kodak...red carpet

they are arriving..am waiting empty headed...no dashing or crashing ideas in the 2007 movies like the ones of the last year....ok i will follow the doctor's policy , the usual one, wait and see ...

a cadeau for her 32nd birthday

نفسى بقى فبراير يعدى .....مكانش مظبوط علييا قوى بس الحمد لله...هو اينعم اقصر شهر فى السنة بس دايما بيبقى طويل قوى مش عارفة ليه...حتى ايام النبتشيات كان كده..و النبى يا رب انا فاضللى شهرين و ييجى عيد ميلادى ..و النبى يا رب تفرجها من عندك..نفسى اعدى من الباب و اوصل للى انا عاوزاه..السكة طولت قوى و الناس مش حبين لى اى نجاح و انت عارف ان وسطى بيتقطم عشان اعمل خطوة لقدام..انا بحارب لوحدى يا رب... ساعات بخاف عشان السكة ملهاش ملامح و كل ما امشى خطوة المشوار يزيد خطوات و بقعد اراجع نفسى كتير و احسب مقياس النجاح بالنسبة لى كل شوية..و ساعات ببقى مطمنة......و النبى يا رب اعدى من الباب و استريح..و النبى يا رب اوصل ..و النبى يا رب نفسى ارتاح..و النبى يا رب اغسلنى بنورك و خلينى اشوف بنورك و بقوتك يا رب و صلنى للى عاوزاه و انصرنى بقوتك فى المكان الجديد..نفسى اعمل اللى عاوزاه قبل معجز و قبل ماموت..و النبى يا رب ادينى من نورك و من قوتك طاقة عشان اكمل و انتقم من المؤذيين...ربنا و لا تحملنا ما لا طاقة لنا به..و لا حول و لا قوة الا بك.. يا رب نفسى اعدى و اوصل بالطريق الصح و انا متوكلة عليك يا رب..وصلنى يا رب للمكان الجديد..ادينى و النبى فرصة تانية يا رب..مش انا كنت ملتزمة و بطيعك؟ و النبى يا رب و صلنى للمكان الجديد..فرصة قبل كده جت و انا لسه متخرجة و ممسكتش فيها..و اهه بعد 5 سنين جبتلى فرصة تانية.. و النبى يا رب تجيبهالى..صاحبتى جايلها فرصة برضة ضاعت من 5 سنين و هى برضة مش عاوزاها..فرصتى اللى انا ضيعتها انت جايبهالى تانى بتسبيت رجلين فيها اكتر.. يا رب المرة دى تحصل عشان اوصل ..و النبى يا رب ما تخذلنى و انت عارف بالمجهود اللى بعمله..انت الشاهد و المطلع يا رب انا عاوزة اكفى نفسى و ازود العلم اللى عندى ..و النبى يا رب متحرمنيش من علمك و لا من نورك و خلينى اشوف بنورك دايما و زى ما قربتلى الفرصة التانية و النبى يا رب اجعلها حقيقة ..اللهم امين و صلى اللهم على سيدنا محمد النبى الامى و على اله و صحبه و سلم

فيلم فى الجون

فيلم جامد و ينفع يتراح مرتين كمان او تحتفظ بيه على سى دى او على الهارد ...مش حنختلف هية قصة متخدة من قصص اطفال-كوميك ستريبس-بس مين فينا مش بيقرا قصص الاطفال ؟ او بيتنح قصاد ميكى بس مش بيشتريها اصل البياع حيقول عليه ايه ؟ طب ميقول..القصص دى فيها حاجات لذيذة للاطفال..بس فيها كمان قيم تقريبا احنا فقدناها..ما علينا مش حفتح بقى عشان انا اصلا مر علييا كام يوم زى الخرا الاسود اللى اسمه ميلينا-عارفينوه اكيد اخواننا الدكاترة-..مش عايزة افتكر الايام دى لانى شفت فيهم كذا واحد يا سارق اى فرحة او بهجة تكون فيها مع العلم ان الهنا مش فى بيتنا و اسألوا علينا, او كذا واحد من المنافقين او الحاقدين او ولاد ستين فى سبعين...شخصيات عقيمة و محتاجة تتخصى بجد..المهم اللى خرجنى شوية من الموود الزبالة الفيلم ده جوست رايدر..يا ريت يكون...و اللا بلاش..انت عالم بنيتى يا رب

rare mutation ,4 legged duck

الاسبوع الاول

بيقولوا دايما فى اول مرة فى كل حاجة...ماشى يا سيدى...لكن انا عمرى ما شفت اسبوع بالشكل ده...اينعم اجازة نص السنة اخدتها بالطول و العرض و سمبوكسات كمان و مفيش مانع كمان مخططة و منقطة....و ده عشان الحرمان اللى كنت فيه ايام كلية الطب..دى مكنتش ايام دى كانت معجنة..ما علينا ربنا يسامح اللى ضحك عليا و قاللى ان المستقبل هنا للعلم ...انا بقول اهوه بحس عالى العلم لا يوكيل بالبرنجان المخلل...اجازة كانت لذيذة بعد ترم ماجستير اخدته على قفايا و كان اخويا دخل 2 مرة المستشفى فيه و كانت هيصة و كان فيه رمضان ...دوشة كتير قوى كانت فى الترم ده كانوا 3 اشهر دمار شامل ..قلت بقى ابرتع فى اجازة نص السنة..قامت جت على اخر كام يوم مفيش حاجات تتعمل ...روتين كده و ملل..حتى مليش نفس ابص فى خلقة الرسالة..قام الاسبوع الاول فى الدراسة جه كده خبط لزق..لسه حاحضر الحاجة بتاعته..جت حاجات كتير قوى...شوف يا عممى..السبت كان عليا طبيخ ..و الاحد نزلت السوق..الاتنين مش عارفة عملت ايه اهو طار و خلاص..اهه افتكرت انا سافرت الاحد و الاتنين مع بابا عشان ورانا البيزنيس بقى اصلى بقيت و لية اعمال ..المهم الاتنين راح فى النوم و الاحد رحت السوق و قريت شوية فى الصحف و اخيرا خلصت كتاب شكلها باظت..التلات بقى بحضر الطرد بتاع وائل اخويا و ده اليوم اللى اتخانقت فيه مع بتاع البيض النصاب اللى باعلى بيضة متكسرة فى الكرتونة و هو قالبها و لما و صلت البيت لقيتها متكسرة و هو مداريها..يالله الله يحرقه النصاب..يا رب احرق كل النصابين و اشباه البنى ادميين..جه الاربع يوم عيد الزلانطين ..ماشى يا عم الحبيب..بس مفيش حد عنده دم يشوف الاسبوع الدموى ده؟ ايه كمية الفراقيع اللى سمعتها الاسبوع ده ..كل دول ماتوا ؟ و مشكلة الانابيب و انف لوانزا الطيور اللى حتبقى من انسان لانسان عن قريب و حتعمل كارثة على وش الارض..و فراقيع فى لبنان و بغداد و ايران كمان..و الناس اللى بتتحبس و الفلوس اللى بتتحرك هنا و هناك..ايه الهيصة دى ؟ شوية راحة للدماغ بقى ..أقوم انزل الشارع ألاقى كل الناس جيبين دباديب و حاجات حمرة؟..حمرا فعلا ..كل اللى بيحصل دة و ليكوا نفس ؟و اللا معندكوش دم؟..احيييييييييييه اسكندرانى بالقوى.....ما علينا يوم الخميس كانت معركة بينى و بين الجرايد المترمية هنا و هناك..اجى للجرنان كدة يجيلى كده..لما ورمت و شعرى وقع و عينايا احولت و بقيت شبه اخينا اللى فوق فى الصورة دى..الجمعه بقى جة, النهاردة يعنى ..بعد ما تخلصنا من الجرايد بطريقة حضارية و لكن غير ادمية..اشتريت من السيدة زينب براد شاى بتاع قهاوى عشان اميمة..اشمعنى البراد ده ؟ معرفش و مش عاوزة اعرف المهم انها فرحت قوى بيه زى العيال الصغيرة..و جبت شوية طرح لزوم الصيف و مفيش مانع من 2 كيلو موز دخلت بيهم على امى ..كانت عاملة اكلة ايه ؟ و الله منا فاكرة..اهه قرنيط..بقولها بلاش المتفجرات دى..قالتلى أومال ناكل ايه؟ دى كذا بكذا و كذا بكذا..ماشى يا ماما ناكول موز..دماغى و النبى..جالى ييجى مليون تليفون بعد كدة عشان النتيجة بتاعت الترم بكرة..يا رب استر...نسيت انه فى عز اسبوع الدرمغة ده فاتتنى محاضرة عن النانو تكنولوجى فى الاوبرا و محاضرة عن الهجرة عموما كمبدأ فى دار الحكمة..مكاننا يعنى..و مش زعلانة عليهم

معلش

مش عارفة اقول ايه..... طب اقول كلام زى رافضك يا زمانى يا أوانى يا مكانى انا عايز اعيش فى كوكب تانى؟..حتى على المريخ يمكن تقوم حرب..نفسى اصحى او انام يو م واحد على اخبار حلوة..مفتكرش مرة انا محستش بالزمن..لا انا مرة كنت تعبانة قوى فى الشغل حتى بابا جه يطمن عليا و اخدنى فى العربية نشم الهوى شوية..بعيد عن السامعين اصلى طول الوقت مع ميتيين او ناس بتموت..قمت نزلت من العربية اجيب بقسماط و جبنة..اكلة دسمة كده..قوم ايه طلبت من ربنا انى احس بالراحة و لو شوية..قمت حسيت ان كل الدوشة اختفت و النور كان هادى من حواليه _كانت الساعة سبعة المغرب فى الصيف_و جت نسمة هوا حلوة قوى -اكيد دى من الجنة-و حسيت براحة عجيبة و الدنيا بتلف بشويش و بقيت مبتسمة و لما رحت لبتاع البقسماط كان مبسوط و الناس مش موجودة فى الشارع خالص و الجو حلو قوى..ده كله مخدش وقت خالص بس حسيت ان ربنا استجاب لى و حسيت انى اتظبت كده و فجأة و الله الدنيا رجعت زحمة و دوشة و ضلمت و حسيت انى حتخنق من أم الراجل بتاع الجبنة و الناس ابتدت تملى الشارع و الاغانى الزفت تشتغل و كده ..قمت جريت على المستشفى..الله يكون فى عون اللى يوميا عايشيين فى عدم امان و شايفيين الكوارث ليل نهار..مش الدكاترة.لا الناس اللى بنسمع اخبارهم يوميا على الجزيرة

معلش احنا بنتكلم

يا جماله.....يا جماله

توضيح للصورة

بوش بيقول لكاتب الخطاب :اكتب لى خطاب يجعل الاحزاب يصفقوا (الصورة الاولى)..فى التانية: بوش يقول: اقدم استقالتى..و الناس واقفة بتضحك و فرحانة و بتسقف و بتطير برانيط..معلش الصورة صغيرة فقلت اوضح الكلام اللى فيها ..بس هى منشورة فى النيوز وييك العربى مش فاكرة العدد ده و اللا اللى قبله

نكتة

و الله دى فطستنى من الضحك..جبتها من النيوز ويك..حتى النكت على السياسة بتضحك يا ولاد

ايوه كده

ده مش منظر واحدة تروح الاوبرا ..عارفة ..بس هو اصلا حد بيروح الاماكن السئافة غيرنا؟ ما هو مفيش..و كمان استحالة ابقى طول النهار ما بين الجامعة و شرا حاجات و ترتيب البيت و كمان بعد كده ارجع البيت عشان ادلع نفسى بلبس اللى على الحبل و بعدين انزل تانى اروح الاوبرا..طب اجيب حيل منين للمواصلات يعنى ؟و لو نزلت الشارع و انا موززة مش حاخلص من الصيع ..الهى تولعوا بجاز وسخ يا صيع ..عموما اى صايع بينضرب فى الشارع بقف اضحك..بالرغم ان هذة حادثة نادرة الحدوث نظرا ان الدم مش موجود عند الناس و الدليل على كده ازمة الدم اللى احنا فيها سواء عشان العلاج او الدم بمعنى النخوة..المهم روحت الاوبرا بلبس العيال اللى بلبسه و نظرا انى كلبوظة فاللبس بيدى شكلى على بيبى و كمان لبست اسبادرى بمبة عليها رسومات اطفال و دخلت على المسرح الكبير بقى..صحابى كانوا جايين على سنجة 10 و فى منهم عادى زيى..اللى كان مظبت نفسه و فاكر انه رايح الاوبرا بقى فاق من الغيبوبة على واقع كلمة اللى معاه دعوة يدخل و اللى مش معاه يلف من ورا..انا سمعت من ورا دى و جت عليه بالضحك الصراحة..المهم لقيت الناس كلهم داخلين من الباب بدون دعوة اتارى ان الكوسة للناس اللى هما مهمين بس عشان يقعدوا تحت..و ماله اقعد فوق مش مشكلة ..هو انا يعنى حأقعد على حجر صاحب الندوة؟..المهم دخلنا و كان الضيف الدكتور احمد زويل ..الصراحة الكلام اللى قالوا مش جديد اوى علييا اصلى سمعته قبل كده فى دوكيومنتريز-افلام وثائقية-بس اتكلم عن الانتروبيا و الفوضى الخلاقة-كلام كبير كده يصعب على امثالى فهمه..بس احنا و اخدين الكلام ده اصلا فى البيزنس..ما علينا..خلص الكلام و سئفنا ..جت بنت تغنى بقى ..غنت فى الاول اسمهان و فييننا ..انا مش بحب اسمهان و معايا ناس بيحبوا الموسيقى العربية اصلا..قلت لمروة انا عاوزة اروح مش طايقة الولية اسمهان اصلا ..كبستنى البنت و قالتلى نستنى شوية كمان و لقيتها مبسوطة عشان بتحب اسمهان..عصرت على نفسى لمونة و قعدت..المهم البنت اللى بتغنى اخيرا خلصت و بعدين حتبتدى و صلة تانية ..كنت حفرقع الصراحة و قلت فى سرى انا حاقوم و ان شالله اروح مشى..ابتدى العزف بقى ..لقيت نفسى بقول ايوه كددددددة كاننا و لا فى غرزة لا مؤاخذة يعنى..اصلها ابتدت تغنى الف ليلة و ليلة لام كلسوم..انا مركزتش فى الصوت بتاع البنت على قد ما ركزت فى العزف و الكلمات ,لقيت نفسى مبسوطة و الكلمات ضحكتنى شوية مع مروة لما قعدت البنت تقول لا قبلك كنت عايشة و الكلام ده..عشان اصلا كنا بنتكلم على صحابنا اللى فى طريقهم للطلاق ..قعدنا نركز فى الكلام..جميل و العزف حلو..انا انبسطت فى الندوة دى اكتر من مسرحية يحى الفخرانى بتاعة كينج لير اللى كلهم ماتوا فيها..بس انا كنت بضحك فى المسرحية دى ..اصل البطل-بطل أخضر-وقع فى المسرحية على السلالم رحت انا قايلة بتلقائية شديدة يا عينى كل يوم بيوقع الوقعة دى و كررررر هاتك يا ضحك كلنا مع ان المشهد مفروض يكون مهيب يعنى ..انا عارفة اننا مش اشكال الاوبرا و الحاجات دى..بس انا مش بحب لما اخرج اناششى كده و اتئالط على الناس عشان انا اصلا خارجة عشان أفك شوية على نفسى..بلاش نظام انشا ده..اصلى بشوفة فى الدكاترة ..و اللى بيبقى مناششى كده دايما بيبقى عنده عقدة نقص..بيكون ناقص يعنى و لو اتكلمت معاه ممكن كمان تلاقيه واطى..ياما انتى لمما يا كلية و عجبى..

هع هع هع

الله يجازيكوا ..فكرتونى بأنفلوانزا الطيور اللى بقت انديمك..واللى ما يعرفشى يعرف..انديمك يعنى كلبشت فى مصر....غريبة انى ملقيتش كتاب عن الفيرس ده بالرغم انى شفت كتاب عن تحرير الرجل.. اه و الله الرجل ..تحريره من ايه؟ هدومه ؟..بيناقشوا حاجات عجيبة و سايبين الفيرس يلعب زى ما هو عايز ...الرحمة بقى من الفقعة يعنى

توابع المعارض الكتابية على رجلية

بعد ترتيبات و تظبيتات ..و بعد مرور اكتر من سنتين على مرواحى معرض الكتاب..اخيرا تم ذهابنا الى المعرض..جبت حاجات لقطة و الله..هيه مش لقطة قوى ..كتب عادية بس الديسكاونت كان كويس ليه..كل المناطق اللى فيها ثقافة مكانش فيها ناس كتير..خرجنا منها على منطقة رجعتنا الى الموسكى حيث العدد فى اللمون..ايه الناس دى كلها؟ هما مش جوه ليه ؟ كل القاعات بتاعت الكتب شبه فاضية بالرغم من الخصم الكويس..امال دول كانوا فين؟ ركزت شوية لقيت اننا فى منطقة الاكل و بصيت حواليه: هيييييييييييييييه احنا فى القناطر يا و لاد ..اكل بقى و ناس فارشة و عيال بتغير و و احد بيلزق التمثال الفرعونى اللى شايل كورتين فى ايده ( اكيد ده رمز أبيح )على قفاه..و استغمايه و ناس بتاكل زى المساريع ..و بجنيه بجنيه..كله بجنيه..و الكلام ده ..قليل اللى كان شايل كتب بس اللى كان جايب كتب كان عامل زى حالاتنا ماشى بيجر فى رجليه و شكله مرهق و شايل على قلبه كتب اااااد كده..شربنا القهوة ام جنيه و دخلنا تانى ..برضه جوة مفيش زحمة..بس جبنا حاجات لذيذة..كل واحد على حسب مزاجه..اتفقنا و اختلفنا فى الاذواق..بس انبسطنا السنة دى فى المعرض الحمد لله..بس بجد فعلا نحن لا نقرأ..فبالتالى طالما اننا بناكول بس يبقى عمرنا ما حنتحرك من على اول عتبة من هرم مازلوا ( ايه الكلام الكبير ده؟)..ده هرم ترتبب رغبات الانسان اللى بيبتدى بالاكل و الشرب و ينتهى بتحقيق الذات ..احنا جرشنا على العتبة الاولى بتاعة الاكل و الشرب و السيكو سيكو و نسينا الباقى..و محدش يقوللى الاسعار غالية للكتب..انا لقيت كتب كويسة بخمسين قرش و كل برغوت على قد دمه(رجعت للبيئة تانى :) )..فاللى عاوز يقرا حيلاقى ..بلاش بقى الشماعات دى ..و انا بدعك رجليه فى الميه ام ملح افتكرت كلمة: القاهرة تكتب و بيروت تطبع و بغداد تقرأ..و ده صح

صباحك فل يا فبراير

لكل حبايبى الحلوين اللى سألونى بخباسة عن علاقاتشى العاتشيفية و حأخرج معى مين(ال يعنى بأخرج..بتستهبلوا؟)فى عيد الحب ..بأرد عليهم بالبوستر ده ..مع اطيب امنياتى و اكلاتى للى حب و لا طالشى..(انا حاكول شوكولاته لوحدى فى عيد الحب و يمكن اتهور و افرتك جنيه و نص على ايس كريم ماكدونالدز..ايس كريم بس و الله عشان الميزانية بهوئت لا مؤاخذة..و بالنسبة لعريس لميا: ايوه يا حج..بئبض 208 جنيه و لسه برضه دكتور..208 فى الشهر و بالجنيه المصرى مش استرلينى يا فاقعنى )