هو فيه ايه ؟

ايه اللى بيحصل فييا بالظبط الايام دى ؟ اسبوع مدهول كده..السبت البروفيسور اللى كان عدل حيمشى وحيجيبوا اللى بيتكلم مع نفسه على السبورة ويسيبنا نضرب اخماس فى اسداس والبنت اللى قاعدة على شمالى تقعد تقول له ايوه يا دكتور مظبوط..الاحد بدل ما نشيل حتة من القولون فى العمليات الدكتور قاللى حنشيله كله واهل العيانة خنقونى بالاسئلة الغبية مع محاولة الخناق معايا..طب انا مالى ..بالزمة حد يدفع قد كده فى كشف فى العيادة برة وميسألش اللى عاوزه على عيانه وييجى ساعة العمليات يمسك فى النايب؟..الاتنين كان انترفيو زى الهباب..كل ما اتكلم كلمة افتح على نفسى فاتحة..واللى فى اللجنة يسألونى مرة سؤال طب وسؤال عن حياتى كدكتور..تلت ساعة مرت كأنها فترة كبيرة جدا مش بتنتهى ..طلعت من تحت ايدهم تعبانة جدا..اجهاد جامد ..ناس شوداد قوى وبعد كده ممكن يقولوا لأ وانت ملكش الحق تسأل ليه لأ ..قدمت الواجب اللى مطلوب منى ومقدرتش احضر المحاضرات عشان حسيت انى حيحصللى حاجة..اليوم عجيب مكنتش نمت كويس الاحد وصحيت من الفجر يو م الاتنين مستنية الانترفيو وقلقانة..صحابى أون لاين عملوا معايا كونفيرنس عشان يطمنونى ويقولولى ايه نوعية الاسئلة اللى بتتسئل..بس برضة اتسألت يوم الاتنين فى الانترفيو اسئلة مختلفة وتعبونى من كترة اللف والدوران..يعنى هى الاجابة واضحة ..أوضح ايه ؟..شكل اللى فى اللجنة مش فاهمين واللا انا من كترة التعب والاجهاد وعدم النوم كويس واليوم الحر ونقص السكر وانى كنت بورعى يوميها خللوا الانترفيو زبالة ؟..يوم الاتنين ده بعد الانترفيو والعك اللى حصل فيه وتقديمى الواجب وتزويغى من المحاضرة..قررت انى اكول برة..روحت بيتزا بلاس وطلبت تيك اواى بس شربت نسكافيه عندهم واكلت سلطة من الاوبن بوفيه ومشيت الصراحة..التلات بقى عيادة الغيار ونتايج العيانين كانت مش وحشة الحمد لله ..الاربع مروحتش المستشفى عشان كنت حاسسة انى حموت من التعب..نمت شوية كتير كده وبعدين نزلت على المحاضرات بتاعتى..طبعا كالعادة استأذنت من الدكتورة..قالتلى يعنى ما جاتش على المشوار..ست جدعة خليتنى امشى عشان كنت شبه الشبح..نزلت روحت مع اخويا نشترى بقية الحاجات اللى عاوزها قبل ما يسافر..وزرنا عمتى اللى جت من السفر..وعمتى التانية اتطمننا عليها بالتليفون عشان هى فى مستشفى بعيد..وشكلها كده حتتنقل عندى والله اعلم ..بقالهم سنة بياخدوا قرار يودوها عندى واللا لأ ..مليش دعوة انا قلت لهم اللى عندى وخلاص..روحت طبعا مش شايفة قودامى نمت عشان الخميس نبتشى طوارئ..ما علينا ..يوم التلات قعدت مع احمد مدير الطوارئ ساعة بس قبل ما انزل عيادة الغيار..ساعة بس جالنا فيه 5 ارست ..قلتله طب يا عم انا امشى بقى كفاية على كده..خصوصا وان الحديث بتاعنا قلب على مين من زمايلنا مات من الاجهاد ومين مات فى المستشفى واحنا فى الشيفت وكده..كانت قاعدة زبالة يعنى..يوم الخميس كان الجو هادى الى حد ما بس قعدنا نتكلم فى موضوع هباب تانى..يا ترى ايه معنى الذكورة فى المجتمع بتاعنا ؟ رجالة كتير وانا الست الوحيدة اللى قاعدة ..طبعا الكلام عن ظلم الرجالة للستات معجبنيش فابتديت اشتم ..نوعية الراجل ده مش راجل...ده حيوان..انا لازم اقوله انت بهيم فى وشه كده يعنى..لميت لسانى عن شتايم تانية خصوصا وان الاستشارى بتاعى كان قاعد جمبى..اللى خلانى اشتم ان واحد زميلنا اتجوز وكان بيصرف باليمين والشمال ومش عارف ان الجواز مسئولية..وبعد ما خد مزاجه-شرعى اهوه عداه العيب يعنى-والفلوس خستكت معاه..قام مطلق مراته وهى حامل ووداها على بيت ابوها-لأ راجل-حجته ايه ؟ مش قادر اصرف عليكى يا بنت الناس..يا ابن الكلب ما هو الواحد بيتجوز عشان يبقى له اسرة يحافظ عليها ووهو ومراته يبقوا على الحلوة والمورة..تقوم تاخود الكريمة ولما الايام تبقى طين ترجع البضاعة لصاحبها؟..فين بقى الرجولة فى دى ؟..الرجولة مش كلام ..دى فعل..زى الوعد..أهو كلام لحد لما يبقى فعل..المهم الكلام بقى طينة قمت قعدت اشرب شاى كده واقرا فى كتاب..جه استشارى العضم وسألنى عن سرطان القولون وكده..افتكرت البروفيسور اليابانى- يا ترى انت فين يا كوباياشى ؟-وافتكرت انه لسه ما ردش علييا..بلعت اليوم زى ما كان..روحت الخميس وكان يوم زحمة جدا على الاخر..مصر كلها فى المواصلات بالليل..نمت ساعتين تلاتة وصحيت عشان اخويا بيحضر الشنطة وراجع تانى على البلد التانية..راح المطار وانا روحت المستشفى واصطبحت على 4 حوادث..4 دكاترة خارجين يتفسحوا طرب لورى عربيتهم..انا عارفة اليوم لما يبتدى بحادثة بيبقى كده طول الشيفت..حدثة فى ديل حادثة فى ديل بيبى صغير ابوه بيهشكه فخبط فى مروحة السقف وجاى لى كأنه واخد بوكس فى وشة..وبيبوص لباباه بنظرة عتاب ولوم وهو لسه عنده 5 شهور..كتكوت خالص قعدت انا كمان اهشكه عقبال ما جاله الرمد ووجه وفكين عشان يشوفوه معايا..طلع بس عندة البوكس اللى فى وشة ده وخلاص..جالى سماعين عندة 4 سنين بيقترح على الجرح اللى فى وشة انى احط بلاستر بس..وطبعا شايف حقن ومشارط ومقصات وموسكيتو ونيدل هولدر وابرة وفاتلة وازايز وناس بتكتفه وكشاف ضارب فى عينه وجفت بسنان فى ايدى والتانية فيها ابرة وفاتلة وحاجات بتتفتح وحاجات بتتقفل وناس بتصوت برة على حادثة تانية جاية ومامته اللى سابته عشان كان حيغمى عليها..المهم اتكتف عشان ما يتحركش وانا بخيط..الجرح فوق حاجبه اليمين واى حركة غبية من سماعين حجيب عينه ..قاللى انه اسمه سيماعين وباباه هو اللى سماه كده..مش حاسس بحاجة بعد البنج بس برضة خايف ويقوللى مرة خلاص يا دكتورة ومرة تانية خلاص يا طنط..وانا مش خلاص ..خد ييجة 8 غرز بطلوع روحى من فلفصته..وبعد كده وهو لسه على الترابيزة قلتله عاوز شوكولاته واللا عصير؟ قاللى لأ عصير..قلتله ماشى..جيبناله عصير وانا كنت دورت فى المستشفى كلها على حتة شوكولاتة ملقيتش..جت بعديه تقى غلبتنى برضة ..سماعين اللى فاتح قرنه كانت طبلة..دى اللى قطع خدها طبق صينى..طبعا بعد ما اتطمنا على الطبق الصينى اتكتفت برضة واتخيطت بنفس الفلفصة بتاعت سماعين- بس سومعة كان دمه خفيف وعسولة- كان نفسى اسيب الخياطة واقطعه من البوس..تقى دمها تقيل وانا بحاول اخيط خدها لازم احوط صوباعى جوه بوقها عشان ما يبقاش الجرح داخل لجوه ويبقى بوقها فاتح من جوة لبرة..عشان كده حتتقلب عملية كبيرة مش خياطة بسيطة يعنى..خيطت المهم وقلت لأهلها هاتو لها ميه عشان اتأكد انها الانبوبة بتاعت الغدد اللوعابية مش مقطوعة وتجيب العصير او المية من خدها وبوقها مقفول..انا قولت كده وامها وشها اصفر فى ثانية وعرق كتير نزل عليها وكانت حتقع من طولها لولا ان العمال شالوها واتحطت على التروللى اللى جمبى ..دخل ساعتها راجل عنده كسر مفتوح فى الانكل وبينزف بقى عجب عجب..هى شافت كده وسمعتنى وانا بتكلم عن بنتها طبعا لازم تتلقح على التروللى اللى حمبى..عقبال ما شدوا البارافان عشان متشوفش صاحبنا بتاع رجله كانت هى شافت وسمعت وسورئت..البنت مطلعش حاجة ازيد من كده مقطوعة فيها..طول ما انا بقرب الابرة منها عشان اخيط تفلفص وتقول بسم الله الرحمن الرحيم..كأنى عفريت حقرب منها ..الموقف ضحكنى والله..طب انا اعمل ايه ؟ ما انتى لازم تتخيطى وااللا نسيب الموضوع كده فاتح على الشارع..ايمن بقى راجل متوسط العمر جالى واخد لوح ازاز فى وشة..عقبال ما اتعمل كونترول للبليدنج..كان نزف كتير قبل ما يجيلى ونزف عندى عشان كل ما امسك الشريان يفلفلص من والالة تروح قاطعة الشريان اكتر..والله كنت حدخله العمليات الكبيرة عشان نعمل كنترول وفحص الجرح تحت مخدر عام خصوصا وان النزيف كان رهيب وحسيت ان الديورا مقطوعة..بس الموضوع اتلم بعد ما لبشنى لما اصفر لونه وقاللى انا عطشان قوى...محدش بيقوللى الكلمة دى واالا ويدخل فى أرست بعد كده...طبعا عملت كومبريشن جامد ولما دروخ شوية روحت ماسكة البتاع اللى بينزف هنا وتانيت العضلة اللى بتنزف على الاخر..مفلفصش المرة دى وجرى منى ..طبعا كانيولات وملح وجلوكوز زى البحر فى دمه بديله لحد ما بقى اوكية..بنج موضعى واندر ران الشريان وطبعا ندهت الاستشارى عشان يدخل العمليات الكبيرة فى الحالة أم النزيف والشريان اللى على شعرة ومتهربد..عملنا عملية صغيرة ولمينا الليلة..الالات مش بتمسك وبتقطع معانا والابرة قاطعة مش راوند وعايزين خيوط ربط..التمريض يقوللى يعنى ايه خيوط ربط..لما كنت حلطم..والاستشارى عندة حساسية من جوانتيات الطوارئ..ورئيسة التمريض جالها حساساية فى الشيفت وبتهرش..وادم غرق الدنيا..بس الحمد لله الليلة اتلمت والعيان خارج ماشى على رجلية ومراته بتصوت فى وداننا..أومال لو كانت جت من شوية كانت سورئت جنب أم تقى الصراحة..بعد كده طبعا كنت انا محتاجة اعادة تأهيل خصوصا وانى مكلتش من الفجر والساعة قربت على ستة الضهر..الحمد لله انى على ادان اضهر كده طلعت اوغمى علييا على السرير فى السكن نص ساعة دى اللى ساعدت انى ابقى واقفة على حيلى..التمريض كان مشتح وانا كمان..قلنا نشحن قبل ما ام النبتشية تقلب اكتر من كده..نسيت اقول انه فى النص نايب الباطنة اطحن برضة مقعدش على حيلة يعنى بس الريتم بتاعه اقل من بتاعى وكان يبصلى ويضحك روحت داعية عليه قامت قلبت معاه هو وبتاع العضم وانا اقعد ابص عليهم وبشرب الشاى بقى ودماغ يعنى..التمريض عزمته على الساقع وانا شربت ميه وشاى وعصير مانجة -طعمه زفت الصراحة-واتعدلت كده وغسلت وشى ومسحت بسلاين الدم اللى على هدومى ولولا ستر ربنا كان معايا سبراى كنت بروش منه على هدومى كل شوية عشان ريحة الدم اللى ابتدت تهل على مناخيرىمن الشريان اللى ضرب فييا ..الموضوع بعد كده بقى ريتم معقول مش جنان يعنى ..قعدت اقول هو ليه حصل كده ؟ ليه حصل كده ؟.وادور فى دماغى -عاوزة اكول بطاطس بيورية دلوقتى ايه الطفاسة دى ؟-على ايه السبب الرئيسى فى كترت الحالات وخصوصا عيال او شباب خارج يروش؟..اتارى الصيف ابتدى وانا مش دريانه..كفاية كده النهاردة كلام

لولو حبيب هارتى

جه فى العيلة 3 دوكورة مرة واحدة كل واحد فى قفا التانى- السباق شغال على ودنه..مين قبل مين ومين اكتر من مين-وكلهم برج التور زى حلاتى ..يعنى كده انا نظريا عندى تلات توابع صغيرين ..معتز وزياد وأدهم..وانا الزلزال الكبير

back to romance

Night and day, you are the one
Only you beneath the moon or under the sun
Whether near to me, or far
Its no matter darling where you are
I think of you

Day and night, night and day, why is it so
That this longing for you follows wherever I go
In the roaring traffics boom
In the silence of my lonely room
I think of you

Day and night, night and day
Under the hide of me
Theres an oh such a hungry yearning burning inside of me
And this torment wont be through
Until you let me spend my life making love to you

Day and night, night and day

my current status: extremely exhausted

نفسى والله

ان المجموعة التانية تتصالح مع المجموعة الاولى سواء فى العمليات أو فى الماجستير..نبوس بعض كده ونبدأ صفحة جديدة..خصوصا وان مش ظريفة انى اقول انى فى المجموعة التانية فى العمليات ويتبصللى من فوق لتحت أو شزرا..أو لو اشتغلت زايدة مع المجموعة الاولى يعتبرونى من الاعداء وانى جاسوس مندس فى وسط المجموعة التانية..ياخى بلا نيلة ..أما بالنسبة للماجستير..يا ريت بقى المجموعة التانية ترحمنى شوية..انا فى المجموعة الاولى ولسه ما ذاكرتش..اه عارفة يا سيدى ان الامتحان على الباب..بس برضة المجموعة التانية بيذاكروا كويس وبيحفظوا جامد وبيطلبوا شغل كتير من الدكاترة..يقوم الدكتور يفرح قوى بيهم ييجى يدخل عندنا ما يلاقيش حتى فار صغير يرد على أى سؤال يتسئل ويركبه 600 عفريت ويحلف علينا انه حيورينا اللى عمرنا ما شفناهوش - يا ترى ايه هو ؟-وانه حيقض مضجعنا وحيخلينا مش ممكن نغمض عنينا..وعلى رأى اللى بالى بالك: حتلاقينى فى صحيانك فى نومك فى حلمك..حتلاقينى ناطط فى بنطلونك...يا رب الترم ده يعدى على خير

قهوة وكومبرورر

الايام دى حاسسة ان عينايا والحتة الاولانية من المخ حيقعوا من راسى وينزلوا يجروا فى الشارع من كترة الالم والصداع اللى فى راسى..انا يا دوبك بشرب بوء نسكافيه أو قهوة الصبح عشان اعصابى ما تتشدش وكمان مفقدش ميه كتير وانا فى العمليات وكمان عشان مش على الصبح أكوللى دراع عيان واللا حاجة..بالرغم من كده مش عارفة انام كويس بقالى كام يوم وكمان النهاردة جالى صداع نصفى جامد قوى لدرجة انى كنت دايخة منه..حسبى الله ونعم الوكيل فى اللى كان السبب..طبعا خدت قرص ميجرانيل وشربت قهوة ..ولسه عندى ورك على الكمبيوتر..حسبى الله ونعم الوكيل تانى ..وطبعا اكلت نص بار شوكولاته لزوم السترس قلب على اسهال عشان البار ده بتاع امى ..ماما اكيد بتحسبن علييا دلوقتى

قطع يا عم

مش عاوزة اكتب بوست حزاينى والله..بس انا صحيت النهاردة - وده معجزة ان النهاردة اجازة يعنى-على كابوس زاد من حدة الجو الزفت اللى احنا فيه ..كابوس انى ماسكة كراسة امتحان الفرنساوى بتاع الاسبوع اللى فات ..كراسة كبيرة قوى..صفحات كتيرة مطلوبة قراية وتحليل وحل ..والامتحان طويل قوى والوقت بيسرقنا وفاضللى نص ساعة وبرضة الكراسة كبيرة..كل اللى حوالييا بيزعقوا على ان الامتحان صعب وطويل..وسابوا الكراريس وبيكملوا زعيق وخناق وانا عمالة احاول احل واركز عشان مش فاضل اللا نص ساعة..قلت احل اللى احله والباقى طز حموت نفسى يعنى..على الاقل بعمل حاجة بدل ما ازعق على مفيش زى الباقى..صحيت طبعا وانا بنهج وعرقانة على الاخر كأنى فعلا كنت فى السترس ده بتاع الحلم..ده اكيد من عشوة الفول اللى من عند البغل..بس امبارح وانا راجعة من الشغل فى المترو افتكرت الهباب اللى كنت عاوزة اتجوزه وافتكرت اللى ظربتنى فى ضهرى فى الشغل عشان مستكترة علييا انى ابقى فى شغل كويس ومستقر ..وهى عارفة مدى احتياجى انى ابقى مستقرة فى حاجة واحدة فى حياتى..حسبنت عليهم هما الاتنين عشان انا مش مسمحاهم والله..كلمت خالتى النهاردة افضفض معاها وبتسألنى عن حالى فى المستشفى ..قلت لها طبعا انى بصبر فى نفسى عشان الحال يمشى وقلتلها على اللى عاوز يقدم استقالته ويسيبنا احنا الدكاترة لايصين وملناش ضهر..وعلى زمايلى اللى بيسيبوا..على زمايلى اللى بيشتكوا من التعب الجامد فى انهم يتعلموا..مش عارفة اعمل ايه الصراحة اكتر من اللى بعمله..كل امتحان ادخله بحس انى بتحرق لحد العضم..لحمى كله بيتشوى..بشتغل لحد اخر خلية فى جسمى ولما بخرج من الامتحان بحس انى مفياش طاقة خالص والله..انا مش عارفة امتى حستقر واحس بالراحة ؟ واللا حياتى عشان انا دكتور حتفضل كده على طول ؟ امتى بقى الواحد يتنفس براحته؟

اشمئناط

أدخلته السكرتيرة-وهو الانسان المتواضع-الى الحجرة ذات الابواب الخلفية وهى تنظر اليه بطريقة عجيبة سائلة نفسها-ما عندوش هدوم عدلة ده ؟-..أومأ برأسه معبرا عن شكره وامتنانه لتوصيله الى تلك الحجرة السرية التى يتم فيها الاجتماع ..كان يتسائل- يا ترى هى سرية ليه؟ ما تبقاش علانية ليه؟ هى عيب واللا حاجة ؟..اكمل المسيرة فى داخل الدهليز..دهليز يؤدى الى دهليز يؤدى الى اخر الى ان وصل الى ديسك محطوط ..نظر اليه باشمئناط- ايه ده ؟ انا حكلم كمبيوتر واللا ايه ؟..قام جه صوت من جوه: هاهاهاهااااااا...انت فاكر نفسك ايه يا دكتور؟ فين البالطو بتاعك يا دكتور؟....نظر من امامه ومن خلفه وتف فى عيبه تفة جت على الهارد اللى ولع فى وشه..فانتقل من بسم الله الرحمن الرحيم الى لا حول الله فى ثانية..طبعا ده ادى الى فتح باب الغرفة السرية..حيث ان نظام التحكم فى فتح و غلق الباب بقى عليه العوض ومنه العوض..حس بايد غليظة بتشده وبتدخله لجوه..زى الايد اللى شدت كيانو ريفز وركبته الحنطور فى برام ستوكر دراكيولا..سمع الضحكة الدراكولية تتردد فى جنبات الحجرة: نياهاهاهاهاها..بلع ريقة وسمى كده ودخل برجله اليمين قائلا : يا هادى يا رب..سلامو عليكو..فوجئ بلا مبالاة من الجالسين..لم يسمع حد رد السلام..اللى صدمه اكتر ريحة القوضة اللى هى مزيج ريحة رجلين مش مغسولة لمدة لا تقل عن اسبوعين مع ريحة سجاير بايتة ومطفية فى كوبايات شاى وقهوة على ريحة كلب ميت...لسه حيرفع عينه فى الجلوس ويقول ايه ريحة الخرا ده..قام جاله صوت حيوان بيتكلم..أقعد يا خويا..حيفتح بقه ويقول مين العربجى اللى بيتكلم بالاسلوب ده مع واحد زيي قام المنظر اللى وقعت عليه هينه كان ميسرش عدو ولا حبيب الصراحة..وجد طاولة متراصة من حولها كراسى عليها اشياء تسمى فى الجاموس المحيط: بشر..بص يمين لقى كرافاته برتقانى طالع لها بنى ادم..بص شمال لقى راجل حز حزام بنطلونه مبتدى من بعد زوره على طول..قال : ادى قعدة..ها عاوز ايه يا دكتور؟ مش قبل ما تقعدوا تتكلموا تلبسوا البلاطى الاول ؟..بص طبعا باشمئناط للى بيتكلم..وقبل ما يطلب زيادة مرتبه ..سبقه الراجل بكلمة واحدة..مخصوم منك 5 تيام يا دكتور...تمت

my lovely sam soon

the new episodes am following these days , daniel henney is in it..couldn't believe my eyes when i have seen him , second time to see him acting after seducing mr.perfect..the foto i know is very expressive , but the episodes are light comedy not tough romance and stuff..daniel henney is having the kind of face that keep me smiling , don't know why, in addition , when i saw him كان حيغمى علييا الصبح وانا بشرب الشاى ولقيته بطل من ابطال المسلسل اللى بشوفه قبل ما انزل ابتدى الماتش..كتر خيرك يا دبى

من معادلة الخط المستقيم ..حتى نظرية الاحتمالات

الواحد لما كان جحش صغير مش فاهم حاجة الاب والام يقوموا يلبسوه المريلة-و ياللعجب كانت برضة كحلى-ويشدوا الحزام قوى- يعنى حتفرق معانا فى النظام وكده-تحس انك بتنساق زى الحمار بالظبط ناحية المدرسة أو اتوبيس المدرسة على حسب ظروف مدرستك..هما اللى اختاروا اسمك ومدرستك ونوعية دراستك ولبسك واكلك وشربك وصحابك والهطل ده كله غير طبعا المثل العليا اللى أول ما تكبر تلاقى المجتمع كللللللللللللله ماشى عكسها وانت الوحيد اللى فاكر ان الدنيا يوتوبيا وتعيش كده لحد أول خازوق ما يطلع من دماغك وتبتدى تفكر فى مبادئك بقى وانت حتمشى ازاى -عوج يعنى واللا حتمشى مستقيم-وساعتها بقى نفسك حتكلمك وتديك معلومات وحاجات عشان رغبتها..وانت اذا كان عندك عقل ودين حتقيم اللى بتقولهولك وتختار..يا لهوى بقى على الاختيار..أول ما الواحد بيبقى تحت جناح بابا وماما..بيسلم جزمته-قصدى مخه- لحد تانى هو اللى يفكرله ويوديه هنا وهنا وهو ينساق زى البهيمة..مش فى واحد بيفكرله وبيشيل نتايج التفكير ده ؟ واحد تانى شايل عبئك على ضهره سواء بقى بحب واللا باحساس المسئولية أو بالرغبة فى انه يطلعك كويس او حيوان..اللى الاب والام بيمشونا عليه عاملة زى معادلة الخط المستقيم بالظبط..بتحط قيم فى المعادلة عشان تطلعلك نتيجة وعلى حسب القيم دى حيطلعلك خط مستقيم يا اما طالع لفوق ويرفع راسك يا اما ياخدك وينزل يشرب من البحر ويبقى الجراف بتاعك خط مستقيم اه بس نازل للقاع..يعنى الاب والام بيحصدوا نتيجة الغرز فى العيل من قيم..أهو فى الاول الواد ماشى خط مستقيم ..طالع لفوق أهوه مش فاضحك..نازل لتحت طبعا بتديله على قفاه ولا مانع من كام قفا عشان يتعدل ويطلع تانى لفوق..أول ما الولد يبتدى يقولك عن اذنك بقى ويروح واخد جزمته من عندك ويطير من تحت جناحك..يبتدى يدخل فى دواير الدنيا الغير منتهية..يخرج كده من معادلة الخط المستقيم الى نظرية الاحتمالات..يخرج وهو ونصيبه ..حاجات تطلعه لفوق وحاجات لتحت..ده طبيعى زى الدنيا حبة فوق وحبة تحت..ساعتها اذا كان مغروز فيه بجد قيم حلوة ودين بما يرضى الله..حيعرف يختار الاحتمال الاصح لحياته..وحيعرف يمشى لقودام ..حيلف فى دواير اه..بس محصلة الدواير كلها حتكون خط مستقيم لفوق..ناحية كل حاجة حلوة..بس ده بيحتاج وقت وصبر وشغل مستمر..ماهى الدواير مش حتدور اللا لو اشتغلت فيها عشان تلف وتدى نتيجة..واللا ايه ؟

ميه

نفسى انزل الميه ..راحة وروقان بال

امتى ؟

امتى بقى طريقنا يبقى مفروش بالورد والياسمين؟
امتى بقى الواحد يستريح من الوشوش دى ويشوف وشوش ناس حلوين ؟
احنا حنفضل لحد امتى بنصبر فى نفسنا واحنا مليانين بالاه والحنين؟
ونبقى ماشيين فى الشارع متنحين وغيرنا بيكلم نفسه والاسم مجانين؟
دول مش مجانين ..دول من جوه متقطعين
دوله مخهم بيلف فى دواير من كتر التعب والانين
يا رب صبرنا وافتحها عينا..قولوا ان شا الله وامين

ضليع فى اللغة العربية

والله الايام دى بيلفت نظرى كلمات ليست كالكلمات..ولكن كالدبش أو الطوب اللى بيخليك مش عارف تعمل ايه اللا انك تضحك وانت فى الشارع...يافطة قاااااااااد كده على محل محترم ومكتوب بخط كويس يعنى خطاط هو اللى كتبه..مكتوب شوية كلمات ..مطلوب بائعة ذو خبرة..بالذمة ده كلام والنبى ؟..والغلطة دى متكررة كتير على محلات شفتها..يا جدعان بحس عالى اهوه بقول: مطلوب بائعة ذات خبرة

i need a hug

i surely need a hug ..am extremely tired and running out of energy..this week was horrible .Shattered between anticipation and exams , am not getting enough sleep.I have to work at this weekend coz no body will take my place :' it is the weekend! who will ever work on thursdays!'...they are right , am the dumb ass who works on weekends..but the rest of the week is divided and shared with other things , i can not be attached to the hospital for 12 consecutive hours except on the weekends...Still the hope of doing my hair is lingering in the air..i never went to the flowers exhibition, but this week i have bought lots of novels ..i have a presentation , an exam and a paper to assign..but this week , it was horrible..had 2 exams : one english and the very next day international french language exam..and ohh my God! i wish i can pass them..i am still dreaming about having a hug

نهارنا نادى

والله انا من امبارح واعصابى بحاول امسكها..هى مشدودة جدا وبحاول اخفى ده كله..الحمد لله بطلت ادوية البرد وقلت ان البواقى تمشى كده من غير علاج..عيان القولون اللى اشتغلوه يوم الخميس معرفش عنه حاجة بالرغم من انى عاوزة امر عليه ابص واطل يعنى ..بس تفكيرى مشدود ناحية الاسبوع ده..نتيجة حاجة انا قدمت عليها مستنياها..وتعبت فى انى بحاول اقدم فيها..كل ما احضر اوراق واتعب نفسى وادفع فلوس واحرق دمى واسهر على الكمبيوتر بعمل الحاجات المطلوبة منى او بدخل امتحانات ملهاش اول من اخر..وبعد شوية محدش بيتصل..نفسى ومنى عينى النحس يتفك لانى مش عارفة حفضل احاول لحد امتى ؟ واللا حياتى حتفضل كلها كده محاولات ومفيش اللا الروتين الطبى اللى انا فيه ؟..انا عوزاها ترد بقى باللى انا عاوزاه..عشان كفاية ..بجد كفاية محاولات ولا كأنى بخبط راسى فى الحيطة..بتحاول تنجح الحاجة بالعافية..مفيش حاجة بتيجى كده..انا بتمنى ان فيه حاجة تيجى كده..وابقى مبسوطة واحس براحة شديدة انا فعلا محتاجاها..زى نقط المطرة على زرع كان مستنى بشوق..مش بيقولوا جوايز السماء بتيجى زى المطرة للصابرين ؟ انا مش عارفة اعمل ايه اكتر من كده..عاوزة اسمع اه موافقين مرة واحدة وتبقى بجد واستريح ..يا بكرة يا بعده النتيجة ان شاء الله ..واخر الاسبوع امتحان كبير ونبتشية..اللهم هونه علييا

جالوا فى المسل يا ويلد

* للى بيته من إزاز ميغيرش هدومه فى الصالون

* فاقد الشىء يدور عليه

* اقلب القدره على فومها الفول يقع منها

* تأتى الرياح محمله بالأتربة

* ياخبرالنهارده بفلوس بكره ينزل عليه أوكازيون

* اللى معاه قرش محيره يجيب حمام ويحمره

* جت الحزينه تفرح شغلت شريط حكيم وقعدت ترقص

* قال يامحششين يكفيكوا شر الكمين

* اللى ياكل لوحده يشبع

* لاتبكى على اللبن فى البسكوت

* اقطع عرق و حته بتلو

* اطبخى ياجاريه الأنبوبه فاضيه يا سيدى

* لو حبيبك عسل ما تحطلوش طحينة

* اللى يتلسع من الشوربه يتصل بالمطافى

* وبكره ترجع ريما من عند خلتها فى مارينا

* ياداخل بين البصله وقشرتها حط قطرة علشان هادمع من ريحتها

* اصوم اصوم وافطر على المدفع

* القرش الأبيض بيعوم فى البحر الأحمر

* ضربوا الأعور على عينه قالهم كسرتوا النضاره

* اللى ميشفش من الغربال يكشف نظر

* المال السايب يعلم الطلبه

* نام وارتاح وكل عسل نحل التمساح

* من خرج من داره مينساش يأخد المفتاح معاه

* الباب اللى يجيلك منه الريح شيله وركب قبنورى

* المضطر يركب التاكسى

* رب صدفة خير من ألف ليلة و ليلة

* اللى يخاف من العفريت يعمل عبيط

* المركب اللى فيها ريسين يلعبوا طاولة

* اللى خدتوا القرعه تخدو ام الخلول

what اللى ميعرفش يقول

* أكل العيش يحب الطعميه

lenses العين عليها

* قالوا للحرامى أحلف قالهم وحياة قلبى وأفراحوا

حولع شمعة

من دلوقتى لحد يوم الخميس اللى جاى ..يا رب اسمع خبر حلو

من الاقوال المأثورة

وانت حتتحب امتى بقى يا منيل ؟ واللا حتفضل مقضيها علاج وخلاص؟

الدوامة

الدنيا عمالة تلف بييا سواء بسبب الظروف أو عشان الادوية بتاعت البرد..أول مرة يجيلى موشن سيكنس فى المترو..دى علامة على زيادة الدوران..يا ريت بقى يخف عشان انا اتخنقت شوية وممكن اتهور وارجع فى البلوج ده..ياللا

SAD LOVE STORY

A BIG KISS TO YOU

ماذا تقرأ فى النبتشية ؟

مش حجيب سيرة البوكت بوكس بتاعت الطب وتشرشل ليفينج ستون وكانيينجهام والناس دى..لأ..انا بتكلم عى وعنك زميلى المطحون..لما تبقى مجرش فى الطوارئ مش عارف تفلفص منهم واكتر امانيك انك تقف على كوبرى الطوارئ تشرب شاى بمزاج وتتفرج على شجرة التوتة وانت بتفكر ازاى تصطاد التوت الاحمر ده من غير ما كرامتك ما تتهز-مش كفاية المرتب؟-رغبة عنيفة بتشدنى ناحية شجرة التوت..تصوروا بقالى 7 سنين فى المخروبة دى اول مرة اعرف اننا عندنا شجرة توت احمر كمان ؟ انا بحب التوت الاحمر قوى ..المهم الواحد يشيل ايه معاه فى جيبه عشان يقراه فى اثناء النبتشية ؟..والله انا قريت لحد دلوقتى كام كتاب من نوع اللايت..تحتمس 400 بشرطة لاحمد بهجت..عايزة اتجوز لغادة..كرياليسون مش فاكرة اسم الكاتب والله بس قصة بتعرف تقراها فى الشيفت ..بنى بجم ملقح قصادى اهوه على الكمبيوتر لسه ما خلصش..بس عترت على حتة قصة تعتبر فاكهة الموسم..انا كنت ناوية ابتدى بقراية حاجات لايزابيل الليندى بس الصراحة الميزانية ما سمحتش..ولما كنت فى المترو قررت انى فى شهر مايو اختارله كتاب-الحب فى زمن الكوليرا-عشان طلعت قصة حب ووفاء مش موجودين فى الزحمة اللى احنا فيها- ابتسم يا عزيزى فانت مزنزق فى القاهرة-برضة الميزانية اتخرمت..المهم عترت على ايه ؟ على ايه؟..قصة خيرى شلبى الجديدة اسمها صحراء المماليك...تهبل اسلوبها جنان..هى كبيرة شوية بس بتسلى فى الشيفت..تحفة بجد..مش قصة تاريخية لأ..قصة فيها حياة وانا يدخل مزاجى النوع ده قوى..لما اخلصها ان شاء الله كده ابقى افكر فى كتاب يونية..بس على الله اخلصها على اواخر مايو

in the mood for love

ترديد دندنة معينة طول اليوم فى محاولة مضنية لنسيان دور البرد اللى تاعبنى جدا..حرارة 39 وتكسير ورشح وهيصة وباخود ادوية مخلية دماغى عاليييييييا-ايه الدماغ دى؟-بقالى يمكن مليون يوم كده مرحتش المستشفى ولما نزلت العيادة عشان مفيش حد بيشيل حد سخنت اكتر وبقيت حموت من الاجهاد..نوبة الاجهاد اللى جات لى مع الاسهال الميه اللى جه كمان خللى المناعة عندى مدوحسة قام جه الفيرس ولبد..مش محوق معاه حاجة الهى يتهد ..اخدت 30 لمونة لحد دلوقتى ودخلت فى العلبة التانية من المضاد الحيوى بس تكسير الجسم متعب قوى..نزلت الشارع النهاردة اجيب حاجات لقيت دماغى برضة لسه بتلف ومشيت حبة صغيرة ورجعت البيت متكسرة ودخلت نمت..مجهدة على الاخر والله ولسه عندى شغل وكمان امتحانات وبريزنتيشان-والله ما عارفة حيتعملوا امتى كل الهيصة دى-..كان فيه خطة انى اروح النادى اشوف المعرض اللى عاملينه وخطة تانية انى اروح معرض الزهور لا عملت ده ولا ده..بوروطة فى البيت عشان التعب والانفلوانزا..عمال اردد اغنيتين..
am not in love , 10 cc
take that : i'd wait for life
am i in the mood for love or this is a mere effect of antihistaminics am taking ?
والله ياابنى ما انا شايف

لحظة نصيب

الوضع الحالى مش مبين انا ماشية فين ورايحة على فين..لسه الرجلين متعلقين فى الهوا وبعض الاحيان بيمشوا على الحبل..عملت زى الراجل الاسكندرانى ده..شفته من فوق القلعة وصورته..عملت زيه بالظبط فى مصر..رميت السنارة ومتوكلة على الله..فى انتظار لحظة نصيب