وردتين

وردتين صحاب...جنب بعض من فترة..جدرهم واحد بس ليه فرعين ..فرع شمال وفرع يمين..الاصل واحد و الجدر واحد والمكان تحت الشجرة العالية..الوردة اليمين ملهاش حلم..عايشة كل يوم زى ما بييجى طالما بيتقضى يبقى خلاص..مش بتحلم..تسمية خنوع تسمية خضوع سميه زى ما تسميه..الوردة الشمال بتبص يمين وشمال وفوق وتحت..كونت حلم فى دماغها: يا سلام لو أطير لفوق فى السما يا سلام لو احس بنور الشمس على وشى ؟ يا سلام لو حسيت بملمس الارض؟..الوردة الشمال حلمها مخليها تتحرك..بتشد جدرها بتشده جامد..مش عارفة تقطع نفسها من جدرها..يأست بعد محاولات كتيرة ولما خلاص حتستسلم زى صاحبتها الوردة اليمين..جه ولد صغير قطفها..بيضحك بصوت جميل وبيطوح الوردة لفوق و لفوق و لفوق..الوردة تضحك وتفتح اكتر وتنور فى السما..تضحك وتضحك..سعا
دة ملهاش حد و لا ليها حدود..الولد زهق..رماها على الارض..الوردة بصت لنفسها وشافت الحقيقة..مخلوعة من جدرها ووحيدة..تعبانة وهزلانة..مفيش ميه واكل..ابتدت تدبل وحتة حتة تقع منها ..ورقها اصفر..زحفت على الارض لحد ما وصلت لصحبتها..بصت لها بعيون هزيلة..رفعت ايدها ليها..الوردة اليمين مدت ايدها ليها وبتبص لها بحنية..مش وقت عتاب ولا لوم ليها..هى حلمت وجريت واتمتعت بس زى كل حاجة فى الدنيا..لما تشوف حلمك حقيقى قصاد عينك وتعيشه لازم تدفع تمنه..الدنيا كده..التمن كان مش لطيف..الوردة الشمال ماتت فى حضن اختها..يا ترى انت حتبقى انهى وردة فيهم ؟