خلص الكلام

ذهبت مع الريح

اسواء حاجة ان حد يعمل مانيبوليشن -تلاعب-بمشاعرك..انت تختاره وفاكر انك اخترت صح..و الوقت يمر و انت برين ووشد-غسيل الدماغ-بسبب انك فاكر انك ماشى صح طالما الطرف التانى بيتصرف على اساس انه بيحبك ..و اتارى ان دايما السيتويشن ليه هيه: وين-مكسب..و ليك انت :لووز-فشل-مش مشكلته..المهم انه طالما بيستفيد منك و بيمص دمك ..مش مشكلته انت ..و كمان ايه ممكن يقولك: انا مش بكره حاجة اكتر من اللعب بمشاعر التانيين..و انت تصدقه ..و تكدب كل التحليل المنطقى للعلاقة..لحد لما تفوق على ان عمرك راح يا اما جزء منه او كله على واحد واطى ابن جزمة ولا يسوى بصلة-لا بلاش بصلة دى عشان غالية..و لا يسوى تمن جرنان اصفر..بس ساعتها يفيد بايه الندم؟..افضل علاقة دايما هى الوين -وين سيتوايشن..اى تحقيق مكسب للطرفين..الحياة فيها قد ايه عشان تتئارطس فيها بالسنين؟..بس ربنا بيعوض ..بالرغم من ان الدرس بيكون صعب خصوصا لما تفتكر اللى كان و الهبل اللى كنت فيه بس كويس ان الواحد بيصحى و بيفتح عنيه ..فى نفس الوقت التجربة اللى ذهبت مع الريح دى ..ايوه ريحتها وحشة بس مش لازم تبوظ الوردة البلدى اللى ممكن تكون مستانياك ..و اللى مش حتوصلها اللا بالتجربة دى ام ريحة وحشة..عشان لما توصل للوردة دى تقدر تقدرها و تفهمها و الوردة تكبر و تنور..و تتحول الى بوكيه جميل حلو تمسكه البنات فى ليلة جوازها

يوم العربية المشهود

امبارح العربية فرقعت فى الشارع و سمعت صوت طاسة العجلة دبت فى نص الطريق بالظبط زى اسماعين ياسين فى عفريتة هانم و طبعا العربية وقفت و نزلنا نشوف فيه ايه ..اتارى ان عمود الكردان اتكسر و مدلدل من العربية لا مؤاخذة..و لمن لا يعرف ما هو هذا العمود فانه المسئول عن نقل الحركة من الموتور للعجل الخلفى ..لميينا المسامير من الشارع و اللورى اللى ورايا عمال يزمر طب انا امشى ازاى و الحركة مش بتنقل و مطلوب زق العربية يعنى؟.. عدى البيه بعد ما زقيت العربية و كمان ركن ادامى و قعد يزمر .. قولتله اهه عدى و اركن الشارع وسعتهولك اهه اركن بالعرش بائه و الا فرشح فى الشارع باللورى العجيب ده..كان ناقل بيض كمان..الهى كل البيض يتكسر..وادينا اهه حننزل للميكانيكى و ربنا يستر مش طالبة مصاريف خالص انا و الله مش ملحقة ارفع راسى ..بابا قاللى حجيبلكم عربية يتكلم عنها الشارع كله..و قد صدقت نبؤته

انا عاوزة الربع بتاعى

النهاردة رحت النقابة عشان ادفع اللى متأخر على اخويا لحسن يسحبوا تصريح العمل كدكتور طالما فى سنين متأخرة..ال يعنى كل حياة الدكاترة ايزى فا عاوزين يسحبوا الليسنس ..كنت عند موظفة الله يحرقها قعدت تطفح بالسم الهارى سندوتش طعمي و ماسكاه بكلينكس و بتكله قطمة قطمة (براحتك يا روح امك) ال يعنى بنت ذوات و انا شايفة زورها من ادام المكتب..يا مدام لو سمحتى عاوزة ادفع ..الشارع طافح مجارى و انا راكنة فى الممنوع ...سوانى يا دكترة مفيش صبر؟ فين الشاى ابو لبن بتاعى يا محمد ؟..أصبر عشان شاى بلبن ؟ يا جزمة قديمة خلصى(ده طبعا فى سرى)..جه الشاى ابو زفت و ابتدت تشربه..فاضية انا لامها ..المهم بعد اطلاق كام كلمة على كام تريقة منى عليها بطريقة غير مباشرة فتحت الدفتر عشان أدفع ..المهم دفعت و الولية كمان علقت منى ربع جنيه كده ..كبرت فى دماغى بقى و انا دماغى لما تتربس بتربس..قولتلها انا فاضلى ربع جنيه..الدكتور اللى قابلى اللى قالوكوا جذورى من تركيا و عايش فى الفيوم و الحوامدية( و نعم) مدفعش الربع جنية بتعوضيه منى؟ انا عاوزة دمغة بربع بدل الربع..قامت الفكة ظهرت فجأة و اخدت الربع و قلت لها اسيوه بمزاجى مش تخديه كده..لما حكيت لامى قالتلى انا كنت حسيب الربع..قلتلها انا متنزلتش عن حقى و مش حشجع على السرقة زى ما خدت حقها اخد حقى انا كمان زى ما اخدت العشرة ساغ الباقى فى السوبر ماركت فى صورة 2 تشيكلتس...انا كده عدانى العيب و اللا ايه ؟

this is really happening

like it or not , the weather is changing ...storms ,hurricans and floods in a place , in the other one no rain , fire is there,germs start their surge ...i have read that by 2010,in 3yrs ya3ni, lots of ice in the north pole will have been melt ..avian flu is one of the deadly viruses , i guess the start of the list ..some predict the turning back of the deadly influenza,others predict the come back of the plague..malaria , TB ,HIV, HBV, HCV..7adess wala 7arag ..ya rab ostor

الفيرس الحوناين

اخر خبر سمعته ان فيرس انف الوزا الطيور عمل ميوتيشن(جين تشانجز-تحور) و تحول من فيرس حوناين الى فيرس شرز و خللى كل الحالات ماتت..قبل ما تغطينى و تصوتى يامما, هي فراخ كوكى فين ؟

a new book released

i have started reading new books , el hamdulellah, after the massacre of exams.i have started with a funny novel called mr.perfect..am reading it actually in the toilet,while on pc,waiting for some downloads to happen , i read the begger, for naguib mahfouz..i went to diwan as there is a discount these days , i have seen the book upon which fast food nation movie is based , it is out there ..i won't buy it as i will check the movie inshallah ..regarding fast food, to the hell with it ..it makes you loose your health , wallahi mesh bahazar ..we must turnto the veges and all the green food ..kelma oltaha we rez2i 3ala allah

exams aftermath

1-i had exams that were zay el zeft we rabena yostor , akher wa7ed kan 7aygeili feih heart attack , am dead sure
2-went to the cinema ,bought a ticket , entered the movie ..found out it was for the kids'mattinee party , the name of the movie 'flushed away',shit
3-another shit will be mentioned on tuesday,state of the union
4-on political level: iran is showing some muscles ..well ya well
5-on financial level : ana falest , shakli mesh 7a3raf arou7 ma3rad el ketab
6-on 'el resala' level , resalet el master ya3ni : lessa the same shit between me and the prof. ,elahi te3damo se7etkom ader ya kareim , katkom neila
7-regarding buying new cloth , shakli 7amashi be nafs el hodoum el adeima
8-on the shoe level , el gazma el gedeida waramet sawab3i , ya far7a ma tamett
9- heya fein ferakh kouki ? matet ? sadya ta3maha ye2ref balad , estaghfaro allah el 3azeim , shakli 7amashi be gebna 2areish welsalam
10-eza madafa3tesh masareif el nekaba elli 3alaya we 3ala akhouya , 7ayes7abo el licence , a7a fe3lan
11-on the house level , تم ولادة 3 قطط بيبى فى الشقة اللى فوق اللى فوقى ..النهارده صحيت على صوت قطط بتصوت..قمت فتحت البلكونة و شفت منظر عمرى ما شفته : القطط البيبى دى مرمية من فوق على سطح المبنى اللى مش متكمل ,واحد منهم نزل على سيخ خارمه من عند رجله و طالع من عند كتفه ..و القط البيبى عمال يعيط عشان حد ينقذه و قطط كتير تيجى تبص عليه و مش عارفة تتصرف ازاى ..و الله عقبال لما رحتله كان مات..يعنى يا ولاد الكلب, حد يعذب الحيوان المسكين كده لحد لما يموت؟ الهى تتخزوئوا فى جهنم انتوا و اللى فى بالى قادر يا كريم
12-on maktaba level , i bought some new books , lessa 7aboss 3aleihom
13-on foreign relations, wa7ed agnabi 3akesni fee maktabet madbouli ( 3ando nazar), we kaman ana etsa7ebt 3ala wa7da chinese laziza gedan , tata7adasou al fous7a
14- on exams level , 3andi exam kaman shahr we lessa ma3amaltesh 7aga + el mashrou3 ma7alak serr, ya lahwi
15-lessa 7adawar 3ala ketab " allazeina hagaro " le aneis mansour 3ashan atfash ana kaman
16- on tv level , mosalsal bent benout beyet3ad tani , el ra7ma ya rab

مهضوم اكتير

انا ملياش اوى فى الاغانى العربى حتى اغانى كاظم الساهر مش كلها بحبها بس منكرش ان صوته روعة..المهم كان فى مغنى ادام محمد عطيه اسمه بشار الشطى ..هو كويتى و جاب مركز تانى ..ده بقى انا عترت على اغانيه بالصدفة اون لاين على طرب توب..صوته حلو بجد و كمان الكلمات و العزف..روعة..انا بحب اوى:انت البادى-عادى-احاول انساك..هو مش معروف اوى للاسف بس لما سمعته قلت عليه زى اللبنانيين ما بيقولوا"مهضوم اكتير"

بتاع الاسانسير

كنت عاوزة شوية ورق للرسالة عشان اطبعه,استرخصت و رحت اطبعه فى مكتبة المستشفى ..الصراحة انا زوغت من المحاضرة عشان مش طالبة معايا ان ضغطى يعلى ..المهم رحت المكتبة و اسامة زميلى هو اللى دفعلى-جدع يا أوس_و كمان عازمنى على غدا فلاحى يرم العضم زى ما بيقول-الله يسترك يا اسامة-لسه فيه ناس طيبين-بالرغم انه قاللى انهم ماشيين الله ينور فى خصخصة كل شئ و لا حول ولا قوة الا بك يا الله-حتى المستشفيات يا أوس؟..ايوه يا بنتى بلاش نوم فى العسل بقى يا ريهام..انا مش عارفة حاعمل ايه لما الدور ييجى علينا يا اسامة؟..ولا يهمك ربك يدبرها..خرجت بعد ما اتفقنا على معاد الغدا و مشيت فى هول المستشفى..شكلها اتغير و حبى ليها كمان اتغير ..روحها و ريحتها مش هييا..الناس اللى فيها كمان اتغيروا..حبايبنا كلهم سابوكى يا مستشفى اخرهم واحد اتصل بييا من السعودية بيقوللى كل المستشفى هنا يا ريهام تعالى بقى معانا عشان نرجع ايام النبتشيات و الهيصة و الضحك و احلى نتايج للعيانيين..مش قادرة اسيب مصر ..مش قادرة ..هنا فيه حاجة بحبها مش عارفة ايه؟..كل الاهل و الصحاب بعدوا ..ايوه كل واحد ماشى بيبص تحت رجليه..ايوه انا عارفة ان الطوفان جاى ..بس انا بحب هنا..انا عايشة هنا..انا عارفة انى ممكن اعمل فلوس بره..بس مش حاعرف اعيش اللا هنا و ربنا يرزقنى بالحلال و يرضينى ..انا حستنى ..انتوا مش فاهمين..لما سمعت الاغنية بتاعة حسين الجسمى فى اخر فيلم الرهينة ..انا عيطت و الله عيطت ..ايوه انا بحب مصر و مهما بعدت عنك حارجعلك ..حبقى هنا و هناك ..انتى هنا فيكى كل اللى اعرفهم و كان فيكى اول دقة قلب و فيكى ناس طيبة ..ايوه اللى بيوقفنى الناس الطيبة و اللى محتاجة ..انا كمان محتاجة ..بس اعمل ايه؟ مفيش حل اللا انى ابقى بين هنا و هناك ..بس حابقى متصلة بيكى على طول -انا ناوية على كدة ان شاء الله...ايوه انا عيطت لما قريت جملة "احنا غلابة اوى " فى قصة البلدة الاخرى لابراهيم عبد المجيد..ايوه عيطت عشان كلنا تعبانين ..ايوه انا دكتور بس انا من فئة"غلابة اوى"..قالهالى بتاع الاسانسير اللى ركبته جوه المستشفى "كده؟ كده برضه تسبينا ؟سبتينا ليه يا دكتورة؟ارجعى بقى"..معرفتش ارد عليه ..طب حاقول ايه لو رديت؟...ايوه احاسيسى هنا ..انا لما سبتكوا محدش حس بالعياط اللى انا عيطته..انا زى ماكون بتسلخ من جلدى لما سبتكوا ..بس بردوا انا لسه بحبكوا و الله و نسيت القرف اللى فات ..بس لحد امتى حستنى حياتى لما تبتدى؟ لازم ابص شوية لنفسى..عشان كده معلش سامحونى انا حبقى انانية شوية ..بس اوعدكوا مش حتأخر عليكوا و حأرجع ..ان شاء الله

هابى نيو يييييييييييييييييه فعلا

تعرفوا مين دى؟

شايفين الرقة و الجمال؟ لأ و ايه كمان ثقة بالنفس..الست دى بجد عسولة أوى و انا بحبها عشان طيبة و عاوزة تعمل حاجات حلوة ..مش عاوزة مركز عشان بيزنس..دى اصلها بتحب الناس وحاسة بيهم و بمشاكلهم..ست بسيطة و جميلة..بس عينيها مليانة بالرغم ان عينها على الكرسى ..و الله انتى ست الستات ..يا فاكهة الاتحاد الاوروبى

نصيحة لاهالينا و اصحابنا فى المهجر خصوصا اللى فى كندا و اليابان و مديرية التحرير

• قراءة سورة الفتح كل يوم:عشان ربنا يفتح علينا كلنا كده و يوسعها علينا عشان ملناش غيره
• قراءة سورة الواقعة كل يوم :عشان ربنا يبعد عننا الفقر و يسدد الديون عننا,اللهم امين
• يا ريت بقى تروقوا معايا و نستغفر ربنا كل يوم و بلاش حد يطلعلى يقوللى انا مش بعمل ذنوب
• نطلع صدقة عشان ربنا ينزل رحمته علينا و بطلوا بقى بخل ,على قد ما تدوا على قد ما ربنا يدينا راحة من جوانا
  

ادينى عقلك وامشى حافى

حاطين بنى ادمين للفرجة عليهم فى جنينة الحيوانات فى استراليا..انا اتفقعت الصراحة

بروتوكول :يا ترى الخطة فيها ايه؟

شوية ترييح دماغ

قلت افك شوية الحصار اللى انا عاملاة عشان امتحانات الابتدائية اللى انا داخلاها دى ..حد يكون فى ماجستير و يمتحن 4 ايام ورا بعض زى العيال كده..و كمان اه انا خرجت شوية اشم الهوا و اكول ايس كريم قلت اكتب حاجة قالهالى زميلى و هو بيتغزل فى اى حد والسلام ...اسمه عبمجيد..بيقول :
ما بخافش من الضلمة و لا العفاريت
و حلفت مرة لأنتف شنب عفريت
مرة راجع و ماشى جنب البيت

لمحت خيال جزمتى...جريت

....يمكن كان بيتكلم علييا ؟ يمكن عشان لسه ما عملتش حاجة فى المشروع؟ فى كل الاحوال كلنا ضحكنا من قلبنا عشان بنحاول نعمل من الفسيخ شربات و لكن هيهات هيهات ,كل لما نعمل خطوة فى المشروع,نقف و نتنح و نتنبل لسنوات

موسم

نظرا لهجوم موسم الامتحانات و انتهاء مدة تسليم مشروع التخرج من دبلومة الايه يو سى ,فقد تقرر الاتى:
فرمان:قرار ديكتاتور رقم473 لسنة 2007 :
قررنا انهاء كافة التعاملات مع النت و البلوج حتى اشعار اخر ..
ذلك و بالله التوفيق

سبع صنايع

طبعا كل اللى يجى البيت عندى حيلاقى دلوقتى جنب الجرايد و الكتب ,شرايط فيديو..ايوه يا سيدى هيه دى ..اهه شرايط الطبيخ ..سؤال يطرح نفسه :طب ليه بتعلم الطبيخ دلوقتى ؟..عشان أبقى بطبق الاقتصاد (و الله مش البخل)فى بيتنا ..طب ليه بردوه؟اصلنا مش مقتنعين..عشان معييش فلوس: استريحتوا ؟ نفسى اعرف بتضحكى ليه يا منى لما بقولك انى بطبخ؟و الله ده الطبيخ شبه الوقفة فى العمليات ..بس الفرق انى اذا ما لبستش المريلة فى المطبخ "نو بيج دييل" بس اذا نسيت ألبس الماكينتوش(ليه يا ربى الماكينتوش ده مش بيتاكل؟)فى العمليات بتلحوس بالدم ..دهوله يعنى و ببقى بايظة خالص ..اخر انتاجى ايه؟ شوربة العدس مع بصل اخضر ..و ردا على التساؤلات اللى وردتى من صحابى ,حرد عليكم اهوه و اكشف شوية اسرار من مطبخ ريهام:جيبوا حلة +شوية عدس اصفر ملو كبشة أو اتنين+قطعوا بصلة+توم+طماطماية ..حطوا ميه على كل ده و حطوا الحلة على النار..من30-45 دقيقة حيبقى كل ده بالوظة و دايب كله ..سيبوا الحلة لما تبرد..اضربوا كل اللى فى الحلة فى الخلاط و شوية زيت خفيف يكونوا فى حلة تانية على النار بيتحمر فيهم لسان عصفور ..و اللا بلاش ده عشان أنفلوانزا الطيور..خلوها شعرية ..لما الشعرية تتحمر حطوا عليها المضروب فى الخلاط و سيبوا كل ده على النار لحد لما الشعرية تستوى وبالهنا و الشفا

باليه النيل

لييا علاقة و لا مؤاخذة خاصة بالنيل من أول مين اطول نهر فى العالم و اللى حتى الان مش عارفة و الله هو نهر النيل و اللا المسيسبى بس اكيد هو المسيسبى فى ظل عالم احادى القطبية..انتهاء باختيارى مكان سبيشيال قلت عليه هوه ده لما اتخطب ابقى اجى هنا معاه يمكن ربنا يفتح عليه و يقوللى كلام حب و اذا اتهور شوية ابقى ارميه فى النيل ..و لكن نظرا لانى مفيش حاجة تيل ناو قلت اعدى كده على المكان اللى لقيتوه بقى وكر لا مؤاخذة..طبعا مشيت بس مكنتش زعلانة هوه ايه اصلا اللى متغيرش؟..لسه شايلة جواية ذكريات حلوة للنيل ..و ربنا بيزودلى الذكريات الجميلة للنيل يعنى لما اتعزمت فى فرح كان فى مركب راسية على النيل-اقتصادى و رومانسى و الاكل مش بطال و الله فكرة احسن من الاوتيل-و انا ببص من الشباك من خلال الازاز -عشان زهقت من شكل العروسة:ايه ده؟عروسة المولد؟-الدى جيه الله يكرمه شغل اغنية سلو بعزف بيانو و طلعت اغنية اليسا خلينى اعيش ..و مع شوية دخان الوان فكرنى باخر اعتداء لاسرائيل على رام الله و اللى جابتة الجزيرة على الهوا من كان يوم..كان جو جميل و لقيتنى سبت فكرة:"الويز ذا ميد اند نفر ذا برايد"تترمى فى النيل و افتكرت فيلم ماى بست فريند ودينج لما جوليا قامت رقصت و هى بتضحك فى اخر الفيلم و كانت ناوية "تو لت جو"..ابتسمت و كنت مبسوطة..مرة تانية كنت بتمشى على كوبرى قصر النيل و بصيت للنيل :هى ليه ميته دى مش بتندلق من على الكرة الارضية و هى بتلف؟و افتكرت قوانين الفيزيا و ابتسمت..مرة و انا فى سنة خامسة شفت اعلان :باليه+عزف بيانو فى الاوبرا لعمر خيرت فى استعراض جديد اسمه باليه النيل..لبست شيك و رحت ..عمرى ما حنسى الجمال و الروعة و الاحساس التحفة اللى جالى و انا هناك ..كان من اجمل الحاجات اللى شفتها فى حياتى ..بغض النظر انى شفته 5 مرات فى الاوبرا ..مش قادرة انساه ..زى ما انا مش قادرة انسى الفيلم عن اينشتاين و لا عن الكوانتم و لاعن دوومز داى..و الباقى فى الذكريات الحلو بقى بخليه و الباقى برميه فى النيل ..بس لما بحب اغسل بغسل على البحر ..اسكندرية بالذات مش اى حتة..مع شوية لف فى خالد بن الوليد على سابا باشا..و مع اول قطمة فول على شوية جمبرى على برارس بانسى كلة و يا سلام بقى لو شوية شاى بنعناع على البحر قرب العصر و الشمس بتلم الشنطة عشان ماشية و يا سلام لو احمد اخويا ما نامش منى فى السكة عشان انا كمان بنام الصراحة و كنا اخر مرة حنخبط على الصحراوى ...بتبقى اجازة فلة..بس دلوقتى مفيش باليه و لا فى النيل .. ..

الزراعية و المؤتمر السنوى

لهث لسانى بدعوات على اللى رصفوا السكة الزراعية من نوعية :الهى يقف نموكم الهى يجعل حياتكم سداح مداح يا بعدا و سرحت كده شوية و افتكرت سيدنا عمر لما كان بيفكر فى بغلة ممكن ان تتعثعلى الطريق و فين؟ فى العراق عشان مش مرصوف كويس..كان بيعمل "مونيتورينج باى ووكينج اروند" و يدخل تعديل على طول فقيل له "عدلت فأمنت فنمت"و ده اللى كان احمد زكى عاوز يقوله فى "معالى الوزير"بس طلع نابه ازرق فى الاخر..فقت من السرحان على مطب هبد على العصعوصة فطلع اثر الهبدة على المخ قامت اتولدت ذكريات عن المؤتمر السنوى بتاع حوادث الطرق ممزوجة بيفط زى:سكة السلامة يا أبو اسراء-مون سولار لو سمحت -عاوزينك يا بابا-الحلوة دى من اسكندرية-ليالى العمر معدودة..كككككككككل سنة نفس الكلام يعنى هما 4 اسباب:السواق-العربية-الطريق-الجو(يشمل معناه المناخ و المززة لا مؤخذة)...مش عارفة ليه افتكرت حادثة الفرح دى دلوقتى : كنت نايمة على الكنبة جوه المكتب و بعدين امينة دخلت:دكتورة-ايوه -فى حادثة -طيب ..و انا بألبس البالطو و السابو:هما كام ؟كويسين؟فيه ارست(توقف القلب و النفس)؟حد دخل الرعاية؟-كلهم اوكيه ..خرجت جرى فى الطوارئ(اصلا كنت بألبس و انا بجرى مع أمينة)..و شفت منظر مشفتوش فى اى مكان تانى:كل الفرح بجميع انواع اللبس و المكياج و الفورمات كانوا فى الطوارئ...دوله كام دول؟ايه الفايتل ساينز؟(علامات حيوية)..أمينة بزغرة:قولنا كلهم اوكيه ..انا بقى:ايه اللى حصل يا جماعة؟..فى نفس واحد:وقعنا بالعربية من على الكبرى ...أمينة ..سماح..بكرى..فاطمة..ده ترياج ده؟(تصنيف الحوادث الى درجات من الاخطر الى الاقل )..ياللا كله يتعمله تشارت ...رفعت السماعة:باشا ..-ازيك يا احمد,كووول(من صنف النداء التانى و الاخرانى) والنبى لكل طقم الحوادث و كمان لمشرفة العمليات..بس الليلة مرت على خير و طلعوا كلهم اوكيه و استمرت أمينة فى الزغرة و فاطمة فى المتاوبة و بكرى بيقوللى :عفارم..اهى دى حادثة كان سببها الاستعجال من قبل الموززة على الجواز..اهو كانوا رايحيين الاخرة

certain disconnections :from 30/12/06-6/1/07

1-between:the tube and the ventilator?death of so3ad nasr
2-between:neck and body?8-10yrs old boys one in texas and one in pakistan hanged themselves by mistake immitating saddam's execution(remember farafiro)
3-the 13 knights' disconnections
4-between:happy(eid and year) and having exams!!
5-between saddam and the real world,leaving it with famous three words:ya7ya al iraq,felestine arabia,ALLAHO AKBAR
6-between wael and his study(my baby bro)
7-between us and the land beside us:samir's death
8-between what we have studied and the real exams

مجرد تنضيف

تم بحمد الله و توفيقه الانتهاء من ترتيب المكتبة سواء فى القوضة اليمين او الشمال و طبعا تم رمى كتب طب بالكيلو غير مأسوف عليها و تم كسر زير وراهم...كانوا كابسين على نفسى يا ساتر.. و نظرت فوق الدولاب :"يا لهوى" حيث انه قد هوى علييا كومة كتب فيها بق مفتوح بتاعة اسنان تبع اخويا يعنى..قمت من تحت الكومة و انا ما زلت اسمع تهديدات ماما : و الله اذا ما لميتى المكتبة لانا عاملة و مسوية..طب ما تعمل هو انا حيهمنى.."و كمان حرمى ميكى "..كله الا ده .."و رجل المستحيل"..لأ مش قادرة اسمع كفاية!..المهم اليوم انتهى على لم اللازم و رمى اللى مش مهم ..بس وقعت فى ايدى شوية كتب تجنن..افتكر انى كنت اشتريتها من عند اكشاك الكتب القديمة فى السيدة زينب و دى لما اشتريتهم كانوا صفقة و ربنا هو اللى خلانى اروح اليوم ده بالذات حيث اننى كنت راجعة من جامعة عين شمس و ركبت سى تى ايه غلط و قلت انزل السيدة اهو اقرالى الفتحة او اشرب شاى على القهوة و دى هواية جديدة لييا بنميها..قامت الكتب دى لقيتها كلها امامى ..و طبعا كان الجيب دفيان فدفعت 36 جنيه فيهم ..هم 15 كتاب ,مجموعة الاطفال بتاعة شارلى براون عن كل شئ فى الكون ,واللى ظهرت لييا انها مهمة لييا برضه نظرا لانشغالى بالطب لدرجة انى نسيت باقية الحاجات التانية فى الدنيا ما عدا الجزيرة طبعا اللى هاريانى اخبار على رأس الساعة..الكتب جميلة و لذيذة و يا اما حقراهم لأولادى فى المستقبل ان شاء الله يا اما حجيب بطانية و اقعد اقراهم لوحدى جنب الدفاية

هذا انا ادم

لطالما اتجننت و فكرت فى فارس الاحلام الوردية او حتى احلام الداى دريم اللى بتطرى على الواحد و هو مزنوق فى اشارة او الولد بتاع الميكروباس يكون زنقه عشان قاعد على حجره فى ميكروباس مليان و لطالما شفت فيلم احمد و منى و عيطت فيه ايام الهبل فى ثانوى و لطالما شفت صحابى بيتجوزوا و يد وحسوا بعد كده مش بروبلم المهم نتجوز يا ريهام -كتير قعدت فى البلكونة اشرب شاى بنعناع و ابص للقط بتاعى و هو بينونو عشان انا مطنشاه شوية و معملتلوش البيضة البرشت بتاعته و هو جعان-بيبص للشاى و مش عارف ان صاحبة الشاى مخها سارح فى ملكوت الله الواسع تتسأل:هو يا ربى كل الناس الكتير دول اللى فى المترو وبشوفهم كل يوم و لسه انابدور على ادم واحد ليه بس البسوورد بتاعته معايا انا بس و لسه مش لقياه؟ فقت من التساؤلات و السرحان على رنة الموبايل : -الووه-ايوه دكتورة ريهام؟-ايوه-بونجور دوكتوور-بونجور؟؟؟-وى-وى!!!!!-انا ادم -ادم ؟
و اصابنى الذهول مثل الذى يصيبنى لما عربية طايشة تطرطش عليه ميه فى يوم شديد البرودة ...ادم مين؟اااااااه ادم بتاع سفارة بوركينا فاسو ,ازيك يا ادم؟ كلوا سنة انت طيب...و بعد السلامات و عزومات المراكبية كان بيعيد عليه الصراحة كتر خيره,انت بقيت مصرى واللا ايه يا ادم؟و.. قفلت السكة ....و سرحت للمرة التانية- شكلى فاضية النهاردة ...و سرحت و دعبست فى اغوار نفسى البشرية مررت بذ كريات و حكاوى و مجلات ميكى و ماجد و جرايد عادة و صفرة اللى لقيناها فى قوضة مقفولة فى المستشفى و اللى موضوعاتها يضحك من هطلها الولدان ..و جرنان الدستور و مجلة العربى و الناشيونال جيوجرافيك و التايم و نيوزويك..لحد لما جت صورة الفونسو ..ياااه هو انت لسه موجود ؟مش انا عملتلك دليت ؟...يحكى ان الفونسو كان ملحق سكافى لدولة افريكية شكيكة الصراحة ,و مرة اتعزم فى مؤتمر تبى برضه مش عارفة ازاى قام وقع فى غرامى انا بسأل بس ازاى؟ كان راجل بيلعب فى دور التمانين و لسه بيعرف يحب؟ سؤال طالما داهمنى و انا بتفرج على الماتش بيننا و بين نفس دولته و كان يوم جمعة فى فبراير نفس يوم غرق العبارة...بس كسبناهم..قبل البطولة كنت اديت لالفونسو بوكس فى وشه و عملت دليت لمعرفة لم تولد و لن تولد و برغم توسلاته و بكائه-كل ده فى التليفون -كان كل ردى انت جبت نمرتى من فين يابا؟...ألفونسو مهما حصلى انت مش فرصتى و انت بصراحة عمرك عمرك محتقوللى :هذا انا ادم ..حيث اننى ما زلت ابحث عنه و اتمنى من الله و لا يكتر على الله انى ألاقيه فى الدنيا دى قبل مفطس

اتوبيس كومبليه

الاتوبيس دايما كان بييجى الساعة سبعة الصبح و نفضل نلف نلف نلف و ادوخ انا بقى -ده كان اول مرة اعرف ان ممكن اعمل تايم مانجمنت و انا فى الاوتو بتاع مدرسة المير دى ديو نمرة 6 ده كان فيه احلى تايم مانجمنت كنت بذاكر فيه و انقل فيه الواجبات و يبقى اليوم مش فايت لو اللى بتعمل الواجبات مجتش ,مش فاكرة امتى العربية دى عملت غرزة قدام الاوتو و جت قدامه عشان تدخل بسرعة القصر العينى ساعتها سبت السندوتش اللى فى ايدى, ده اكيد عشان اتقلبنا كلنا من على الكراسى بس انا قمت و عدلت طقم الاطفال اللى كان جنبى و بجوار الصرخات و العياط بتاعهم انا فتحت الشباك و بصيت ايه دة؟مفيش داعى للسرعة اصلا-طبعا دلوقتى هاه :) مش بقول كده انا ممكن اسب و العن و يمكن ابيته فى السجن بس الطيب احسن انا بشتم بس اصل من غيرها السواقة متنفعش-المهم اللى قلبنا تحت الكراسى دة كان فى فولكس-كمان فولكس امال لو كرايسلر كان عمل ايه-بصيت لقيت علامات تدل ان ده القصر العينى -و يافطة هبلة كدة بتقول طب الاسنان-مممممم هو انا كنت ناوية على هندزة بس ياللا الطب شكلوه روش-و مرت الايام و مرت السنوية العامة اللى ظقلت فيها طبعا و دخلت برجليه اهه و الله برجليه الكلية دى كلية تب الجصر و مرت سنة و التانية و التالتة و الرابعة و الخامسة -كفاية بقى نفسى اتقطع-كملى يا بنتى هانت -و السادسة و الامتياز و جت قاعدة النيابات فى قاعة المؤتمرات و طبعا مليش نيابة - و ده كان اول قلم حقيقى فى الكاريير بتاعى ...بعد كام شهر:-ترررن-ايوه زق كده نظرا لتطور الميول العدوانية عندى لتعدد و توالى الاقلام على القفا-انا نرمين مالك يا بنتى ؟-و النبى بلاش مالك دى عشان انا بايظة من ساعت النيابات -ما عش اللى يزعللك-ان شا لله -عندى ليكى ...-اوعى تقولى زفت عريس كفاية ضرب على القفا-لأ الوزير منزل لكل الاوائل نيابات فى المستشفيات المتميزة-و النبى ؟-اه و الله و انا رايحة الهرم-و انا بقى حروح شبرا -ياللا على البركة-ايه لغة الميكروباسات دى؟-محنا لازم نتعود يا ريهام-على رأيك يللا سلام .......لم اكن ادرى ماذا يخبئ لى القدر و لا حتى كان فى اى علامات فى الطريق طب امشى كده و اللا احود شمال و اللا ايه حد يرد عليه...لا الكلام بينفع و لا اللوم و العياط و فضلت اتكلم و ادعبس فى كل حتة و فى كل حتة :معاك كارت تسوى معاك قرش تسوى ..مش معايا يا جدعان ..طب طريقك اخضر بقى...اكيد اخضر مش بتعب ..و مشيت لوحدى و بدل ملعن الظلام شلت شامعة و نورت ان شالله سهارى بس نورت و تانى عجلة الايام مع عجلة عربية الاسعاف تلف و ما بين اسعاف يشلنى و اسعاف يحطنى نزلت استريح شوية و اشرب شاى مع بتوع الاسعاف و ما بين الشاى و القهوة و لقمة الفول من الشبراوى و جرنان المساء من محطة متروالخلفاوى...داهمنى شعور لم اعرف معناه لأول وهلة و لكنى شعرت بقفايا ينزل عليه قلم و اعطيت معنى لهذا القفا حيث اننى تذكرت فجأة انى لسه مسجلتش الماستر..اه صحيح هو انا نسيت ازاى يا منعم؟-هوا يا داكتورة اللى بنشوفوه قليل؟ فاكرة اخر طلعة اسعاف لما كنا فى الحريقة-اهه و نقلتونى انا لما كنت حتخنق طب فاكر البيت اللى وقع؟
-اههه طبعا طب فاكرة سيادتك لما...-كفاية انا لازم اسجل ماستر-عين العقل.....و تانى دارت عجلة الايام بس من غير عجلة الاسعاف عشان مش فاضية لأمها دلوقتى و تذكرت حالى و حال العيانيين و تذكرت اكثر اللى ماتوا و ايام النبتشيات المئسوف عليها و على سعرها و تذكرت شغفى للعلم بالرغم من ان شغفى برغيف العيش اولى بس برضه عافرت...و مر الفرست بأحزانه و اتراحه و نيلته غير مأسوف عليه و على ايامه و على ورقة الاناتومى اتشريح بالبلدى اللى سابت كل حاجة و سألت على تشريح اللسان ..و بالرغم من عقم اسئلة الشفوى اللى يتسابلها بلاد مش بلد واحدة كملت برضه السكند ...ايام تشيلنى و تحطنى لحد ما اخدت عنوان رسالة يتيمة و شكلها كده ابنة غير شرعية بس اتبنتها و توسمت فى امها الرقى و التقدم و لكن تأتى الحاجات بما لا تشتهى السفن و جه الطوفان و مش عارفة لما جه ليه عندى احساس غريزى و عدوانى فى نفس الوقت انى احط الرسالة تحت رجليه و اطنش :-مطلوب مبلغ و قدره4000 باأثر رجعى مننا يا ريهام-انا كنت حاسة بالطوفان جى يا جدعان-و حتعملى ايه؟-هو بتاع الدراسات العليا قاللى يا الدفع يا..-يا ايه؟- يا اما تنضمى لفريق اللى مش عاملين ماستر عشان خلاص اللى خلصوه مالوا الاتوبيس و ده مش اتوبيس مدرسة مهوى ده بقى اتوبيس كومبليه -

التوم التوم التوم-حيرنى-التوم التوم-نيمنى- التوم اتوم

انا ملياش اوى فى الفتة و الصراحة انا دبتها فى اول يوم العيد و ندمت بعد كده( لسه ضاربة قلقاس من شوية)عشان جالى اسهال لدرجة ان امى جابت معطر للحمام-قمت قفلت بقى خالص مش طالبة معايا انتينال فى العيد(عاملة لينا اكل بايظ يا ماما؟)و اللا السبب اللحمة: معدتى مسد قتش ان فى حاجة اسمها لحمة و قررت تتخلص منها عشان اعتبرتها سم؟-معرفش-المهم قمت ألف و أدور فى البيت مش طايقة انزل عشان ريحة الدم-طب ليه باستحمل ريحة الدم فى العمليات و هنا لأ ؟سؤال طالما داهمنى فى اوقات العصارى وانا بشرب الشاى ابو نعناع-و التى فى الصراحة فقعنى كله قديم الا فيلم كيف الحال ده كمان -جه على الال بى سى كمل علييا الصراحة-مبقتش تانى يوم العيد عارفة اعمل حاجه الا انى اشوف الجزيرة و ماكولش لحد ما جه تالت يوم العيد و كنت حتهور و اكل -بس قلت لأ كبيرة فى وش طبق الفتة-جه الليل بقى-حموت من الجوع و كمان الجزيرة بأخبار اول السنة و غرق سفينة و وقوع طيارة و دخول رومانيا الاتحاد الاوروبى-رومانيا؟؟؟ الله يرحم-كنا زمان فى طب اللى جاى معانا من سنة تانية من رومانيا كنا بنبصله من فوق لتحت الصراحة:ياى!!!ولد خيبان مجبش مجموع-قمت عملت طبق فول و اكلت-قلت اجرب حاجة جديدة:اكلت على المسى كام فص توم -صينى-بس كان كبير الصراحة كتر خيركم-بالصراحة ظبطوا بطنى و قلبونى انام-قمت على تليفون جايب بشاير السنة الجديدة:مسمعتيش اللى حصل؟-لا و الله اصلى بضرب توم من كام يوم ايه اللى حصل يعنى؟-صح النوم -طيب ايه اللى حصل؟مش كفايه حيخصخصونى-مش انتى بس-افندم ؟ طب ممكن اصوت-اللى صوت صوت من زمان,حيبيعوا الكلية-يا لهوى!-اه و الله-كل سنة و انتى طيبة مرسى قوى على المعايدة دى و انا اصلا ناوية اروح بكره للاستاذ ده بتاع الدراسات العليا و اقوله و انبى يا عم لفلى الفرست و السكند فى ورقة مش حعمل رسالة مش معايا 4000 جنيه اللى حتلموهم منى بأثر رجعى مش لاعبة -هو فاتح بكره-ايوة حروحله و اطلع اجيب بن من عند عبد المعبود-طيب-على الغموم انا حاقوم اضربلى توم عشان شرايين القلب اللى ورم من اللى احنا فيه مش احنا برضه بناخد208 جنيه فى الشهر-ايوة-طيب نجيب بيهم توم و بن -طب حنعمل اية؟-هوا حد اتكلم و اللا اعترض-لأ-طالما مفيش ايد و احدة مفيش تشانج حيحصل -و الحل؟-نضرب توم!-

يا بيئة

جابوا من كام يوم فيلم ثرى كينجز , بغض النظر عن المرتزقة اللى سرقوا الدهب,جابوا فيه لقطة عن تلوث النهر بالبترول مع شويه طير كدة ميتة و اول امبارح فى الجرنان اتكلوا عن البيئة-طيب فين اتفاقية كيوتو ؟ انا مش عاوزة اتكلم بس-كفاية اللى باشوفه على الزراعية-الحمار اللى كان ميت على السكة شفت كل مراحل تحلله و كفاية الريحة-اف!-مش ده برضه تلوث ؟و بعد كده عشان يتخلصوا من الحمار ممكن يرموه فى الترعة-عادى يعنى ايزى يا سيدى و بعد كده انا اجى اشرب من الميه دى-طيب فين المصارف يعنى اللى تلم الميه البايظه دى ؟
-طب حنعمل ايه يا ست الداكتورة؟ندفنه؟
-يمكن او تحرقه
-لأ بلاش نحرقه كفاية بنحرق الزرع الميت و شجر الموز العيان
-حتدفنه؟
-اه يا ست
...و تم الدفن بجوار الميه الجوفية-ولا عزاء فيكى يا بيئة