دفاعا عن مروان

عمتى ليها صاحبة ..وشوفوا بقى لما عمتى يكون ليها صاحبة
اللى يعرفنى من قريب عارف عمتى كويس قوى
أقوى شخصية رأسمالية فى عيلتنا
يا لهوى لو عمتى بتقرا الكلام ده
ما علينا
صاحبتها بقى قالت لماما وماما قالتلى ان قلب امرأة أنضف مسلسل يتشاف
قلت أبص بصة ..أهو ميزو قرب يخلص_خلص امبارح يا خسارة_وبالمرة ممكن يطلع كويس
لقيت الكاتب بتاعها تقريبا مجدى صابر على ما أظن
قلت الاسم ده مش غريب علييا
سمعته فين فين ؟
كنت بدعبس على كتب فى قوضة الفار اللى انا فيها دى
مش وضبت مكتب الكمبيوتر ؟ اه والله واخيرا اخيرا لقيت انى عندى كى بورد
قوم ايه بقى..لقيت قصة من زمااااااااااااااااااان عندى كنت اشتريتها من يجى مليون سنة كده فى المعرض
اسمها عريس فتكات ..اه والله مش بهزر
والكاتب مجدى صابر
قصة عنيفة وكوميدية طحن
لفت على صحابى وصحاب صحابى وصحاب اخواتى وبعدين رجعت بحمد الله عشان تتحط فى الدولاب جمب العرايس واللعب بتاعت زمان وجمب الطوابع اللى كننا بنجمعها
مش عارفة القصة دى لسه بتتطبع واللا لأ
بس جامدة جدا
الحمد لله انها لسه موجودة عشان بقى عيالنا وعيال عيالنا كده يتسأفوا بيها
المهم الكاتب ده هو اللى كاتب قلب امرأة
مروان بقى عاجبنى ليه ؟
النهارده مثلا ادى مراته اللى هى الهام شاهين ..شيك هدية ليها ب50 ألف جنيه تتدلع بيهم
فيه رجالة كده ؟ أكيد مروان ده كائن أسطورى هربان من المتحف الجيولوجى والميتافيزيقى كمان عشان يمثل الدور ده ويرجع ينقرض تانى
انا مش مصدقة ان فيه رجالة كده
الفلوس طبعا عسل
بس شوفوا الشخصية ؟
انا مش بتكلم عن ماجد المصرى نفسه
انا بتكلم عن الشخصية اللى قايم بيها
فكرنى بأستاذ التخطيط المالى فى الترم اللى فات من سنة كده
كان شبهه وشخصيته كمان كانت عجبانى قوى
الله يمسيه بالخير ..شخصية ناجحة بجد رجعلى الثقة فى الشباب المصرى
ما شاء الله واخد دكتوراه من هنا وواحدة من ألمانيا
كنت حقف له احتراما وأرفعله قبعة
والله فهمنا حاجات كتير ربنا يوفقه بجد
شخصية مروان بقى قوية فى ايه ؟
انا بقول ان قوة الراجل فى حنيته على أهل بيته
وده شخص قلبه أبيض من جوه وشخصية متزنة ومتسامحة
شخص مش غاوى نكد وعاوز يعيش ويسعد اللى حواليه
هى دى الشخصية اللى الواحد محتاجها
معاه بقى فلوس كتير أو قليل مش هو الاساس
الاساسى هو المعدن الحلو
خصوصا انه شهم وبيحب مراته جدا ومش عاوز يحرمها من حاجة ابدا
بالاضافة كمان -ودى داخلة دماغى قوى خصوصا انى بدرس ادارة مستشفيات -انه بيحب يجازف ويدخل مشاريع بعد ما يدرس السوق ويعمل الميزانية بتاعته ويتوكل على الله ويدخل فى المشروع اللى مراته اقترحته
يعنى شهامة وشخصية حلوة وقلب طيب وحنين وراجل بيشتغل بايديه وسنانه عشان يجيب القرش الحلال بقلب جرئ
شخصية قوية بس مش قاسى ولا شديد
هوده ليه انا معجبة بمروان
يا ريت ما يتنكدش علييا ويموت واللا يتقتل واللا يخش السجن
عشان حزعل على الشخصية الفلة دى
يا ريت يستنسخوه
ويدونى واحد