء الله فيه ناس لسه بتدق فى ناس برضة كالعادة..الجديد بقى استعمال الاسلحة البيضة على مستوى عالى..معرفتش ناقشوا ايه فى اخر مؤتمر اقتصاد..بس كل اللى أقدر أقوله ان مصر بتلعب عسل لحد دلوقتى..اللهم ديمها نعمة علينا وناخود الكاس اهى حاجة تفرح ..ويا ريت بقى نسيبنا من حكاية الفانلات والالبسة دى عشان بقت خنيقة يعنى..معرض الكتاب يا معرضنا ..والله روحته خلسة يوم الاتنين..أولا منظم جدا واحسن من السنة اللى فاتت..طبعا توهنا بالعربية كالعادة بس وصلنا لبوابة خلفية ..بوابة رقم 11..دى بوابة عسل..أول ما تدخل منها تلاقى على شمالك مدبولى ووراه دار الشروق..هو ده الكلام..أول ما شفتهم جمب بعض انشكحت أوى وانبسطت الصراحة..كان يوم شمس الحمد لله..فاتمشيت ..تقريبا شبه السنة اللى فاتت مع اختلافين : انه منظم جدا السنة دى وفى حتة صغيرة ملمومة يعنى الواحد مش حيتهد من المشى خصوصا لو محمل ..تانى حاجة ان السنة اللى فاتت كان فيه أمم السنة دى مفيش تقريبا..هووووو خالص..مش عارفة بقى عشان البرد واللا ايه؟..لفت نظرى ان فيه كتب طب ب5جنية الواحد وانا والله كنت بدفع دم قلبى فيهم وبالتقسيط كمان وبتاع الكتب ييجى يطالبنى بالنقدية وأقوله بعدين وانا مكسوفة اتاريها فى سور الازبكية نازلة ب5..معرفتش بقى اذا كان بتاع الكتب حرامى واللا دى كتب فواضل جت لسور الازبكية قوريب؟..ما علينا ..لفيت فى مدبولى ودار الشروق..جبت قصة وكام كتاب حلامانتيشى .. بتتقرى القصة فى الحمام حاليا عشان بقعد فيه كتير..عندى امساك بعيد عن السامعين ومش طالبة معايا شرخ وزفت وعلاج ومعرفش أقعد على الكرسى ونيلة..فباخود أدوية وبستنى فى الحمام..وعشان ابعد دماغى عن التفكير فى الالام بقرا جوة الحمام ..ما علينا برضة..امتحنت امتحان بقى ايه عجب..حسيت برضة انى عاوزة ارجع من كترة الفرحة بالامتحان ..واللى جمبى فى البريك بتقوللى انا عاوزة اعيط ..انا قلت لها انا عاوزة ارجع الصراحة..المهم عدى الامتحان الحمد لله بالرغم من انى كان يوميها عندى بوادر شد عضلى على بداية مغص كلوى كده من قلة شرب المية عشان بستهبل فى ايام البرد ومش بشرب كتير..بييجى على دماغى ..نفس بدايات المغص اللى جالى وانا رايحة المطار عشان كننا رايحين الصين ..بس الرحلة اتلغت ..رحلة الصين دى لازم تتحكى بس بعدين بقى قلبى من ناقص يتفقع..الدنيا ما زالت تلج..وما زلت بدخل تحت البطانية من تسعة أو عشرة بالليل زى الفراخ..لولو القط بتاعى عندة برد فى معدته بيرجع من أى حاجة لمما عينيه دخلت لجوة فبديلة زتون وميه عشان ما يفتصش..بفكر أكتفه وأعصرله لمونة فى بوقة..بس ده عنف مع القط وحرام مش طالبة كمان انه يبقى بردان وبيرجع وعندة اكتئاب من العنف معاه وكمان بوادر قرحة فى معدته..يناير عدى هوا..مستعجل على ايه ؟..وانا بصراحة مش عارفة لحد دلوقتى اخرة الطب والامتحانات دى ايه ..بسمع الايام دى أهواك بتاعت فيروز..جميييييييييلة رايقة وكلماتها محصلتش..أهى أحسن من الهيصة اللى على التليفزيون

معانا يا رب - الجزء الاول

هوه كده حال الدنيا ابقى مرة فوق السرير ومرة بره فى العربية..كل يوم حاجات جديدة بتحصل فى الدنيا من حوالييا.. بس ساعات مش بدرى بيها..مش بهتم أوى..حياتى بسيطة مختصرة..بين السرير والعربية...ودى مش اى عربية دى عربية الاسعاف
أول مرة يبقى لييا علاقة بالسرير كانت يوم نتيجة الثانوية العامة..كان يوم تقيل أوى..مكنتش عاوزة أقوم من السرير..خايفة ومرعوبة من النتيجة..دماغى مش راسية على بر :يا ترى حنجح ؟ يا ترى حجيب مجموع؟ طب طب واللا هندسة؟ يا ترى كلنا عملنا ايه؟..من كتر خوفى كان كابس علييا النوم بشدة..طب ازاى؟ ماهو الخوف بيصحى طب انا كنت بنام ازاى؟انا نفسى مش عارفة..بس كان هروبى من الواقع ومواجهته فى الفترة دى كان عن طريق النوم..جه ادان الضهر ادن قلت مبدهاش لازم انزل اشوف ايه اللى حصل..ما انا مش قادرة اكتر من كده لازم اشوف نتيجة عمايلى فى السنة الطويلة العجيبة دى..أخدت اخويا الصغير وخدنا تاكسى وطيران على المدرسة..قلت احسن انى اوصل فى الاخر بدل ما اجى فى الاول والفضايح تبان..سمعنى سواق التاكسى وباصللى فى المراية وشاف وشى الاصفر والقلق فى عينايا وقاللى متقلقيش..ناجحة ان شاء الله..وقد كان ..نجحت بدرجات عالية وطبعا حصل اللى كان مكتوبلى : انى ادخل كلية الطب
عمى مسك ورقة الرغبات بعد نتيجة الثانوية العامة وكان فرحان قوى :"أول دكتور من فرع عيلة حسن"..وبالرغم انى معرفش حسن ..بس كنت مبسوطة مش عارفة ليه..مشاعر كتير مع بعضها متجمعة..مبسوطة عشان نجحت وخايفة عشان انا مش عارفة انا قد كلية الطب دى واللا لأ..كنت عاوزة هندسة..الكترونيات أو كهربا..خوفونى ..اه والله خوفونى..ممكن تتكهربى ! ممكن ما تلاقيش شغل! أهم مرطرطين زى الهم على القلب-قال يعنى الدكاترة مش كده برضة- مش لاقيين لقمة! ده علم بيتطور بسرعة وممكن ما تلاحقيش فيه! الطب اجدع واشيك واحسن واقييم! ممكن تفتحى عيادة وكل الناس تكون عاوزة تيجى للدكتورة! ممكن تبقى امراض نسا وتبقى غنية ومحدش يقدر يكلمك!
فى السن الصغير وفى عدم وجود تجارب ومع اكتشافى ان تلات اربع الفصل بتاعى فى ثانوية عامة علمى دخلوا صيدلة وطب..رضخت بسهولة لرغبة أهلى بالرغم من انى من جوايا مش مقتنعة بس أهوه كتبت طب اول رغبة..وفى جوايا قلت لو مع أول تيرم معجبنيش الحال ..أسحب ورقى واحول على هندسة..مش مشكلة!
عمى بعت الدوسية بتاعى لمكتب التنسيق......ومع انى كاتبة بايدى اول رغبة كلية الطب اللا كان عندى أمل ان ممكن هندسة تيجى بالرغم من ان كان مجموعى معدى درجات الطب بزيادة... بعد حوالى اسبوعين
وانا راقدة بالشقلوب على سريرى عمالة بقرا فى قصة..رن جرس الباب..قمت فتحت ولا بييا ولا علييا لقيت البوسطجى فى وشى... ادانى جواب فى ايدى وهو بيقول بابتسامة واسعة:" مبروك يا دكتورة..كلية الطب ان شاء الله"..كان رد فعلى غريب قوى ..غريب لدرجة ان البوسطجى اتلجلج ورمى الجواب وجرى من غير ما ياخود الحلاوة..كان رد فعلى بدون أى كلمة: اتفتحت فى العياط بصوت عالى!

يا نهار زوحليقة

زحاليق مالية الشوارع عشان احنا كالعادة بنغرق فى شبر مية..مخلصتش ورقى المطلوب للشغل عشان بتلكع-وفى قولان اخر بتمرئع-طب اعمل ايه والجو برد ومطرة وزحاليق؟..كله بيتزحلق الايام دى ..كفاية اللى بيحصل على الحدود ..بس بجد اللى دلعنى النهاردة-غير الدش السخن واللى اكتشفت فيه انى متلحوسة بالطينة بتاعت المطرة ومش عارفة جاتلى منين-ماتش مصر والكاميرون..أيوه كده رفعتوا راسنا 4 -اتنين ..ربنا يحميكوا وتجيبولنا الكاس..ويا رب المطرة تهدا شوية عشان انا ورايا هيصة لازم تخلص

at last :D

I HAVE FINISHED A HORRIBLE EXAM !!
AND at last
i have started to read norwegian wood over the
beach..i've always dreamt of reading this novel
by the sea...at last am reading some good stuff
P.S.:KAN 7AYOGHMA 3ALAYA while reading

انا ليه

بقيت دكتور؟..مش عارف الصراحة..عندى احساس بصراع نفسى جوايا-مش وقته طبعا-لدرجة انى نفسى غاممة علييا وعايزة ارجع-يمكن عشان بقرا نساوولادة الايام دى؟-وبسأل نفسى يا ترى انا ولد واللا بنت-عشان بقرا مواضيع لخبطة الهرمونات-..واللا ده نتيجة البرد لحاس القفا على رأى الست اللى باعتلى الجرايد النهاردة؟..مش عارفة اجابة لسؤالى انا ليه بقيت دكتور..بس يتهيألى انى بقيت دكتور عشان انا وقعت فى غرام كلمتين ليهم قيمة كبيرة عندى..الجمال والرحمة..وفيه سؤال تانى سألته لنفسى وانا ماشية فى طرقة القصر العينى-بسلى نفسى عشان الطرقة طولها كيلو وبعض الناس بتقول كيلو ونص والله اعلم-يا ترى كان ممكن ابقى دكتور حيوان؟ يعنى طماع كده وكرشه واسع وياكول أى حاجة قصاده ويهرس فى العيانين؟..أدوس بقى ما انا دكتور ..وأطلع كل عقد النقص والعولق اللى اضربتها وانا صغيرة فى صورة سادية على العيانين؟..انا قلبى ما يطاوعنيش..أول ما بصيت فى عين اول عيان شوفته فى الطرقة-كان لابس لبس العمليات الصراحة على اللحم فى التلج ده وماشى سبور فى الطرقة ورايح من قسم للتانى عشان الطلبة يكشفوا عليه..كتير من عيانين الجراحة كانوا بييجوا القسم كده وكتير كان جاون العمليات بيبقى مفتوح من ورا من غير ساتر..علامات الفقر على وش العيان موجودة بس مبتسم قوى -شكله حيلهف قرشين من الطلبة-المهم برضة المبدأ لسه فى دماغى زى ما هوه..مش حبقى دكتور حيوان..حنصبر بقى والامر لله..عشان انا عارفة يوم ما حبقى حيوان مسروع بيعض فى العيانين يوم ما ربنا حياخود العلم منى..وانا مش عاوزة كدة..العيانين الغلابة-بالرغم من انى ساعات من هطل اهلهم بكون عاوزة افطس فيهم-لسه برضة بيلمسوا حتة فى قلبى لسه متوسختش من حاجات كتير-اه والله-فقلبى بيخللينى مش شريرة...بالرغم اننا بعد كام ساعة حنفتح بطنه بسكينة وحلغوص فى مصارينه..بس على الاقل قبل العملية يشوفنى بعامله بمنتهى الابوة والطفولة والبراءة اللى فى الدنيا-بنضحك عليه عشان ما يفلفصش وهو بينام تحت فى قوضة العمليات-وبعد ما يتحط فى قوضة الريكافارى-الافاقة-يفتح نص عين يلاقينى بكتم نفسه بماسك اكسجين وبحوطله رايل طول السرير -عشان من الهبل انك تنسى وتشيل الرايل لما العيان بييجى يفوق-..سؤال بقى برضة بيطاردنى فى احلامى..هو لييييييييييه عيان اللى باطنه مفتوحة ولسه احنا فاتحينوا ومقفلينة دايما بوصيه هو واهله انه ما يشربش ولا ياكول اللا لما يخرج ريح..دايما بيشرب ومش بيسمع الكلام وألاقى بعد كده باطنه ناشفة وبيرجع وسخن نار وابتدى درجة الوعى تتنيل؟ أهوه بوق ماييه فرقعله مصارينه...هو انا بتكلم كده ليه؟

quiz

leih dayman so7abna el banat lamma yetgawezo bey7ebbo yewarouna el 7'atem elli fee eidhom betoro2 3ageiba , bet7assessni enaha tel3et men el gawaza dee bel 7'atem bass..7'osousan law kan bagette?

alone with el television

never knew how this week has passed..it has just passed so quickly..ended before i knew it..needed something new to break the circle..i went to my favorite library..then had a heavy dinner..don't know why i had couple of tea cups before dinner..they kept me awake..i knew i will be staying up all night doing nothing..am not in the mood for reading..i have read already today's newspaper,seen the argument on the tv about this movie 7ein maysara..then my mind went blank..do not want to think about nothing..entered the wc with the newspaper in this cold weather,the paper today was akhbar el adab, they have written a topic about haruki murakami..i just love this guy, i want to have some time to read the norwagian wood , his famous novel that i bought when i was in his home country..he is sentimental and romantic, i love that but am in the mood of'emergency room doctor', i need no romance these days , i need security and challenge..and a good laugh!..staying awake today was good , i went from the newspaper to the tv..to my surprise i have seen couple of episodes of sex and the city in one row..it made me laugh..i needed that

قاعد لوحدى

قاعد لوحدى فى النادى لا بييا ولا علييا..متنحة فى الشجرة اياها اللى انا قاعدة تحتيها كافى شيرى خرى..مستنية سندوتش الجبنة البيضة بالطماطم كتصبيرة لحد العشا..ماهو انا خرجت من صباحية يوم الجمعة على الحسين..صليت الجمعة الاولى فى السنة الجديدة هناك..بعد الصلاة وقفت انهم يفتحوا الباب عند الحسين عشان اقراله الفاتحة مفتحوش..وراجل وقف وسطينا بيقول بصوت عالى ان كل واحد يحرص على حاجته لحسن فيه حرمية فى وسطينا..قعدت اضحك بصراحة والست اللى ورايا رقعت بالصوت ان بنتها مش لاقياها..اتارى البنت كانت اتزقت بقوة الدفع لقودام..المهم قريت الفاتحة للحسين من بعيد عشان كان فيه ناس كتير جايية تزور..مبدهاش زنقة وسرقة كمان..طلعت على الفيشاوى اعدل دماغى بالشاى ابو نعناع..الوقت سرقنى لما اشتريت الجرنان على القهوة وقعدت اقراه مع الشاى..طلبت شيشة كمان بعد تليفون زى الخرا ما جالى ..صحبتى بتحاول تعرف زميلى مش عاوز يتجوزها ليه..طب انا والنبى ارود اقول ايه؟..الايطالية اللى جنبى طلبت شيشة هى كمان لما قعدت تبص للسيجارة الكبيرة دى اللى انا بشربها و بقينا اتنين من حوض البحر المتوسط بنشيش جنب بعض..والست الاجنبية تيجى كمان تصورنا..اتصورت الصراحة ومالوه..الوقت جرى واللعب بالشيشة وشرب الشاى على معدة فاضية جوعنى..دفعت ورحت رايحة على النادى..طلبت سندوتش وقعدت تحت الشجرة اياها..اول ما قعدت حسيت انى غطست فى الكرسى وحسيت انه حضنى كده..أهو ده العشم برضة..وحشتنى انت كمان..ومكدبتش خبر..الولد اتأخر فى انه يجيب الاكل روحت اخدتلى تعسيلة على خفيف..نايمة ونص دماغى صاحية..فتحت عينى لقيت الست اللى جنبى بتزغرلى..ايه يعنى لما انام فى النادى هو انا رفعت رجلى فى وشك ؟..عيالها بقى كتير كده معدتش الصراحة..بيلعبوا ببلونة هيليم..صاحبتها جت وقعدوا يتكلموا على تمن البالونات ييجى عشر دقايق كنت كلت فيهم السندوتش وطبعا بتزغرلى لسه كأنى باكول اكلها..دى جبنة بيضة يا أمى..امال لو طلبت لحمة حتقومى تاكلينى بقى..قررت انى انام شوية تانى بس لقيت العيال اول ما شافوا قطة جايية تلقط رزقها من جنبى قاموا جريوا وراها بيرعبوها وعاوزين يضربوها..الصراحة اتقرفت قوى من كده..وقمت لبست الجاكيت وانا بقول للعيال ايه كمية العنف اللى انتوا فيه ده؟...بلاش والنبى العنف مع القطط دوله برضة ليهم عائلات واطفال بيخرجوا زى حلاتنا يدوروا على رزق ربنا..بس كل كائن بيدور على رزقه بطريقته..يعنى مثلا استحالة انكوا تلاقونى واقفة بلحس بقى قودام محل كبابجى وانا باصة للحمة..واللى يشوفنى بعمل كده قودام المحل يبقى يعزمنى على كفتة عشان بحبها..وبلاش نظام ارميلك رغيف وكلى على الريحة قودام المحل جنب القطط..ودمتم

happy new year

the first kiss in 2008

to whom this kiss?
to the movie '7ein maysara'..BIG BRAVO!
i wish all movies will have a story
khaled yousef , you are talented, so much talented
if you continue like that , one day you will win the
oscar , best foreign movie