بكرة

بكرة ان شاء الله حيبقى أول يوم نزول فعلا للشغل والمعجنة من جديد..انا يتهيألى انى مكنتش فى اليابان ..انا يمكن كنت بحلم ..بس السفر كان حقيقى والعياط كان بجد مش هزار..والبروفيسور اللى مطنشنى برضة بجد..ومن مكانى هذا-قوضة الفيران -بتسأل يا ترى هو مطنشنى ليه ؟..لا أسكت الله لك حسا يا بروفيسور..سايقة عليك سيدنا النبى لترد على ايميلاتى ..الجيت لاج عسل المرة دى ..بنام عشان أقوم وانام تانى أصلى قريت انى ممكن اخود انتى هيستامينيك قبل الطيران عشان امنع الجيت لاج..هو منعه بس بنام بقالى اسبوع الصراحة ....نمت شوية فى المترو وانا راجعة من السينما..أمى طبعا بتظألطنى فى العيد بقى....والعيلة جاية تشوفنى وانا راجعة من اخر الدنيا..وحياتكم ما فى حاجة اتغيرت..يمكن البروفيسورات اللى ادونى على قفايا زادوا واحد....ربنا يسامحكوا بعد ما فتحتوا نفسى على البلد حسيت انى اتكبست كده كبسة اللحمة فى الحلة..كنت مستعدية اى يابانى يقوللى انا معجب انى انزله مصر ونتجوز على طول بدون اى طلبات...ياللا ملكوش من مصر نصيب..طبعا بعد ما كنت بشوف أشكال تشرح القلب بما فيها فار التجارب..نزلت مصر بقى اللى الوشوش فيها محدش بيبتسم خالص..ولا حتى ابتسامة صفرا..العيال امبارح سافروا من ورايا المنصورة يحضروا فرح واحد صاحبنا منعرفوش-ملعوبة -وبعدين قوم ايه انتيمى فى قسم الجراحة والعياذ بالله فجأة عايز يتجوز والسنيور بيقوللى دوريلوا على عروسة..مكدبتش خبر والله بحاول أوفق راسين فى الحلال..سألت السنيور معندكوش واحد لييا؟قاللى المستشفى جابت دورافها ..قال يعنى انا مكنتش عارفة..انا والله كنت بسأل من حلاوة الروح بس..بس انا عرفت انى حلاقى نصيبى برة ان شاء الله اللهم امين...انتيمى بقى اللى كنت فاكرة ان وشة مكشوف..أول ما جبت سيرة العروسة وشكلها ايه وبتعمل ايه وكلام البتاع ده واحنا بناكول الرقاق مع الشاى فى القوضة العزيزة ام ريحة زبالة واللى لقينا فيها جرايد صفرا من كذا سنة-بقت مليانة كتب جراحة الله يقرفكوا-أهم حاجة انى سربت الرقاق من على البوابة..المهم مع سيرة العروسة لقيته وشه احمرررررر قوىىىىى لدرجة انى قعدت ابص للرقاق بتاع امى ..هو ده بيدى طاقة كده ؟ أمال انا وشى محمرش ليه..ببص فى المراية وشى اصفر والروج بتاعى مبهت وشى اكتر..بصيتله لقيته بيبص فى الارض وودانه بتحمر..انا شفت الكسوف اللى على اصله فى اليابان بس فى مصر مكنتش اعرف انى زميل التطفل الطبى والجراحى والادارى بيحمر كده...ربنا يستر على الصالون بتاع بيتنا..اصل اول ميتينج مع العروسة حيبقى عندى فى الصالون..حلم كل الفازات والحاجات اللى ممكن تتكسر وأخبى القط بتاعى ..واخودلى ساتر