كلنا لازم نغسل

لازم كلنا نغسل..ايوة طبعا ..يعنى انا مثلا النهاردة كان عندى امتحان بس غسلت برضه..اينعم هما كوبايتين غسلتهم قبل الامتحان و بعده غسلت شعرى ..بس اسمى غسلت حاجة
فى غيرى بيغسل بالمشى او باى نوع رياضة
فى غيرنا بيغسل بالاكل او السيكوسيكو
ساعات انا بغسل بالشوكولاتة
زمايلى بيغسلوا بالسجاير
عندى زميل برضه بيغسل عن طريق انه ينزل يمشى لحد مبنى التليفزيون و يرجع تانى
اصل اللى كان شاغل دماغى النهاردة ان فى دكتور عنده منحة للدكتوراه فى اليابان و فجأة نتيجة الضغط انفجر و اهو بيتعالج و لا طال اليابان و لا امريكا
ده خلانى افتكر حسن الله يرحمه ابن عمتى
و افتكرت زميلى اللى انتحر فى تالتة
واللى انتحر فى سنة البكابورتوز
وزميلنا اللى قفل الشقة على عياله وفتح عليهم الغاز لولا ستر ربنا
و افتكرت مدبحة فرجينيا تك
هو ايه اللى بيولد الدمار ده كله من شخصية عادة مسالمة ؟
الضغط الجامد و عدم التنفيس
عدم اخدان النفس
عدم الروشنة شوية و بعدين نرجع للقرف تانى
احنا مش مكن يا خوانا
لازم ناخد فترة بريك والنبى
الدنيا حطانا فى ساقية
بس لازم ناخد جنب شوية نغسل فيها دماغنا بأى طريقة
و بعدين نرجع حلبة السباق من تانى
لازم كل واحد يغسل بطريقته الخاصة عشان ينفس شوية
لازم يستعمل اى نوع من ال
safety valve
عشان يقدر يكمل
وبعدين اللى ميتعملش النهارده يتعمل بكرة طالما انى تعبان اوى مش كسلان اوى-فيه فرق طبعا
فى ناس بتعمل مساج
فيه بيلعبوا سباحة
فيه بيتعلموا تانجو
اى حاجة تطلع اندورفين يعنى
عشان الدماغ يروق كدة و يتغسل

و نقدر ننجز