اخر حصة فى الصيف

اخيرا خلصت كورس الصيف ..اخر حصة برضة النهاردة بيكون ليها طعم تانى ..يعنى مثلا رامى الروسى اعتبره مسيو ج.م. ابنى ! بصيت لرامى قوى وقلتله لو كان ابنى روسى وزى القمر كده مش حكون معترضة ..وش رامى احمر ..رامى اصلا روسى..الروس اللى هنا فى منطقتنا عندهم شوية بيبيهات وحياة ربنا زى العرايس اللعبة وحلوين جدا تحب تلعب بيهم وتتفرج عليهم وهما فى العربية بتاعتهم ..كان جارى البيبى روسى برضة بس نقل على الزمالك مع أهله ..اسمه ساشا ..ساشا بيفكرنى بدكتور زيفاجو ..ايه القصص الجامدة دى ؟ ..برضة المدرس بتاعى مصر انى اقرا الجريمة والعقاب بيقوللى انى حنبهر بيها ..انا لسه غارزة فى ثلاثية غرناطة ..احلى واجدع وامتع قصة قريتها لحد دلوقتى ..لغة عربية تجنن والقصة بتدينى مشاعر عجيبة ..مرة أعيط وقلبى بيوجعنى وبحس بنار فى جسمى وبسأل نفسى أهل الاندلس شافوا ايه لما وقعت الاندلس فى ايد فردناند وايزابيللا ..ومرة اضحك جدا ومرة أفتكر نفسى ومرة استغرب واحس انى بتلزق على قفايا ..القصة دى فضلت مرزوعة على الرف فى مكتبة مبارك وكل شوية أقول توء مش حاخودها ..دى كبيرة ..اكيد دمها تقيل وبتاع ..لحد لما مدرستى قالتلى اوعى تضيعى فرصة انك تقريها يا ريهام-ايل نو فو با لا راتيه -بالفرنساوى بقى ..قصة ما تتسابش بجد واللغة العربية راقية جدا ومش صعبة خليتنى افتكر مدرس العربى فى ثانوية عامة اللى خلانى احب أتذوق اللغة العربية دى ..جميلة جدا ..المهم برضة المدرس راح سالنى ريهام انتى متجوزة -فى نص الفصل -قلت لأ..قام سألنى عايزة تتجوزى ؟ قلت هو ده سؤال اجبارى واللا اختيارى ؟..قام ماسك القلم على السبورة وراح راسم خط فى نصها ..ناحية كتب عنوانها وى والتنية نو ..ماشى بروز اند كونز لايه بس حضرتك ؟ قاللى تحبى جوزك يقرا مذكراتك الشخصية اللى كتبتيها قبل ما تتعرفى عليه وتتجوزيه ؟ ..انا قلت هو بيخوش على النت ويقرالى واللا ايه ؟ ..طبعا رديت قلتله انا وهو حنبتدى حياة جديدة ومش ناويين نفتح دفاتر قديمة اترمت خلاص..قاللى طب لو دخلتى البيت بعد الجواز ولقيتيه بيكتب حاجة فى ورقة ولما شافك قام مخبيها ؟ قلتله وانا بضحك على السؤال انى حجرى وراه فى الشقة لحد معرف هو مخبى ايه ..قاللى الحاجة دى خلت ناس يقلبوا على بعض فى أوروبا ويدعبسوا فى دفاتر بعض القديمة عشان يطلبوا الطلاق..استغربت ان كل تفكيره متجه للقانون ..طب انا مالى ؟ ممكن حضرتك الطلاق يبقى احسن حل لعلاقة مدوحسة من أساسه ..اكتر حاجة ضحكتنى النهاردة ان مسيو ج.م. ده وهو فرنساوى أصلا لما التليفون اللى معاه حجر شوية وقعد مدة طويلة أول ما قفل السكة راح رافع ايده لفوق وهو بيقول بالمصرى يا لهوىىىىىىىىىى -اه والله

تفيدة ومرزوق-الحلقة 12

مرزوق طالع جرى على بيت تفيدة حبيبة القلب ..فرحان قوى انها طلبته عشان حاجة كده ..تفيدة حبيبى روح قلبى انا قلتهالك من أولها انا كل حاجة ليك حعملهاده انا مش حعيش غير ليك حبك حبيبى جانى فى وقته ..خلييييك بناديييك ..بيغنى بقى فرحان ..بنااااديييك يا تفيدةةةةةة..بوقه مفتوح على الاخر لدرجة ان تفيدة فتحت الباب هوا عشان الجيران ميشوفوش مرزوق وهو عمال يغنى ويبرتع على السلم زى الحمار الحصاوى ..أول ما شافته : هسسس يا مرزوق..ايه البوق ده ؟ ده انا جبت التونسيلز من هنا ..قام مرزوق ابتسم ابتسامة واسعاااة قوى وطالع على السلم ساكت بس بكل نشاط..هوب هوب هوب ..رجليه الاتنين لفوا على بعض قام وقع من على السلم ..تفيدة لنفسها : مش عارف يطلع على السلم ..أومال حينفذ اللى عايزاه منه ازاى ده ؟ يا أخواااااتى مفيهوش صحة خالص..لازم أخليه يرم عضمه حعمله سنداوتش برنجان بالجرجير

تفيدة لمرزوق:قوم يا خويا شيل اللى وقع منك

مرزوق: والله انا اتكعبلت فى الجلابية بتاعت الصلاة

تفيدة :شفت احنا بنعانى ازاى واحنا لابسين الجونلات
مرزوق بيبص لتفيدة: بس ايه الجونلات الحلوة دى؟ يا جونلاتك يا تفيدة ..ايه يا عسل عاوز ايه يا قمر
مرزوق ابتدى يغمز لتفيدة وهو واقف على باب البيت وساند ايده على الباب والايد التانية فى وسطه وحاطط رجله الشمال ورا اليمين :ايه بقى ؟ عاوز ايه يا جميل ..عينايا ليك يا حبيبى
مرزوق بص جوه الشقة: مفيش حد بجد ؟
تفيدة بخطفة واحدة خلت مرزوق جوه البيت : انت شايف حد ؟
مرزوق :لأ..بس يمكن أمك مستخبية كده واللا كده
تفيدة بتقعد على الكنبة وبتولع التليفزيون على قنوات الأغانى : والنبى يا مرزوق كنت عايزة حاجة كده بس أوعى تكسفنى
مرزوق فى ثانية لزق على الكنبة :وديه تيجى ؟ ده انت اللى عليك العين يا حبيبى ..أوأمرى
تفيدة بدلال مصطنع : عاوزاك تسيأ الشقة
مرزوق وهو دايب فى عينين تفيدة : الجردل منين يا حياتى
تفيدة بتطلع الجردل من جنب الكنبة : أهوه يا عينايا

مرزوق قام يسيأ بهمة ونشاط..بس فجأة تفيدة اختفت من البيت ..غطست فى المطبخ تكمل البتنجان ..قام مرزوق مسح ايديه فى جلابيته وحول القناة ..قعد يجرب هنا وهنا وهنا لحد لما لقى الاغنية اللى بتدفعه للنشاط والهمة اكتر..وعلى نغمات انا بحبك لفضل شاكر ..قام مرزوق وخلص الشقة وهو بيرقص..تفيدة شاركته الدانس شوية كده قبل ما يرقصوا فى شفوى البكالوريوس..تفيدة اترمت على الكنبة وهى فطسانة على روحها من الضحك ..بتبص لمرزوق بعنين كلها حب وأمل ان مرزوق ده اللى دمه زى العسل على قلبها ممكن ربنا يفرجها عليه فى يوم من الايام ويعيشوا عيشة كويسة ومرتاحة ..مرزوق على الناحية التانية من الشقة بيسيأ لسه وبيلم الشقة من هنا وهنا وراح داخل على الحمام ..تفيدة ندهته عشان ياكوله لقمة :شايفاك هفتان يا مرزوق من أكل السوق ..تعالى كل البتنجان مع الجرجير عشان ترم عضمك ..مرزوق مكدبش خبر جه جرى -عشان يبقى كده بيشتغل بلوقمته- بعد ما غسل ايده وقعدت توكله تفيدة زى البيبى فى بقة ..مرة قطمة من البتنجانة المقلية ..ومرة بتدفسله حزمة جرجير فى بقة ..كل مرزوق وملى التانك ..قام جى يقوم عشان يمشى ..تفيدة قالتله استنى : اشرب اللمون ده والنبى يا مرزوق ده انت كده حتكون اخدت حديد وفيتامين سى ..كده حتبقى صحتك تمام

مرزوق بيبص لتفيدة بامتنان : ربنا يخليكى لييا يا تفيدة انا مش عارف كنت حبقى بسيأ ازاى من غير اشرافك

مرزوق بيمسك كوباية اللمون ولسه حياخود بوء قام بص لتفيدة برعب....فيه حد بيفتح باب الشقة بالمفتاح

اخر ايام الصيف:على شط النيل

انا كنت فاكرة ان على كوبرى الجامعة بس الناس بتبوس بعض
اتارى الفرنش بيتعمله براكتيس كمان فى اللانشات اللى ماشية فى النيل بتتمخطر
انا جت علييا بالضحك لما لقيت البوسة طولت والناس اللى بيتفرجوا متنحة
كانوا مستنيين ايه ؟
ده بيفكرنى على كوبرى 6 اكتوبر لما العربية اللى قوداااااااام قوى ضربت واحد
والكوبرى بقى طبعا ماشى تاتا تاتا
ولما قربنا من اللى مرمى سايح فى دمه فى الارض
ما شاء الله -حمير واقفة بتبص عليه وهو فى كوما وبينزف من راسه
الله يخرب بيت الحمير
الراجل مفيش اوكسوجين فى مخه وبينزف وعاملين دايرة حواليه
نزلت اشوف الموقف المنيل ده
سألت سؤال واحد :حد طلب الاسعاف ؟
كل التيران اللى معاها موبايلات ردوا : لأ
جدعان ..وبيجرى فى عروقكم خرا مش ميه ساقعة
يا بغال منك ليه من على الموبايل 123 أطلبه وقول مكان الحدثة وحالة العيان ..مثلا مش فايق ..مش بيتنفس كويس
والنمرة دى ببلاش على الموبايل يعنى حتى لو الكارت خلصان ممكن تتصل
ومن اى ميناتل كمان كده ترفع السماعة وتطلب 123 حترد
الراجل شيلناه وجرينا على العجوزة ..سلمته ومشيت
هما بقى يشيلوا الليلة هناك فى المستشفى
كفاية التظبيطة بتاعته فى الاسعاف نفسها ..جوا العربية يعنى
ده مثال بسيط لأى بروبلم مانجمنت لمجموعة من التيران البرية

اخر ايام الصيف:برضة على المركب

متخيلتش ابدا ان المصباح ده يطلع بالحجم ده واكل الصورة كلها
المركب مشى من تحت كوبرى الجامعة ..مش عارفة ايه حكايته الكوبرى ده
انا يا امشى من عليه يا أعدى من تحته
لما عدينا من تحته واحد رمى كوز درة متأرأض من على الكوبرى علينا
قعدت أبص للكوز وقول ربنا يستر
الظريف روح مامته اللى رمى الكوز مش مقدر الارتفاع قد ايه
من الارتفاع ده الأوبجكت بياخود طاقة
ويروح نازل بيها على دماغ اى حد تفتحله نافوخه
عشان نقلبها اسعاف وطوارئ أون ديك بقى
كائنات غبية ترعى فوق الكوبرى
ربنا ستر يوميها والكوز مضربش حد

اخر ايام الصيف-الجزء التانى :تحت الكوبرى

تحت الكوبرى بس فوق المركبة

اخر ايام الصيفية

لولو اتقفش بالكاميرا وهو مستقر فى طشط الغسيل
طراوة بقى

دعاء نص شعبان عشان ربنا يفرجها

اللهم يا ذا المن ولا يمن عليه يا ذا الجلال والاكرام يا ذا الطول والانعام لا اله الا انت ظهر اللاجئين وجار المستجيرين ومأمن الخائفين ان كنت كتبتنى عندك فى ام الكتاب شقيا فامح عنى اسم الشقاء واثبتنى عندك سعيدا موفقا للخير وان كنت كتبتنى عندك فى أم الكتاب محروما أو مقترا على فى الرزق فامح حرمانى ويسر رزقى واثبتنى عندك سعيدا موفقا للخير

----------------------

اكلات الصيف المفضلة

فى الجو الولعة بتاع الصيف ده يا ترى الاكل يكون ايه ؟

1-جبنة بيضة دومتى ملح خفيف مع خيار
2-توت اسود..من الشجرة على طول ميضرش
3-كريز لبنانى : الله يعمر بيت لبنان وفاكهة لبنان ..الكريز ده مش بيتزرع فى مصر الظاهر
4-التفاح الاخضر:مليان انتى اوكسيدانت بالهبل
5-التين الشوكى : بلاش نكتر منه عشان امساكه هباب ..كلوكوا حتتعالجوا عندى
6-الخوخ : يا وعدى
7-البطيخ : يا سيدى
8-المانجة :يا عينايا
8-حبة تين على بلح اسود على بلح مرمل :مش كتير عشان مليانين كالوريز بالهبل
9-ايس كريم لبن من عند ماك
10-اى زبادى بالفاكهة
11-عصير الجوافة
مليش فى العنب ولا المشمش ولا البرقوق
ممكن عدد 2 كوز درة مشوى لزوم الوقفة على الكورنيش وانا راجعة بالليل من المستشفى واللا حاجة
بس خلاص
كل سنة وانتوا طيبين ..بس لسه انا مجبتش المانجة مع انها شكلها حتخلص على طول
اه الشمعدان الاحمر الشبح حلو وخفيف برضة فى الشيفت
محدش ياكول من اكل المستشفى ادينى قلت أهوه
شاى اخضر بقى على احمر على نيسكافيه على قهوة تركى وظبطوا

iwan, you rock !

امبارح كان عجيب قوى ..روحت بيت تيتا الله يرحمها اتفرج عليه ..المكان اتغير طبعا بعد التغييرات البسيطة فيه ..شكله زغلل فى عينايا وقلت ده ينفع عيادة تمام ..وانا بقفل الشقة قلت لنفسى ان خلاص اللى كنت بحلم بيه من كام سنة من ساعة ما اتخرجت كله اتغير زى الدنيا كلها ..من اول 2001 بعد ما خلصت الامتياز وكله اتغير ..انا عاوزة عيادة بجد ؟ واكتب على اليافطة د.ريهام حسن دبلوم جراحة أورام وجراحة الثدى ؟..يعنى ..مش ده اللى عاوزاه ..العيادة دلوقتى بقت من الاحلام اللى مش عاوزة اعملها ..انا بحب شغل المستشفيات اكتر وشغل الطوارئ ولازم اكمل فى الهيصة دى واكيد حتدى على المدى البعيد ..زى ما قلت لنفسى ان خلاص جوازى من زميلى راح لحاله ..العيادة برضة طز فيها ..لما احب اجرج فى الدنيا بقى ابقى افتحها اذا جالى مزاج يعنى قودام كده ...مش عارفة امتى الصراحة ..قريت لتيتا الفتحة ومشيت ..معرفش افتكرت عمتى رحت مكلماها فى اسكندرية ..لسه غارزة فى تجديد الشقة اللى البحر كالها ..كده مرواح اسكندرية تانى مش مضمون يا عمتى بقى الصيفية دى ..ما علينا ..عمتى دى أول مرة فى حياتى اشوفها مطنشانى خالص ومركزة قوى فى التليفزيون لما جت مينى سيريس لدكتور زيفاجو على حلقتين ..انا برضة بحب القصة دى قوى قوى ..ملهاش حل ..جميلة ورومانسية ..لازم اقراها ..هى لكاتب اسمه بوريس باسترناك ..اكيد هى اون لاين ..المهم روحت البيت وحملت ألبوم ايوان الجديد ..تحفة والله اجمل ألبوم سمعته فى الصيف ده ..هو ايوان اصلا انا بموت فيه ..الاغانى اللبنانى اصلا عسل والكتب السورى تخليك يغمى عليك من اساسه ..اوعدنا يا رب اننى ازور بلاد الشام مرة فى حياتى ..المنطقة دى فيها حاجة عجيبة ..انا قربت منها من ناحية العريش لما جبت خوخ سيناوى وانا بوصل عيان ..طول السكة بسمع فيروز والمسعف والسواق اللى معايا كانوا مرعوبين ..والمسعف نزل فى نص السكة وسابنى اكمل مع السواق لحد ما اوصل العيان اللى معايا ..كنت خايفة الصراحة بس القرب من منطقة بلاد الشام دى خليتنى فى موود تانى ..راحة نفسية عجيبة واحساس بالسعادة عجيب ..حسيت انى منتعشة كده وتركيزى عالى بالرغم من طول الرحلة والعيان اللى فطس منى كام مرة على الطريق..نفسى اشوفها على الطبيعة بجد البلاد دى ..ربنا يوعدنى بس ..المهم ايوان ده وانا بسمعله ارجع لييا ولسه بفتح كتاب الاجنحة المتكسرة لجبران خليل جبران ..ومع اول جملتين فى الكتاب وانا بسمع الاغنية ..لقيت نفسى بعيط الصراحة ..ايه الكتب اللى تخللى الواحد يغمى عليه دى ؟

تفيدة ومرزوق-الحلقة 11

مرزوق بلع ريقه على طول وكتم الزغاريد بتاعته لما امه قالتله العين وحشة والحيطان ليها ودان والجيران مش بيتبل فى بوقهم فولة واحسن له يعلن الخطوبة رسمى بعد الامتحانات ..مرزوق ولد مطيع سمع كلام امه اللى خرجت بره فى الصالة بتولع بخور عشان تبخر الشقة ومرزوق وبالمرة الزرع اللى حاطينة فى البلكونة اللى دبل من عينين الجيران -على حسب وجهة نظر ام مرزوق- مش عشان هو زرع ليلى مش مفروض يتحط فى الشمس ليل ونهار..من الناحية التانية تفيدة جاتلها شحنة نشاط غير عادى بعد ما اتطمنت ان مرزوق بقى خلاص فى ايدها وفاضل تكة ويدخل القفص..بتقول لنفسها : مرزوق فى اليد احسن من غيره على الشجرة ..قامت ترجمت شحنة الطاقة دى اللى جاتلها فى صورة مذاكرة وحرت فى الكتب لحد ما النهار طلع وحركة الشارع ابتدت تدب..السوق النهاردة بدرى شوية عشان الجمعة ..قبل الصلاة كله عاوز يبيع الخضار الطازة وأول ما سمعت تفيدة النداء المعتاد -مجنووووووووووووونة يا قوطة - قامت خدت شنطة الخضار ونزلت جرى تتسوق..مشيت عند محلات كتير وبياعين بعربية كارو وناس فارشة ..ايه الاسعار دى ؟ حنتجوز ازاى يا مرزوق؟ تفيدة بتقول لنفسها ..قعدت تلف فى السوق..الخيار بتلاتة ..الطماطم بنت المجنونة المفعصة وضاربة ب2 ونص والبياع يقولها دى مستوية مستوية ..وهى بايظة وضاربة وريحتها طلعت فى الجو الولعة ده ..ملوخية يتيمة الحزمة ب50 ومتتاكلش..البتنجان لقيته بجنيه وجنيه ونص قامت اشترت 2 كيلو من ابو جنية وسلمت أمرها لله وجابت كيلو خيار وكيلو طماطم لزوم السلطة ..اتهفت فى نافوخها ونفسها راحت للفاكهة ..لقيتها اسعارها ولعة على الاخر..حتموت على مانجة سكرى ..تدور فى السوق انها تلاقيها مفيش..تعدى على محلات المانجة تلاقى اصناف مش اللى فى دماغها ..البياع يقولها : اى صنف يا باشا ب5 جنيه عشان خاطرك ..تقوله انا عاوزة سكرى ..يقولها خدى تيمور واللا زبدية تقوله سكرى ..حتوكلونى على مزاجكو واللا ايه ؟ وتسيبه وتمشى ..المهم اكتفت تفيدة بالبتنجان والسلطة وطلعت السلم جرى عشان تلحق تحضر الغدا وتلحق تنام شوية ..الامتحانات على الباب خلاص ولازم تشد حيلها خليها تخلص بقى الكلية دى ...
مرزوق بقى على سريره لسه نايم ..فاضل على الصلاة ساعة والبيه لسه نايم بيحلم بتفيدة وعمال يخرف ويحدف بوس فى الهوا ..واحدة منهم جت فى امه اللى اديتله بالقفا عشان يصحى يلحق الصلاة

ام مرزوق: اللا الصلاة ياد يا مرزوق
مرزوق: حد يصحى حد الطريقة دى يا اما ..ايدك تقيلة
ام مرزوق: قوم ياخويا نموسيتك كحلى ..انا عارفة تفيدة حتصحيك ازاى ؟
مرزوق فى سره : بطريقتنا الخاصة يا اما ..نياهاههاهاهاهاها

مرزوق لم الدور وقام من النوم وخد الحمام التمام بتاع يوم الجمعه ولبس الجلابية البيضة اللى امه محضرهاله عشان الصلاة ..حط كلونيا جايبهاله اخوه من بره وسرح شعره بفازلين عشان ملقاش جل بتاع الشعر..أمه خلصته ..نزل جرى وصلى ورا الامام ودعا ربنا انه يفرجها ويعدى الامتحانات على خير..طلع تانى البيت ياكوله لقمة مع امه ملقهاش مخلصة الغدا

مرزوق:طب انا حنزللى شوية القهوة يا اما عقبال ما تخلصى
ام مرزوق: ماشى يا ضنايا ..بس متنساش تجيب معاك بخور من عند عمك عبد الرازق
مرزوق: من عينايا يا اما بس انتى خلصى البتنجان بسرعة

الحتة كلها طابخة بتنجان الظاهر كده ..اصله ارخص حاجة فى السوق..كل الرجالة اللى متجوزين واللى لسه مفيش وقاعدين كلهم على القهوة طلبوا كل واحد منهم-ومعاهم مرزوق -رغيف كفتة من عند الواد زلموكة بتاع الكفتة اللى على الناصية ..كلهم بيلاحظوا ان القطط السمان اللى فى الحتة وعارفينهم واحدة واحدة بيختفوا واحدة ورا التانية مع زيادة استهلاكهم للكفتة..وبيلاقوا أعداد مهولة من قطط المنطقة سواء السمان او المسلوعين بتختفى مع زيادة الاستهلاك لأقصى معدلاته يوم الخميس..كل راجل عاوز يبر نفسه هو والمدام يوم الخميس..مش معقولة انهم يبروا نفسهم فى ليلة مفترجة زى دى ببتنجان مقلى او مسقعة ..لازم شوية زفر..الزفر الوحيد من عند زلموكة ..القطط اللى بتختفى دى اعتبروها قطط مهاجرة بتيجى تحط فى حتتهم شوية وبعدين تمشى
مرزوق قاعد على القهوة بعد الصلاة بياكول فى رغيفه وبيشرب الشاى ابو لبن

مرزوق فى سره وهو بيبتسم بخباثة وبيفتكر تفيدة :لازم أروم عضمى ..دنا داخل على بكالوريوس وبعديه داخل على تفيدة
أومال تفيدة فين ؟ غارزة لسه بين الكتب ..مفيش ميسد ؟ مفيش صباح الخير ؟ مفيش طبق رز بلبن ؟

قام مرزوق طلب طبق رز بلبن من عند محل الفار أشهر محل رز بلبن فى حتتهم ..قعد ياكله وهو بيرن على تفيدة ..معبرتوش..قام بعتلها رسالة على موبايلها ..يطق يموت وميلاقيش تابوت اللى يشوفك يا تفدفد وميحبكيش موت ..تفيدة ولا هى هنا لا سمعت الرنة ولا قرت المسيج ..مشغولة مع البتنجان لسه بتقشره وبتقليه ..حاطة لبانة فى بوقها وعمالة تندغ فيها وهى عمالة تدندن..يا بهية وخبرينى يا بويا على اللى جتل ياسييين..تحت السجر يا وهيبة ياما كالنا بورتوئان ..ترلم..الجدعاااان ..بص على الحلاوة حلاوة ..يا حلو يا اسمر....كل ده غزل فى البتنجان ..قام قلبها افتكر مرزوق..تفيدة لنفسها : أما اعاكسه شوية ..الله مش خطيبى ؟..قامت رنتله ..فتح عليها مرزوق على طول..وعلى نغمات اغنية محمد فوزى أول ما الحلوة فتحت شباكها فتحت باب قلبى للشوق طوالى ..اللى جاية من على القهوة ..دار الحوار ده بين الحبايب

مرزوق:صباح الفل صباح العسل صباح النعناع
تفيدة : يسعد صباحك يا حبى ..وحشتنى من امبارح
مرزوق:نياهاهاهاهاه
تفيدة : مش حضيع فلوس اكتر من كده عليك يا مرزوق..الكارت قرب يخلص..اسمع المفيد بس ..وانا بعمل البتنجان
مرزوق:بتنجان تااااااانى ؟
تفيدة بدلال:اسمع انا لوحدى فى البيت دلوقتى ..اقفل وتعالالى جرى ..محتجالك قوى قوى قوى الساعة دى..عاوزاك فى حاجة كده

تفيدة قفلت الخط..مرزوق عينيه نورت وبقت مدوره وشكله قلب على ديب سحراوى شرز..خد ديله وطيران على تفيدة

القهوجى :الحساااااااااب يا دوك
مرزوق:ع النوتة يا خميس مش فاضى

الناس فضلت تتحاكى ان شكل مرزوق فى اليوم ده وهو طالع يجرى على بيت تفيدة بقى شبه الديب المسروع ..وشوية من الناس دول ترائى لها انها شافت لمرزوق ديل وسمعته وهو بيعوى فى اخر الحتة وهو طالع جرى على سلم بيت تفيدة

مرزوق وتفيدة -الحلقة 10

البوكس هارى نفسه دوريات خصوصا فى الشوارع الجانبية والضلمة ..لمحوه وهو داخل ناحية الشارع اللى هما فيه قامت تفيدة نغزت مرزوق فى جنبه ..فطلعوا جرى يستخبوا ورا الشجرة اللى فى الجنينة القريبة ..مرزوق وتفيدة اتهدوا من مشوار المهندسين ده ومخهم هنج من كترة التفكير فى مستقبلهم ..بس كان قلبهم فرحان قوى انهم لقوا بعض فى الكلية دى اللى مدينها اسم الشهرة : المخروبة ..واتفقوا انهم يحطوا ايدهم فى ايدين بعض لحد ما ربنا يفرجها عليهم

تفيدة : بس نشتغل ستيب باى ستب
مرزوق: يعنى ايه ؟
تفيدة : مالك يا مرزوق؟ ده انا حبيتك عشان ذكائك حتخللينى اشك فى قدراتك واللا ايه
مرزوق: قدراتى دى محدش يشك فيها ..دنا مرزوق يا جميل ..ممكن بوسة يا قمر
تفيدة : لأجل خاطرك بس خود واحدة من هنا

تفيدة لسه بتشاورله على خدها الشمال اللى ناحية مرزوق وهما قاعدين تحت الشجرة فى الضلمة قام فى النور الخافت اللى يا دوبك بيه شايفين بعض..طلعلهم فار من المجارى اللى طافحة جنبهم

الفار: مممكن بوسة انا كمان ؟
تفيدة ومرزوق على نفس واحد:اه ه ه ه ه ه ه ه ه ه

قاموا جريوا من مكانهم ..ايه اللى جاى يكلمهم فى الضلمة ده ..فضلوا يجروا يجروا ..نفسهم اتقطع ..لما ايتدى الهوا النضيف يشيل تأثير الهوا الفاسد وريحة الامونية اللى كانوا قاعدين جنبها من دماغهم ..ابتدوا يفوقوا ..وابتدوا يهدوا السرعة لحد ما فرملوا رجليهم عند أول الحتة بتاعتهم

تفيدة : عمرى ما شفت فيران بتتكلم ..وانا شخصية لا أوئمن بالخرافات فطبعا احنا اتهيألنا انه بيتكلم نتيجة الامونيا والسيجارة الهباب اللى خمسنا فيها بعد ما بوستك يا منيل
مرزوق: خرافات ؟انا برضة مش بحب الخوزعبلات والخرافات والتهيؤات..بس هات هات يا جميل هات اى بوسة منك هات
تفيدة :احنا تحت بيتكوا يا مرزوق اتلم
مرزوق:حاضر ..طب اكلمك بالليل عشان تدينى بوسة
تفيدة :قلت لا ..فواتير التليفون نار يا مرزوق بطل حركات المراهقين دول
مرزوق:طب بوسة واحدة فى التليفون وحقفل على طول
تفيدة : طيب .بس اتأكد الاول انى انا اللى رديت بدل متلاقى نفسك بتبوس أمى زى الطروبش
مرزوق وشه اصفر وبلع ريقه : امك ..يا حفيظ
تفيدة :انا حمشى بقى ..وبعدين امى ست طيبة مش زى امك

ام مرزوق طبعا لما اتأخر بالليل قامت قلقت عليه واتشعبطت على سور البلكونة الصغيرة اللى بتطل على الشارع ودلدلت نفسها من الشباك عشان تبص عليه وهو جاى ..سكتت خالص لما لقيته واقف تحت مع تفيدة وعمالين يتكلموا ..مهما حصل من تفيدة فهى جارتهم وبتحبها ..ام مرزوق على عكس تفيدة ما هى ظانة بتحب تفيدة

ام مرزوق: مش حتبقى مرات ابنى ..ده مرزوق ..ربنا يديك يا مرزوق
مرزوق وهو بيفتح باب البيت : يدينى ايه يا أما ؟
ام مرزوق بحنية : يديك كل اللى نفسك فيه يا حبيبى
مرزوق: الدعا يكمل على اللى انا ناوى اعمله ..لازم ابقى متكل على الله مش أنام وادعيله انه يفرجها ..لازم اشتغل وانحت فى الصخر وانا بدعيله عشان يفرجها علييا
ام مرزوق بافتخار : اسم الله عليك يا مرزوق

مرزوق سمع اسم الله عليك دى مرتين ..مرة عشان امه بتدعيله ومرة تانية قالتهاله لما اتكعبل فى السجادة اليتيمة اللى فى بيتهم لما باس امه ولف عشان يدخل قوضته وشايل معاه التليفون ..قام اتكعبل فى السجادة وفى سلك التليفون ..بس ربنا ستر ووشه محصلوش حاجة ..التليفون بقى كان محتاج يتظبط شوية ..قام جاب المفك وقعد يظبط فيه ..يظبط فيه ..ويتكى عليه ويفعص فيه ويخبط على البوكس بتاعه ..ام مرزوق جت جرى لما سمعت الهبد والرقع ده كله

ام مرزوق: ايه ؟ انت فاكرة لعبة ؟. هات اما اصلحه

وبهبده واحدة من هبدات ام مرزوق اللى متعودة تديها لمرزوق..هبدت التليفون قام نطق وطلب كمان نمرة تفيدة ..قام وش مرزوق نور واحمر ..ام مرزوق فهمت قامت انسحبت من سكات وخرجت بره الاوضة

مرزوق فى التليفون بتنهيدة : اخود بوستى بقى

اللى على التليفون : اهوه

مرزوق : تصبحى على خير يا تفدفد
اللى على التليفون : انا مش تفيدة ..انا امها ..اطلعى يا بت يا تفيدة من على الخط التانى ..ودين النبى يا مرزوق ان ما ركزت فى مذاكرتك انت وتفيدة وخلصتوا البكالوريوس السنة دى لحتشوف حعمل ايه ..حقطعك حتت حتت ..تفيدة سابت عريس لقطة عشان خاطرك لما نشوف حتعمل ايه بعد التخرج
مرزوق: والله يا ام تفيدة حتشوفى حعمل ايه ..تفيدة دى عينايا من جوه ..ربنا يحفظهالك
ام تفيدة : ومادام انت بتحبها كده ..ما تيجى تقرا الفاتحة واللا عاجبك ان بنتى يتقال عليها فى الحتة بدل دكتورة ..بتاعت مرزوق ؟
مرزوق : ميخلصنيش ابدا ..ما انا حاجى ان شاء الله بعد الا.....

ام تفيدة ابتدت تقرا الفاتحة بحس عالى فى التليفون بالاشتراك مع تفيدة اللى لسه فاتحة السكة من الخط التانى ..مرزوق كمل معاهم قراية الفاتحة وبعدين اول ما حط السماعة .. قام فى وسط القوضة بتاعته

مرزوق فى نص الاوضة : لولولولولولولولولولولولولولولولولولولولولولوىىىىىىىىىىىىىىىىىى

مرزوق بيزغرط لنفسه

حصاد صيف 2007-الجزء التالت

الجو حر ومش جايلى نوم اكمل بقى بقية الحصاد ..قريت شوية قصص وكتب ..اجدعهم ذات لصنع الله ابراهيم من القصص اللى مسيبتهاش من ايدى كنت بقراها فى الحمام والشارع والعربية وبالشقلوب على السرير ..لحد ما خلصتها ..ضحكت فيها جدا وزعلت على ذات فى الاخر..قريت كمان شيكاجو ..تصوير للواقع فى الغربة اثناء الدراسة ..عجبتنى برضة..اتعرفت على كتابات القعيد عن طريق قصة لبن العصفور جميلة وبسيطة وحلوة وكوميدية ...عرفت برضة قصة القاهرة باريس ملبورن بتاعت ابو السعود بس لسه مكملتهاش مش عارفة اصلا هى فين فى المكتبة ..واتعرفت على خيرى شلبى بوكالة عطية ..محتاجة اقعد اقراها على رواقة بس مشغولة شوية الايام دى ..دى القصص اللى فاكراها دلوقتى ..بالنسبة للافلام اللى سابت علامة معلمة فى وشى اهيه فيلم عمر وسلمى ضحكنى وكان بسيط ..فيلم عجميستا عشان على ايامه كنت بقرا كتاب بالفرنش لباولو كويللو اللى بيقول فيه انى لازم اكون مستعد انى امشى ميل كمان لقودام بعد ما وصلت لهدفى عشان أحافظ عليه..خالد
أبو النجا كان تحفة وهو بينقذ شريف عشان يبتدى حياة جديدة نضيفة ..هو ده الاصلاح فعلا ..عجبنى الفيلم مهما اتقال عليه من نقد ..عجبنى وعشش فى دماغى ..ملحقتش قص ولزق بصراحة كنت مشغولة فى الحاجات اللى كانت بتلزقنى على قفايا ..بقية الافلام رميت معظمها بس الشبح عجبنى ..شفت كتكوت الصراحة السنة دى وضحكنى بجد ابن الايه والله يضحك ..محدش يقوللى ده هبل وبتاع ..هو فيلم حلو ودمه خفيف ..شفت فيلم سبايدر3 وكان قمة فى الجمال والحلاوة والله ..دى الافلام ..الاغانى بقى معظم السينجلز اللى نزلت الصيف ده كانت جامدة خصوصا بتاعت مدحت صالح..اغنية بابا بتاعت عندليب الدقى ..اغنية عجميستا ..اغنية فيلم الشبح اللى خليتنى اسمع شريط احمد سعد كله ..اغنية فيلم البلياتشو..معظمها كاتبها ايمن بهجت قمر على ما اظن ..

احلى فيلم اجنبى شفته
prime , ratatouille
احلى كتاب قريته اجنبى
comme le fleuve qui coule
احلى اغنية اجنبية اغنية فى اخر فيلم
painted veil : il y a longtemps que je t'aime
jamais je ne t'oublirais

شفت طبعا كام كليب كده كوميدى شوية ..مثلا عاوزة عريس بتاع مروة ..بص على الحلاوة بتاعت حجازى متقال ..وفيه كليب جديد نازل لدوللى شاهين عاجبانى الاغنية ..الالبومات اللى نزلت يعنى مش قد كده بس عمرو دياب نفس المركز طبعا ..احمد سعد برضة حلو ..اللى نازل اخر الصيف وشيك قوى وجميل جدا بتاع سنين أول مرة اسمعهم بس الاغانى راقية وجميلة يستاهل انه يتسمع..كمان اغنية ادم الاخيرة ..بعرف الحاجات دى كلها من فين ؟ نجوم اف ام فى العربية طبعا ولما برجع البيت بقعد أقلب فى القنوات وانا بقلب الشاى ..ياللا المدارس خلاص فى وشنا ..قصدى الكليات والدراسة ..اه نسيت أقول ان حبوكشة جه بالسلامة واسمه أحمد ..وأسامة جاب نور الدين..ياللا كل صيف وانتوا طيبين

حصاد صيف 2007-الجزء التانى

نبتدى الحصاد ؟ نبتدى ..الصيف ده انا مش فاكرة ابتدى امتى ..انا اخر حاجة فاكراها ان على أواخر شهر 2السنة دى كان عندى امتحانات وبريزنتيشنز بالهبل ..ولما رجعت البيت على اخر امتحان وكان عن التسويق الطبى كنت تعبانة جدا ومن كترة الاجهاد قلت لماما لو حصللى حاجة بالليل أو تعبت قوى انقلينى على المستشفى ..كنت حاسة ان من كترة الاجهاد والتعب قلبى كان حيوقف..بس اكلت شوربة عدس وبصل اخضر فى اليوم ده وشربت ميه كتير ونمت بعد ما شربت اللبن واخدت فيتامينات بعد كده بس اتظبت ..وبعديها بأسبوع قدمت المشروع بتاع التخرج من الجامعة الامريكية وفى خلال كام يوم كننا امتحنا وخلصنا ..كان باين مكافحة عدوى فى المستشفيات ..المهم طول الدراسة فى الايه يو سى كان نفسى أكول كلب ساندوتش من عندهم ولمدة 6 اشهر مش عارفة ايه اللى منعنى من دخول الكافيتريا عندهم ..والله كنت بنسى وباخود القهوة ومعايا الجرنان فى الدور التانى او فى الحوش تحت الشمس..بعد هيصة الامتحانات والدربكة دى ابتديت أروق المكتبة عندى ..مش عاوزة ارمى حاجة كلهم أولادى ..جه شهر تلاتة جددت فيه أجازتى وابتديت اتدلع شوية وعملت بروجرام للسفر والخروج معملتش معظمه لان خطتى كنت بعدل فيها كل شوية حسب الفلوس والوقت والطلبات والاولويات ..كانت سفرية اسكندرية والاقامة فى فندق فى ميامى من أجدع الحاجات اللى عملتها السنة دى ..ركبت هناك التوصيلة بتاعتهم ووصلت للمعمورة والمنتزة وكوم الدكة وأبو قير وراس التين اللى شربت فيها احلى قهوة شربتها الصيف ده ..اهم من ده كله انى زرت مكتبة الاسكندرية كانت من اروع الحاجات اللى شفتها حسيت انى مش فى مصر اصلا ..ومن المطعم اللى فى الفندق اللى اكلت فيه سمك تلات تيام ورا بعض ابتديت لما رجعت القاهرة انى اطبخ بجد لزوم الاحتياج ولازم اعتمد على دراعى لان ببساطة مفيش حد بيشيل حد فى الطبيخ بالذات بالرغم من انى بعز قوى سندوتشات المدرسة اللى بعملها لزوم النبتشيات ..الصيف ده كمان اتأكدلى ان النادى بتاعنا لامم لامم يعنى ..والشجرة اللى كنت بقعود عليها اتنكدت تحتها من صاحبتى من ايام المدرسة عشان برضوه موضوع النيلة الجواز وسنينه ..من ساعتها مروحتش تقريبا يمكن من الحر واللا الزهق مش عارفة ..طبعا التمشية فى وسط البلد بقت بسيطة جدا مع الجو الرهيب اللى عشنا فيه الصيف ده فبقيت بشترى الحاجة من محل واحد واجرى اخود تاكس اروح على طول..لقيت فى مكتبة الاسرة والقراءة للجميع كام قصة حلوة اشتريتهم بسعر معقول خصوصا لأورهان باموك بس لسه مقرتش منهم حاجة وقصة عجيبة كده اسمها الفسكونت المشطور شكلها فلسفى وشكلها تتقرى تحت اللحاف فى الشتا ..القصص والافلام بقى عايزالها فردة لوحدها مش حقولها دلوقتى ..بس من اكتر الحاجات اللى تعبتنى الصيف ده التدوير على شغل ..ملقتش ..مفيش اللا شغل المستشفى اللى انا فيها وعلى الله كمان يفضل موجود..بالنسبة لماجستير الجراحة اتطلب منى دراسة موجودة على النت اصلا يعنى حاخودها كوبى وبيست وادفع تمنها طبعا عشان الارتيكلز مش بالمجانى وزودوا علينا المصاريف قوى فى الدراسات العليا قمت قلبت الماستر دبلومة واهى ماشية عادى يعنى مش بتقول لأ..الصيف ده كتير ناس ظهروا قوى بالصورة الواقعية بتاعتهم ..القناع وقع من على الوش تماما ولقيت وشوش وحشة قوى ..كانت مخبية الخرا ده فين مش عارفة ..وليد مات السنة دى فى شهر ستة ومصدقتش ان صاحبى ده مات ..هو كان حلقة الوصل الاخيرة بينى وبين دكتور كنت بحبه وعرفت فى العزا انه حيخطب وعزمنى بنفسه ..دكتورة زميلتى كنت معتبراها اختى الصراحة ضربتنى فى ضهرى فى الشغل الجديد اللى كنت حتقبل فيه بس ربنا عوضنى ببداية دراسة لموضوع فى الطب مريح الى حد ما وربنا يجعله فتحة خير علييا قولوا ان شا الله ..بعد حكايات العزا وفركشة اخر خيط فى موضوع الارتباط وفقدان الفرصة فى شغلانة انا كنت شايفاها حلوة ..رحت الحسين عشان اغسل همومى شوية ..صليت الجمعه مع الناس وشفت ناس زيى بيلجأوا لربنا بعد ما اتسدت فى وشهم -الهى تتسد فى وشوكوا يا بوعادا قادر يا كريم-ربنا يفرجها علينا كلنا ويطلعنا منها على خير يا رب..المهم مع الروحانيات دى خرجت اتمشى فى الخان ولقيت بدلة الرقص دى قمت صورتها ..الحسين من الاماكن اللى ليها طعم مميز..اذا كان فيه وقت فى رمضان يمكن اروحه تانى ان شاء الله ..يعنى باختصار سافرت اسكندرية وشفت كام فيلم وسمعت كام اغنية وقريت كام قصة وشفت ناس على حقيقتهم وحضرت عزا وحضرت فرح وسمعت عن خطوبة فلانة وفلان وجوازفلانة وفلان وحولت دبلومة مش ماستر..المترو حاولت اتجنبه عشان الروايح اللى فيه فى الصيف محدش بيستحمى اصلا ..ركبتة كام مرة كده على الماشى ..اكتشفت على اخر الصيف انى بعد ما جبت هدوم للبيت وقمصان نوم صيفى انى معنديش لبس صيفى كفاية ..ياللا ادينى بحاول ألحق الايام دى ..لسه فاضللى كام ورقة كده بين الجامعة والقصر والمستشفى والنقابة -يا لهوى-عشان أخلص ورق من ماستر لدبلومة ..ودمتم

حصاد صيف 2007 -الجزء الاول

الجواز ده زى العربية المرسيدس كلنا بنشوفها فى الشارع ومع ناس ساعات يستاهلوها وساعات لأ..بس مهما كان شكلها ولونها وحجمها وتصميم صالونها كلنا نفسنا نركبها وتكون ملكنا ...كلنا بنجرى عليها سواء ليها مساوئ أو مميزات ..بس كلنا نفسنا فيها ..وعشان نطولها بنجرى فى الدنيا دى يمين وشمال وفوق وتحت ..بكل قوتنا وبكامل طاقتنا ..وفى ساحة التنافس ساعات بنضحك على دقون ناس عشان نطولها وساعات بنضحك على ناس ونخليهم يشتروها وفيها عيب فى التصميم لا يغتفر مهما حاولت تظبت السوفت وير بتاع الكمبيوتر بتاعها عمرها ما حتتعدل معاك..المرسيدس دى غاية ناس كتير وعشان يوصلولها مش بيبرروا الوسيلة اللا بكلمة واحدة الغاية تبرر الوسيلة ..فى السباق كلنا بننسى ان الملك صاحب كل شئ هو مقسم الارزاق..ممكن المرسيدس اللى بنجرى عليها كلنا نطولها أو منطولهاش..وممكن بعد ما نفتكر ان خلاص مش حتيجى ..تفتح الجراج بتاعك فى يوم من الايام تلاقيها مستنياك وصالونها تستريح فيه وتكون قرة عين ليك وتبتدى معاها أحلى ايام حياتك ..وتفتكر دايما ان الله موجود ومش بينسى حد

رسالة بعتها مرزوق لتفيدة لما شاورتله على مرسيدس بعيون وهما فى الشارع
تفيدة بصت للرسالة وقالت :مرزوق ده باين عليه عربية كارو

تفيدة ومرزوق -الحلقة 9

تفيدة -بعكس ما كانت منورة جوه بيت مرزوق-بقت مضلمة على الاخر وهى قاعدة جنبيه فى التاكسى..مرزوق كان بيبص من الشباك اللى جنبه فجأة نغزته تفيدة فى وركه

مرزوق: أى
تفيدة : أى ! ده من حقى انا اللى أقولها
مرزوق: ايه يا حبى مالك يا عسل ؟
تفيدة : أمى
مرزوق: وايه اللى جاب سيرة امك دلوقتى ؟
تفيدة : أفندم ؟
مرزوق: لأ حبيبى لازم نكون حلوين مع بعض احنا خارجين نتفسح
تفيدة : نتفسح ؟ فسحك عفريت يا بعيد منتا مش دريان بحاجة..أخ يااااانى
مرزوق بلهفة : مالك يا تفيدة ؟
مرزوق حط ايده على كتفها
سواق التاكس عدل المراية عليهم واتنحنح
تفيدة بتجز على سنانها :شيل ايدك لأقطع ايدك
مرزوق شال ايده فى لمح البصر...قاعد جنب تفيدة مبحلق وبعدين ابتدى يسبل
تفيدة : والله ما وقت التسبيل ..أمى عاوزة تجوزنى
مرزوق: منا حبيبك يا جميل وحبقى عريسك بعد البكالوريوس..عريس الهنا يا تفدفد
تفيدة : ياللا ننزل هنا ..وقف يا اسطى
الاسطى : مش كنتوا رايحين الزمالك ؟ نازلين المهندزين ليه ؟
تفيدة : حد يروح الزمالك عن طريق المهندسين وشارع جامعة الدول ..بقولك اركن هنا سامع ؟
الاسطى ببرطمة:انا عارف الاشكال دى بيجيلها عرسان ازاى ؟
تفيدة نزلت من التاكس ومكانتش طبعا سامعه اللى الاسطى برطم بيه
مرزوق دفع الحساب من فلوسه وبعدين لف لتفيدة
مرزوق: مش قلنا كل حاجة فيفتى فيفتى ؟
تفيدة : مرزوق! مش انت الراجل واللا ايه ؟
مرزوق: انا مش راجل فى الحاجات دى ..بس راجل فى حاجات تانية ..نياهاهاها..متضحك يا جميل
تفيدة بصت له بقرف :لما نشوف يا سى راجل ناوى تعمل ايه فى الداهية دى
مرزوق: داهية مين كفى الله الشر
تفيدة : والنبى يا مرزوق شربنى حاجى لحسن ريقى ناشف

مرزوق طبعا خدها على أحسن كوفى شوب فى المهندزين ..قعدوا يتمشوا لحد ما رجليهم خلعت من روكبهم وبعدين قاللها مرزوق :هوه ده ..جاية تفيدة تفتح الباب وتشم هوا التكييف النضيف المحمل بريحة بارفانات باريس قام شدها مرزوق

مرزوق: لأ مش من هنا ..من هنا
كان بيشاورلها على محل عصير القصب اللى جنب الكوفى شوب
تفيدة فى سرها :شكلى حوافق على العريس اللى امى جايباهولى ..بس مرزوق حبيبى
مرزوق : وحياة ربنا يا تفيدة لو معايا فلوس كنت دخلتك احسن مكان انتى عارفة انا مش بخيل وبحبك قوى بس اديكى شايفة البير وغطاه وعارفة انى مش بشتغل بس اوعدك حقطع الدنيا شغل لما نتخرج واجيبلك كل اللى انتى عاوزاه
تقيدة بتطبطب على ايد مرزوق وبتبص فى عينيه الحنينة : والله يا مرزوق انا بحبك قوى ..قوة الراجل فى حنيته على اهل بيته وانت حنين وطيب

تفيدة فرت الدمعة من عينها ..أول مرة مرزوق يشوفها ضعيفة ..شيطانه صورله انه ينتهزالفرصة وحيوانه الداخلى اتحرك معرفش لا يلم لا شيطانه ولا حيوانه ..قام حضن تفيدة وباسها وبعدين جرى ناحية عمود النور مستنى البوكس ييجى يشيله
تفيدة معملتش حاجة ..وقفت مخضوضة ومخها عمال يلف فى دواير ..صور العريس على صور مرزوق عمالة تيجى فى عينها ..لقت قلبها اختار مرزوق..قامت جريت عليه ..مرزوق شاف كده قام خاف وجرى بعيد

تفيدة : مرزوق تعالى هنا متخافش
مرزوق : تفيدة اعقلى احنا داخلين على البكالوريوس كمان كام اسبوع
تفيدة : تعالى والله مش حعملك حاجة

ولاول مرة فى تاريخ تفيدة تحضن مرزوق وتبوسه على خده ..مرزوق قلبه مكانش مساعيه الفرحة بس المرة دى منتهزش الفرصة ..حس باحساس غريب أول مرة يحس بيه ناحية تفيدة ..مش احساس بالانانية ..لأ احساس بالرحمة واحساس انها محتجاله وهو محتاج انه يحميها من اللى مخوفها ..قعد يقول فى سره : تفيدة ليها عفريت ؟ مكنتش أعرف انها ليها عفريت وبتخاف منه ...كان عاوز يحميها من عفريتها بكل كيانه ..قام لافف ايديه عليها وحضنها ..و وشوشها فى ودنها

مرزوق بيوشوش تفيدة : انا بموت فيكى وحموت عليكى يا تفدفد

تفيدة ومرزوق-الحلقة 8

تفيدة طلعت بت جدعة بنت بلد عترة ودكتورة شاطرة كمان ..أول ما مرزوق مشى على علاجها يومين بس فط زى الحصان من على السرير ووشه نور ..طبعا كدكتورة راحت تفيدة تطمن على عيانها وبالمرة تاخود الفيزيتة من ام مرزوق

تفيدة : التلاتة جنية يا ام مرزوق بلاش الحركات دى
ام مرزوق: مش شايفة انهم كتير يا دكتورة
تفيدة : عشان خاطر الجيرة والعيش والملح خليهم 2 جنيه وربع
ام مرزوق: تبقى تتغدى معانا كمان يا بت يا تفيدة
تفيدة : وعاملة ايه لمرزوق على الغدا ؟
ام مرزوق: ملوخية خضرة
تفيدة بزعيق عالى سمعت بيه الجيران وجيران الجيران اللى طبعا فتحوا الشباك يتفرجوا على الخناقة : ايه !ملوخية لواحد بيسهل ؟

مرزوق طبعا خرج من القوضة بتاعته يلم الدور بينهم بدل ما يشبطوا فى بعض..وبعدين ام مرزوق حتبقى حماتها هو عاوز البيت يولع من أولها واللا ايه ؟ما هى تفيدة اصلا حتعيش معاهم فى القوضة بتاعته هو لاقى ياكول لما يجيب شقة

ام مرزوق: ومالها الملوخية الخضرا ؟ دى شفا
تفيدة : يا أم مرزوق بلاش تنرفيزينى وتخبطى معايا فى الحلل
مرزوق: يا جماعة صلوا على النبى ..وحياة ربنا منا واكل من الملوخية
ام مرزوق: اللهم صلى عليك يا نبى
تفيدة : ماشى يا مرزوق..هاتى الفلوس يا ولية بتاعت الفيزيتا
ام مرزوق: خدى بلاش وجع دماغ ..انا عارفة مرزوق بيعرف الاشكال دى منين
مرزوق: من الكلية يا أما
تفيدة وهى بتزغر وعينيها بتحمر وبقت شبه امنا الغولة :ايييييييييييه ؟
مرزوق: لأ تفيدة أوعى تفهمينى غلط انا قصدى ان انتى هدية من السما لييا من الكلية
تفيدة : ايوه كده اتعدل ..قوم معايا مش طايقة ريحة امك فى البيت
مرزوق: على فين ؟
تفيدة : لما أقول كلمة تمشى من غير مناقشة ..فاهم ؟
مرزوق: حاضر حاضر يا تفيدة والنبى ما تزعلى نفسك ..احيات النبى يا شيخة لنتى ضاحكة
تفيدة : من عونايا يا مرزوئتى ..بس مليش نفس دلوقتى اضحك اللا لما نخلص الامتحانات
مرزوق: امتحانات مين ؟
تفيدة : يا خراااااااابى ..امتحانات البكالوريوس يا بعيد
مرزوق وشه اصفر: تصدقى افتكرت اننا اتخرجنا
تفيدة : شوف الراجل ؟...انت لسه بتجيب سجاير فرط من الواد اياه ؟
مرزوق: اه ليه ؟
تفيدة : بطلها يا مرزوق ادينى بقول لك
مرزوق: اى حاجة يا جميل تؤمرنى بيها انا انفذ على طول ..سوانى واكون جاهز
ام مرزوق فى سرها : كتك وكسة يا بعيد ..طول عمرك موكوس يا مرزوق..خليها تركبك وتدلدل رجليها
تفيدة : بتقولى حاجة يا طنط ؟
ام مرزوق : لا يا بنتى حقوم اعملوكوا الشاى
تفيدة : اه بحسب

ام مرزوق انسحبت داخل المطبخ ومرزوق خرج لابس اللى على الحبل ..تفيدة ابتسمت قوى ووشها نور..مسكت مرزوق انجاجيه وعدت على باب المطبخ

تفيدة لأم مرزوق: سوكى ع الشاى يا طنط

وهبدت الباب وراها

تفيدة ومرزوق-الحلقة 7

مرزوق جابوله ولاد الحلال المرة دى مش عربية الاسعاف ..لأ ..لموا من بعض وجابوله محامى مجدع ..بيعتمد فى نظرته فى الحياة على مبدأ الصيت ولا الغنى ..قام لازم فى الظروف الصعبة دى يقوم بوقفة جدعنة مع مرزوق خصوصا انه ابن حتته وواكل معاه جبنة بيضة وبطيخ ..قام المحامى طلعه من المشكلة دى عشان يلحق امتحان البكالوريوس وبالمرة كمان كماله للجدعنة مخدش الفلوس..قام مرزوق دافسهم فى جيبه ولما الناس سألوه عليها بعد ما طلع من القسم قالوهم : حين ميسرة
..قاموا الناس بدل ما يعملوله ليلة ويعزموا أهل الحتة كلهم على فول نابت وعيش بلدى قاموا اكتفوا بزغروتين ..الناس معزورة برضه
تفيدة من الناحية التانية ولا على بالها مرزوق خالص..باصة لمستقبلها وباصه فى حلة المحشى اللى بتحشيها ..مسكت البتنجان بتأوره وبتحشيه متخيلة حاجات قبيحة وبتضحك مع نفسها : نياهاهاها...قام طيف مرزوق طلعلها فى تأويره البتنجانة ..

طيف مرزوق: انا خرجت من السجن يا تفدفد
تفيدة : كفارة يا طيف
طيف مرزوق: مش حتدينى حاجة على الماشى
تفيدة : حلبسك حلة المحشى اللى فى ايدى دى ..غور من وشى

بعد ما طيف مرزوق غار من قودامها وهو مكسور الخاطر..قام صعوب عليها

تفيدة لنفسها : ينيلك يا بت ..صوعوب عليكى ..كتك خيبة ما هو ده الحب الهى تعدم عافيتك يا مرزوق

مرزوق مكدبش خبر..قام جاله اسهال حاد نتيجة الرمرمة من السوق وبقاله كذا يوم فى الحمام والبكالوريوس على الباب خلاص وتفيدة حتى مش راضية تديله ميسد كول
على النقيض من تفكير مرزوق تفيدة على الناحية التانية من الحتة عماله تتزوق فى المراية وتقرص خدها اليمين والشمال عشان يحمروا وقامت لفت حلة المحشى ونزلت جرى على بيت مرزوق..قال يعنى حتسأل على مامته جارتهم

تفيدة وهى نازلة زحاليق على السلم:أهو يدوق عمايل ايديا

تفيدة وصلت البيت بتاع مرزوق بالسلامة وبعد السلامات والتحيات والخد والهات ..قام مرزوق خرج من الحمام وهو خاسس النص ووشه داخل لجوه وعينيه زايغة ..تفيدة بصيتله وافتكرت أطفال سنة خامسة اللى كانوا مرازمس خالص ..قامت شالت الافكار المتهتكة من دماغها واللى هى طبعا أفكار جنسية بحتة مع أفكار طبية على أفكار من طبيبك الخاص على أفكار الافلام ايياها على افكار بنت خالتها ..وخلت قلبها بس هو اللى يحس بوجع مرزوق

تفيدة لنفسها :ده اسهال ونتايجه ..لازم أعالج مرزوق وأهوه يشيلها جميله مع انه ميستاهلش البعيد

فزت تفيدة من جنب أم مرزوق عشان تجرى عليه تسنده قبل ما يوقع ووشه يتدمر

تفيدة : مش طالبه كمان ماكسيللو فيشيال قبل الامتحان
مرزوق: تسلمى ياأميرة يا بنت الناس الكومل
تفيدة بحنية زيادة شوية :مرزوق روحى.. كده تسيب نفسك تتصفى من الاسهال واللا انت خسيت من حاجة تانية قول لأقطع خبرك
مرزوق وفى عينيه نظرات الاسى : انا عمرى ما خنتك يا حبيبتى والله ده من كتر الاسهال اللى انا فيه

تفيدة لفحت مرزوق على كتفها وجاراه على سريره زى الدبيحة..هبدته على السرير

تفيدة : ما تاكولش حاجة وخد ارسيفوريل وفلاجيل وزنتاك وتعيش على سفن اب ..فاهم ؟
مرزوق:فاهم يا تفيدة ..بس انتى وحشتينى قوى
تفيدة وهى بتبوس مرزوق: قوطوع العيا على سنينه ..خد البوسة دى يا ابنى فيها الشفا
مرزوق اتكمل عليه قبل امتحانات البكالوريوس

تفيدة ومرزوق-الحلقة 6

خلااااااص مرزوق قرب يتجنن من حب تفيدة ..حبها اتملكه تماما ..والقرار مش سهل ..طيف تفيدة عايش معاه فى الكتب والنوتس بتاعت الدروس والورق اللى مصوره من المكتبة ..يهش الطيف من الكتب يطلعله فى حلة الطبيخ ..يدلقه فى الكنيف يطلعله من البلاعة ينغص عليه عيشته وهو قاعد على البيدية بيذاكر خراريج الاينس وكيفية وصول الخراج الى الايسكيوريكتال فوسا..يخرج من الحمام يغير هدومه يلاقى طيف تفيدة قودامه على السرير..يرمى نفسه عليه عشان يبوسه يقوم الطيف لاطشه بالقلم..مرزوق يسأل نفسه : هو ده طيف تفيدة واللا تفيدة بجد ؟
يخرج بره الاوضة وشه مكرمش ودقنه منبتة وشعره واقف يلاقى طيف تفيدة بيسبخه على الصبح : متغسل وشك يا منيل
يقوم يحس بالانتعاش والراحة
يروح درس الباطنة يسأله دكتور الدرس على اسباب جلطة القلب يرد : تفيدة هى السبب منها لله البعيدة
مرزوق خلاص البكالوريوس وتفيدة طيروا بقية الابراج اللى فاضلة ..قام راح وقف يذاكر جنب برج الجزيرة ..أهو برج ينفع بدل اللى طاروا
على النقيض تماما ..تفيدة تتسم بالنشاط والحيوية ..بتذاكر ليل ونهار نازلة حرت فى الكتب لدرجة ان أهلها بيشموا ريحة شياط من قوضتها وهى بتذاكر..بس كل حين ومين بتقفل الكتاب عشان راسها متسخنش أكتر من كده وتفتح الشباك بتاعها وتولع سيجارة على الماشى وتسرح فى حبيب القلب مرزوق

تفيدة لنفسها : يا ترى يا مرزوق بتفكر فييا

مرزوق : ايوه ..انا على طول بفكر فيكى ..دنتى روحى

تفيدة : طلعت روحك ..انت بتكلمنى واللا ده طيفك ؟
مرزوق: ده طيفى يا روح الروح
تفيدة : ازيك يا طيف هات بوسة

مرزوق : أهوه

تفيدة بتبص للطيف وراحت طشه وشها بشوية ميه
تفيدة لنفسها : قوطوعت السجاير..الواد بلية ادانى سيجارة محشية واللا ايه ..قوطوع وقوطوعت تجارة السكر نبات اللى ماشيلى فيها ..يا سلام لو ربنا فتحها على مرزوق كده ..الهى يديك ما يحرمك يا مرزوق يا حبيب الروح يا سنكوح
فى الجهة التانية مرزوق خلص مراجعة الجراحة والباطنة تحت عمود النور اللى جنب البرج..المكان كله بركة وخير والبرج ساعده انه يلقط المعلومات الطبية وهى طايرة بس أول ما طيف تفيدة ظهرله قام بايسه وتمادى شوية ..قام البوكس جه شايلة ..التهمة : فعل فاضح فى الطريق العام

مرزوق فى البوكس :الله يخرب بيتك يا تفيدة

طيف تفيدة لطشه بالقلم

تفيدة ومرزوق-الحلقة5

ولاد الحلال مكدبوش خبر..قاموا شالوا مرزوق من ع الكوبرى لما ما فاقش وودوه الاستقبال..تفيدة طنشت خالص على مرزوق ومراحتش معاهم بس قلبت فى جيوبه قبل ما يتشال على النقالة عشان تاخود فلوس من جيبه تدفع حساب المشاريب اللى على الكوبرى ..بتقول لنفسها

تفيدة لنفسها : كل ده عشان اديتله بوسة..يستاهل اللى حيجراله بقى فى الاستقبال طالما بيستعبط علييا وعامل نفسه اغمى عليه عشان يلبسنى فى دفع الحساب..طب يا مرزوق زوق لوحدك على الاستقبال
تفيدة بحس عالى: خلاص ..سوقوا بقى

المولد ع الكوبرى انفض وتفيدة شاورت للاتوبيس ونطت فيه وروحت ..صاحبنا مرزوق مكانش بيستعبط على تفيدة..لأ..هو اغمى عليه فعلا من كترة حبه ليها ..بس يا ترى تفيدة حتقدر الحب ده ؟
مرزوق وصل الاستقبال

دكتور الاستقبال: الله مرزوق؟
ابن الحلال رقم 1: متشوفه يا دكتور
ابن الحلال رقم 2:هو مفيش دكاترة هنا واللا ايه ..محد ييجى يا جدعان يكشف ع الواد الغلبان ده
الدكتور: أومال شايفنى بعمل ايه وبعدين بلاش هيصة فى الاستقبال ..مرزوق كويس اهوه بيفوق
مرزوق: انا فين ؟ وانت مين ؟...منصور ؟
الدكتور منصور: مرزوق أبو زومول ..قوم يا راجل خضيتنا عليك
مرزوق قام بس مخستك شوية
مرزوق: ربنا يخليك يا منصور ده انا كنت ع الكوبرى وبعدين اوغمى علييا
ابن الحلال رقم 2: قصدك بعد ما اتباست ..هع هع هع
ابن الحلال رقم 1: خلاص بقى ربنا أمر بالستر
منصور: ايه الحكاية يا مرزوق ؟ بتلعب بديلك ع الكوبرى ؟ دى فيها مش أقل من 6 اشهر
مرزوق: ديل مين يا منص والنبى ده انا غلبان
منصور:بص بقى انت عندك شوية انيميا حكتبلك على دوا كده مش غالى ولا حاجة ومفعوله سريع انا اصلا مندوب بيع لشركته
مرزوق: والله وربنا فتح عليك يا منص..معكش منه عينات مجانى انت عارف الحال
منصور : خود يا عم ولا تغلى عليك
مرزوق: خلص الشيفت ووصلنى البيت انا مخستك
منصور:اذا كان حبيبك عسل
مرزوق: والنبى يا منص انا ما قادر اقوم ..عشينى جبنة رومى بعيش بلدى سخن وطماطم
منصور: من عينايا يا مرزوق انت تؤمر
مرزوق: يا أمير يا طيب..الهى ما تعدم عيانيناك
منصور: قول يا باسط

مرزوق كل السندوتش اللى منص طالبهوله من كافيترية المستشفى ..استنى شوية وبعدين وصله منص بالعربية ..رمى نفسه على السرير أول ما وصل ونام نوم عميق..تانى يوم مراحش الكلية وابتدى ياخود الدوا..بالرغم من كل شئ..تفيدة صورتها مش قادرة تسيب خياله ..فضل مبحلق فى الفراغ طول اليوم ولا فتح كتاب ولا حاجة والامتحانات على الباب..فكر فى حاله وحال تفيدة وقال لازم أخود قرار

تفيدة ومرزوق -الحلقة الرابعة

تفيدة مأنجة مرزوق فى دراعها وبتتعايق بيه على كوبرى الجامعة ..قلبها طاير من الفرحة عشان مرزوق حيوكلها اخيرا الحاجات اللى نفسها فيها ..مرزوق على النقيض قلبه مظأطط عشان بعد ما يوكلها الدرة المشوى والترمس حيوكلها الأونطة

مرزوق: نقعد هنا
تفيدة : مرزوق بص حنقعد عند الراجل التانى عاوزة اشرب شاى واعدل راسى بسجارة
مرزوق: مش حتبطللى بقى سجاير يا تفيدة
تفيدة : مرزوق ! دى حتت سيجارة يتيمة بشربها منك وبنفخ معاها كبت الكلية
مرزوق: والله الكبت ده حيتشال على ايدى
تفيدة : وبعدين يا مرزوق بتكسف
مرزوق: نياهاهاهاهاها
تفيدة بتبصله بقرف:على الله بعد البكالوريوس يبقى فيك نفس
مرزوق: متخافش يا جميل
تفيدة : بلا نيلة شكلى حجيبلك الحباية اياها
مرزوق :فشر
تفيدة : ده كلام لسه بدرى عليه انده على الواد ياللا
مرزوق: واد مين يا تفدفد ؟
تفيدة بشخطة :قوم فز هات لنا كوبايتين شاى
مرزوق:حاضر حاضر..هدى نفسك يا حبى

مرزوق جاب الواد من قفاه وقالوه عاوزين 2 شاى ع الكوبرى..مرزوق راجع جرى لتفيدة

مرزوق لنفسه: لازم اكون حنين معاها لحسن تزرجن زى العربية ..لأ تفيدة مش عربية ..لازم ابقى ناعم معاها لحسن تحرن زى الحمار..اه تفيدة حمار..لايق عليها

مرزوق رجع وقعد قودام تفيدة وهو لسه متخيلها بودان طويلة واربع رجلين وبوز طويل ..راح راقع ضحكة

تفيدة : ما تضحكنى معاك يا زأزوء
مرزوق: لأ..مش حضحكك اللا لما تدفعى تمن الضحكة
تفيدة :يا سلام ؟ بقى فيه حاجة تغلى علييا..تفيدة بتسبلله
مرزوق: ربنا ميحرمنى منك ابدا
تفيدة : هات ايدك وتعالى نقف جنب العمود الضلمة ده
مرزوق: حتعملى ايه ؟
تفيدة :حقولك كلمة فى بوقك
مرزوق مصدقش نفسه..أوغمى عليه
تفيدة شالته على الكرسى مع 2 جدعان وفوقته بجردل ميه
مرزوق: انا فين ؟ انا مين ؟ انا بكام ؟
تفيدة :كنت حديك بوسة على خدك ..كاك وجع ملكش فى الطيب نصيب
مرزوق: ملحوقة يا جميل
تفيدة : بعينك
مرزوق:انتى عينايا وروح قلبى
تفيدة هجمت على مرزوق وباسته بوسة قاتلة
مرزوق شالوه على الاستقبال

تفيدة ومرزوق-الحلقة التالتة

تفيدة واقفة قصاد المراية بتعدل حواجبها عشان بيوجعوها ..بتحط كريم الاساس المخالف للون جلدها عشان تبان ابيض من الحليب..فجأة قلبها وجعها وصورة مرزوق جت فى عينيها ..عينيها اتملت بالدموع

تفيدة لنفسها: مرزوق حبيبى وحشنى ..بقاله كتير مطنشنى ..يا ترى انت فين يا مرزوق..أهئ اهئ

على الناحية التانية مرزوق بيدورله على حب جديد طالما تفيدة هارياه ضرب وجبيتله اخر مرة شرخ فى الدراع وخد 21 حقنة من عضتها فى مستشفى الكلب

مرزوق: يا ترى بتحبينى يا سينيوريتا ؟

سنيوريتا : حب مين ؟ دنا خارجة معاك كده جدعنة
مرزوق: يعنى مفيش مشاعر وحب ..امشى من وشى ..حبيبتى تفيدة وحشتنى ..يا ترى انتى فين يا تفيدة

تفيدة سمعت نداء حبيبها بقلبها..قامت اديتله ميسد كول

مرزوق مصدقش نفسه :تفيدة بترنللى ..حنيت خلاص يا جميل

مرزوق بيتصل : روح قلبى ونور عينى ..وحشتينى قوى

تفيدة : هنت عليك يا مرزوق للدرجة دى ؟ مطنشنى بقالك اسبوع
مرزوق:كنت فى المستشفى بتعالج يا روحى من العضة بتاعتك
تفيدة : مرزوق سامحنى
مرزوق بحنية :قلبى مش ممكن يروح لحد غيرك ..مفتاحه معاكى يا تفودة
تفيدة :مرزوق
مرزوق:نعم
تفيدة برقة متناهية :بحبك

مرزوق أوغمى عليه

تفيدة ومرزوق -الحلقة التانية

مرزوق فرحان بنفسه أوى النهارده ..عرف يزوغ من باب الكلية وهو معاه علبة كشرى ..كان ناوى يعزم تفيدة عليها أهوه يبقى عيش وملح ..فضل يستنى يستنى لحد ما الجوع ما قرصه ..تفيدة لسه غارزة فى المشرحة ..استنى تانى انها تخرج لا حس ولا خبر..السكشن طول والجو حر..خاف لحسن الكشرى يبوظ قام كالوه كله
قام وقرفص وقعد على حرف سور الكافيتريا اللى قودام المشرحة وعينه على بابها عشان يلقط تفيدة وهى خارجة ..حط ايده فى جيبة طلع سيجارة سوبر فرط مكرمشة ..بص لها وفردها

مرزوق لنفسه : الحمد لله انها مش مقطوعة كنت حزعل قوى ..كشرى ب2 جنية وسيجارتين بربع يبقى 2 وربع ومعايا لسه ربع جنيه لزوم الشعبطة فى الاتوبيس يبقى 2 ونص ..مظبوط كده ..اااااااااخ لو كان الفقر ده دكر كنت قتلته

مرزوق ولع السيجارة وبيشد نفس ..لقى ايد شكلها مش غريب عليه بتتمد على السيجارة وبتاخودها..الايد دى مش غريبة عليه بالرغم من طول ضوافرها ولونها الاحمر الدموى ..رفع عينه فى وش اللى سحب منه السيجارة ..اتخض وشعره وقف

مرزوق :تفيدة ؟؟؟؟؟؟
تفيدة وهى بتشد نفس : ايوه ..مالك مخضوض ليه ؟
مرزوق بيبص ببحلقه قوى فى وشها اللى مدهون بكيلو مكياج
بيبلع ريقة وبيرد
مرزوق: انا مخضوض ؟ بس عشان شفت وشك الجميل ده ..ده نيو لوك ؟
تفيدة :عجبك ؟
مرزوق : أى حاجة جاية من ريحتك تبقى حلوة
تفيدة : أه ده انا حاطه شانيل من عند الولا بتاع الريحة اللى من حتتنا
مرزوق: انتى كلك انوثة من غير أى حاجة يا تفيدة دنتى خطفتى قلبى من أول قشرة موز بيننا
تفيدة بتنهيده : كلامك حلو حتخللينى أموت فيك
مرزوق:انا بموت فيكى..بمناسبة الموت ايه اللى أخرك لحد دلوقتى فى المشرحة ؟
تفيدة :الله !! حتعمل علييا تفتيش واللا ايه ؟ لأ بقولك ايه
مرزوق: والله ما قصدى حاجة يا تفيدة ده انا بس اتجننت لما مجتيش من بدرى
تفيدة بتجر ناعم : والله عندى امتحانات الترم ومذاكرتش على جثة
مرزوق: انا جثتك يا حبيبتى
تفيدة : مرزوق ! الله بقى
مرزوق: بموت فيكى
تفيدة قلبت : وانت اسم الله مش عندك امتحان زيى واللا ايه ؟ واللا ناوى تبلط فى الخط فى الكلية دى ؟
مرزوق يتصبب عرقا : والله يا تفيدة انا امتحنت الاسبوع اللى فات ومستنى النظرى زيك بس انتى اللى معاد عملى المشرحة بتاعك جه الاسبوع ده
تفيدة بحنية : ادعيلى
مرزوق: بحبك وبدعيلك ..تفيدة
تفيدة : نعم
مرزوق : ادينى بوسة
تفيدة بتهبد كتب التشريح على دماغه : قوطعت وقوطوعت سير ة الاناتومى ..بوسة مين يا معفن
تفيدة بتلم الكتب والورق اللى اتقطع منها من على ارض الكلية وواخدة فى وشها جرى من باب الكلية عشان تلحق تنط فى الاتوبيس
مرزوق: برضه ضرب الطبيب زى شورب الزبيب..بموت فيكى يا تفيدة
مرزوق أوغمى عليه واتنقل على الاستقبال

مسلسل تفيدة و مرزوق-الحلقة الاولى

تفيدة بتحب مرزوق ومرزوق بيحب تفيدة..تفيدة جالها عرسان ياما من الحتة بس كانت معربنة على مرزوق..أول ما شافت عينيه وقعت من طولها ولما جه يشيلها استلبطت واتسندت عليه ولما جت عينيها فى عينيه تانى اتنهدت وسرحت وقامت قربت من وشه ولاطشاه بالقلم

تفيدة : ماسكنى كده ليه ؟
مرزوق:مش بسندك يا بنتى ؟
تفيدة:يوووه اه والله ده انا أوغمن علييا قودام المشرحة
مرزوق:أوغمن عليكى ؟ يا بنتى ده انا شايفك بتتزحلقى فى اشرة موز وبعدين ليه ضربتينى بالقلم؟
تفيدة :ما انت عمال تمسكنى كده وتستعبط
مرزوق بتسبيلة : ما انا خوفت عليكى -بيتنهد

مرزوق هوه كمان وقع فى حبها من اول نظرة ..ولمما شافها بتتزحلق فى الموزة اللى كان قاصد يرميها قصادها قام استعبط وجرى عليها يسندها قبل شلة الصيع اللى واقفة جنب المشرحة ما تتريق عليها

مرزوق:ده انا مقدرش أشوفك بتضربى بالانس فى الهوا قودام أى حد ..وحياة القلم اللى لسه معلم فى خدى
تفيدة : هاه..بتقول ايه ؟
مرزوق: كرامتك تتهان قصادى انا بس وحياة القلم اللى معلم أهوه
تفيدة لطشته القلم التانى وهى مكلضمة
تفيدة :كرامتى تتهان ؟ لا عشت ولا كنت ..اتفوه
تفيدة مشيت لبعيد وهى بتسب وتلعن
مرزوق: خطفتى قلبى ..يا روح قلبى

matchstick info

سمعت فى التليفزيون امبارح وانا على الواقف كده قبل ما انزل جرى اروح المركز الفرنسى -وطبعا ما عملتش الواجب حاجة تكسف-المهم سمعت ان اللى بياكلوا الخضار والفاكهة بيبقى مزاجهم رايق واللى بياكلوا لحمة ممكن يجيلهم اكتئاب وبيكونوا عصبيين جدا ..قالت الست اللى كانت بتتكلم ان اللحمة والبروتين عموما مصدر الادرينالين اللى هو هرمون بتاع الخناقات ..حسيت فجأة وانا قصاد المراية ان ودانى طولت وبوزى طلع لقودام وبصيت ورا لقيت ديل بيتهز يمين وشمال ..ده انا طلعت حمار بديل كمان ..ازاى نسيت المعلومة دى ؟ وأتارينى لما باكول لحمة بتحول الى شخصية عدوانية متوحشة ممكن تاكول عيالها ؟..قمت دورت فى كتاب الفارما ولقيت الاكويشن دى
tyrosine-->DOPA-->dopamine--->noradrenaline-->adrenaline
tyrosine by the way is an amino acid,amino acid= protein

أسبوع الهنا يا ريتنى ما كنت انا

يحضرنى الان- بعد ما قريت تعليق من صديق لبرنامجنا الناجح حلة وانا فيها-ذكريات أسبوع كل لما افتكره اقول انا لييا الجنة والله ..كان اسبوع كده مطلعتلوش شمس من اساسه وكان عندنا لستة طويلة بطول الهرم الاكبر والاصغر مجتمعان ..طبعا لما اللستة تكون طويلة لازم دكتور يقعد على العيان فى الرعاية او الدور يونسه كده عشان ميخافش..انا قصدى العيان يونس الدكتور عشان ميخافش اصل السكن بتاعى يخوف الصراحة
الاسبوع ده بالذات كان غريب ..طويل ويخوف ..كل العيال الاندال والله مش ناسيالكم ده ..سابونى لوحدى فى السكن الطويل العريض المكون من 3 ادوار ابرتع فيه لوحدى طالما انى حقعد على لستة طويلة سبت وحد وتلات وخميس ما حبكتش على الاتنين والاربع يعنى بييت فى المستشفى اسبوع بحاله ..اذا كنت متجوزة كان زمانى اتطلقت عشان جوزى هو كمان حيخاف فى البيت لوحده ..طبعا اهلى كانوا بيجيبولى هدوم ونواشف عشان اكل المستشفى لا يسر عدو ولا حبيب الصراحة ..الكشك ده يعتبر اكلة ترم العضم بالنسبة للى كنا بناكله ..بس اسبوع عرفت فيه حاجتين مهمين : انى لازم اجمد قلبى ولازم اتعلم الطبيخ
..انا من انصار السندوتشات بتاعت الجبنة وبحب الفاكهة وبحب أرمرم مع اللمة الحلوة بس يبقى من المحل اللى ورا المستشفى وقانا الله شره وندعو جميعا ان يكسر سمه
نرجع للسكن ..قعدت فيه ليلة لوحدى أجاركم الله انا قلت ده مسكون واللا ايه ؟ زى السكن اللى فى القصر بتحس بالنهار انك عادى كده ..بالليل بتحس ان الهوا من حواليك تقيل والله أعوذ بالله ..حتى التليفزيون بوظوه وبزهق من القراية والمرتبة بتقطم ضهرى ولسه عندى شغل طويل لمدة اسبوع متهجرة من البيت ..زمايلى ينزلوا العمليات شوية وانا اشيل ما بعد العمليات مع العمليات ..شوية على نص الاسبوع سافروا قرية فى الغردقة على حس مؤتمر بس ظبطوا العيال والمدام وانا طز فييا اتحرق انا وشى فى وش باب المستشفى
غريبة ان الناس اللى على الكورنيش متواجدين فى نفس المكان معايا فى عالم تانى وانا فى عالم تانى برضة بالرغم ان اللى بيفصلنا شارع
ناس بتهيص وبتدلع وانا مشدودة من عينايا وبتطلب صبح وليل ..العيان مش راضى يسبنى فى حالى ..انا بحب العيان اللى بيبقى ساكت الصراحة ده بيبقى حلو خالص وبموت فيه ..بيسبنى أدور فيه على الغلط براحتى دون اى اعتراض عشان بيكون يا اما جاى فى حدثة يا فى غيبوبة لأى سبب يا تعبان قوى لدرجة ان مفيهوش نفس يا اما ميت
المهم طبعا السكن ده طفشت منه بالليل مش طالبة معايا رعب وهو فى حتة هووو كده بعيد عن هيصة المستشفى ..خلانى افتكر يوم ما طلعت فى اسانسير القصر بعد ما نزلت فى التالت ويمكن فى نفس الليلة الله اعلم اتقتلت واحدة عشان يسرقوا دهبها واتكتبت الحدثة دى فى الجرايد ..المهم كان السكن ابن كلب أوى بالليل ومفيش حد معايا فى التلات أدوار..لوحدى ومش عارفة انام وافكار سودة حتلعب بدماغى ..3 ادوار لوحدى : ألطم ؟ قمت نزلت الطوارئ اكشف شوية أهى اكيد فيها حالات محتاجة حاجة تتعملها
الممر بقى اللى بين السكن والطوارئ موجود بين شجر وبين ازاز بيعكس الصورة بتاعت اللى ماشى جنبه
مش منور الممر ده اللا لمبة واحدة ..لجل البخت بقى فى الاسبوع ده اللمبة اتحرقت
قمت برضة قلت مفيش داعى للخوف..لازم الممر ده أعدى منه الى بر الامان ..كانت الساعة حوالى داخله على واحدة كده واللا اتنين بعد نص الليل ..أرجع السكن اليتيم ؟ واللا أجازف واعدى الممر ؟
الصراحة مكانش جايلى نوم قمت ما عدتش الممر..انا الصراحة لما شفت شكل الشجر بالليل وهو شبه البنى ادمين اللى واقفة فى الضلمة وانعكاس هيئة جسمى فى الازاز مع الضوء الخفيف اللى جاى من الادوار اللى فوق بعد الطوارئ مع صوت جزمتى الكوتشى ..قمت الصراحة خدت الممر ده جرى
وصلت بر الامان بقى ..عديت طرقة طويلة شوية اللى بتبقى بتشغى الصبح بالموظفين والعيانين واهلهم ..دلوقتى ساكتة سكوت يجمد الواحد كده سكوت غبى ..بصيت يمينى اخر الطرقة مطعمنا المبجل قافل يعنى مفيش عشا كمان ..ملحقتوش الصراحة أحسن
المطعم بقى ده فى الاسبوع اياه كان طبخ يوم كوسة واللى بعده فاصوليا واللى بعده مسقعة -حتى قلت ازاى العيان ياكول مسقعة ؟-واللى بعده حط بواقى الكوسة والفاصوليا والمسقعة على بعض وقالوا ده تورلى طبعا سبت أمه.. شكله وريحته مش عاجبنى يمكن يكونوا طبخوا تورلى بجد ويمكن يكونوا حطوا بواقى الاكل على بعض وقالولنا ده طبق اليوم ..مش عايزة أظلم حد والله أعلم بس طعمه وريحته تخليك تكتفى بالميه بس -اليوم اللى بعده كلت جبنة نستو الصبح وعاديكوا على اللى حصل والله كنت شبه مقيمة فى الحمام ..المهم قررت من يومها ان المطعم ده مش حدخله ..والله كفاية ريحة الطبيخ بتاعهم ايه ده ؟المهم مفيش احلى من النواشف والعصير فى الشيفت بتبقى فرش كده وفايق
نرجع تانى للطرقة الطويلة ..بعد ما عديت على المطبخ ومنطقة الامن الصناعى حودت شمال واخدت اول اسانسير يطلعنى الاول
طب ليه مطلعتش على رجلييا ؟ المستشفى مفيهاش صريخ ابن يومين فى الدور الارضى والاول تقولولى اطلع على رجلى ؟أدينى استنيت جنب فرد الامن لحد ما الاسانسيرطلعنى على الاول
وصلت الطوارئ..تلاقى طقم التمريض بقى لما يشوفنى على كلمة واحدة : والنبى بلاش طب نامى فى المكتب طب نفرشلك على الكنبة دى وتنامى ...بس بلاش تقعدى معانا والنبى عشان خاطرنا
عارفين ليه بيقولوا كده ؟ عادة من بعد الساعة اتنين بيبتدوا يبدلوا النوم ما بينهم اتنين اتنين يناموا ...أول اتنين البنات عشان يعرفوا يصحوا من بعد خمسة كده ويفوقوا عشان لسه على تمانية حيسلموا الشيفت ويطلعوا جرى على العيال يطمنوا عليهم فى المدارس ويبتدوا بقى سلسلة الجرى فى السوق على شرا حاجات وبعدين الطبيخ وبعدين مذاكرة العيال ومذاكرة الراجل
الولاد بقى بيكونوا شبه نايمين بره فى الطوارئ ...الجو هادى مفيش زباين ومهديين النور شوية وده نايم على كرسى والتانى على الكونتر بعد ما راجع دفتر الاستقبال
روتين يعنى ..انا باجى من هنا الدنيا تتبدل ..أول ما أقولهم بون سوار...ألاقى بقى الاسعاف داخل جرى والانوار تنور والبنات تصحى وكولات فى المستشفى كلها وشغل يمين وشمال والله استقبال حالات كتيرة جدا ومعظمها حالات ميجور مش مثلا مغص واللا ترجيع حاجات خفافى ..لأ تستقبل مثلا بطن مفتوحة ..واحد جاى بيرجع دم ..أطفال واقعين من الادوار العالية على ضغط فى السما على نزيف على أكيوت أبدومن ..كل كتب الجراحة والباطنة يا معلم بتراجعها ما بين الساعة اتنين والساعة خامسة الفجر لحد لما تقع من طولك الصراحة ..فبدخل الرعاية-بعد معركة الطوارئ- أدورلى على قوضة بمفتاح تبع النواب مفيهاش حد وادخل اريح شوية لحد معركة الصبح فى العمليات ..
قوض الرعاية بتاعت النواب مرعبة ..مرعبة فعلا ..متطرفة وبالليل شكل تانى ..لدرجة انك تتمنى انك تبقى فى القطب الشمالى واللا الجنوبى عشان الليل ميبقاش موجود 6 أشهر على الأقل عقبال ما يعدى أسبوع الهرس ده
دخلت قوضة وقفلت بالمفتاح قام الباب خبط..مين ؟ مفيش حد بيرد..اه ماهى ليلة باينة من أولها أكيد التمريض دعى علييا عشان كان -و لازال-وشى حلو عليهم
مين تانى ؟ مفيش برضة ...فتحت الباب وفى الضوء الخافت بتاع الرعاية لقيت جثة على تروللى قودام الباب بتاعى ..اتخضيت ..هى الجثة متغطية طبعا بس كونى مسمعتش حاجة بتتزق ولا صوت رجلين ماشية وفجأة ألاقى حد ميت قصادى اتخضيت ..بس طلع عم ابراهيم جايب شهادات الوفاة عشان تتكتب للعيان اللى مات وكان فاكر ان زميلى فى القوضة ..أتاريه كان شغال على أرست -توقف قلب-وانا دخلت ريحت مكانه
المهم ..الاسبوع ده عدى بطوله وعرضه بس انا اترعبت فيه من المستشفى عموما سواء السكن واللا الرعاية ..وقررت فيه الانقطاع عن المطبخ ..خصوصا بعد اسهال الميه ده اللى جالى ..قعدت أعالج نفسى 3 ايام بدل ما أنشف وانا غض برئ

برنامج :حلة وانا فيها -الحلقة التانية

والله طالمة الحالة مأشفرة شوية خصوصا اننا فى وسط الشهر كده وسحب الكهربا الله ينور ماشى على اخره الشهر ده مع شوية مصروفات عشان اللف بين الوزارة والقصر والمستشفى وتطليع اوراق وتطليع عينى ..قررنا مؤقتا استمرار القشفرة والارديحي لحين ما ربنا يفرجها ..وعشان كده حقول طريقة بسيطة جدا بس اللى عنده مصران عصبى -سورى-قولون عصبى -مصران دى قلبت على جزارة شوية -ما يعملش اللى حقول عليه واللى عاوز يغامر يغامر بقى ده مش قولونى
غريبة ان فيه ناس بتغسل قولونها عشان تخس...طب ما ياكلوا فايبرز كتير وياخدوا زيت خروع ماهو ده بينضف واللا لازم حقنة شرجية ؟
نرجع للطبق الاساسى بتاع القعدة النهاردة ..كلهم بيقولوا افتحوا التلاجة افتحوا التلاجة ..حاضر فتحناها ..لازم يتعمل حاجة باللى فيها ..لقيت كوباية زبادى وشوية دقيق فى كيس كده مركون جنب بقسماط القلى ومعاهم قرص ماجى يتيم
حنعمل ايه بالزبادى والدقيق والماجى؟ كشك على الطريقة التركية
طبعا مفيش بيت مفيهوش بصل ولا ماجى ولا لبن ولا خلاط ..الخلاط ده انا افتكرت انه رمز أبيح كهدية جواز ..أتاريه فرى ايفيكتيف جدا وعملى بطريقة عنيفة وسهل وبسيط وبيطلع الشغل بسرعة و100 100-طبعا كده الخلاط احسن من مليون جوز-بس ما علينا الرجالة برضه مننا وعلينا أو احنا اللى عليهم مش فارقة -وبعدين الخلاط مش بياخود حيز كبير فى المطبخ على عكس الراجل اللى ممكن كرشه بس يقفل ميدان التحليل -ما علينا
طريقة الكشك : زى ما اتفقنا قبل كده اننا مش من أنصار اللى بيحبوا الملح اللى بالكيلو فى الاكل
عشان كده حنحاول نقلل الملح فى الاكل من اجل حياة أفضل
بنجيب حلة متوسطة ونحط كوبايتين ميه وعليهم قرص ماجى وبصلة متقطعة ترانشات مش كبيرة
نسيبها على النار لحد ما تغلى والبصل يقرب يستوى ..نحط الملح والفلفل حسب الطعم بس حاسبوا تتلسعوا من الشوربة اللى بتغلى وسقف حلقوكوا يفأفأ زيى كده وتحوطوا أورال جل -اللهم احفظنا
اثناء البصل ما بيكون بيستوى نكون جبنا الخلاط وحطينا فيه كوباية ميه على 4 معالق كوبار دقيق على 4 زيهم لبن مع كوباية زبادى ونضربهم فى الخلاط لحد ما يبقوا دايبين فى بعض خالص زى اللى على كوبرى الجامعة بالظبط
المهم والحلة بتغلى بالبصل والماجى نصب عليهم الخليط اللى ضربناه يا حرام
ونقلب بقى على طول ونهدى النار خالص عشان ما يتلسعش من تحت
أول ما يتخن زى البشاميل وندوقه نلاقيه استوى -يعنى طعمه مش نيى يعنى مش باين فيه طعم اللبن او الدقيق وبقى تقيل
نحمر بصلة متقطعة رفيع على معلقة زيت صغيرة -أول ما البصلة تصفر وتقرب على اللون اللى بعده نقوم دلقينها فى الحلة بتاعت الكشك ونقلب شوية وبعدين نصب فى اطباق التقديم بقى
طبعا بيتقدم بارد وبلاش الطفاسةاللى بتدفعنا للتلقيط منه وهو سخن
ساعات ناس فايقة بقى بعد البصلة الاخيرة المتحمرة ما تتحط على الكشك يقوموا حاطيين حتت فراخ مسلوقة متقطعة صغير
وساعات ناس فايقة أكتر تعمل الكشك من أوله على شوربة فراخ

المهم كده أو كده الكشك بيطلع طعمه حلو وبالهنا والشفا على قلبوكوا وكل سنة وانتوا طيبين ونلقاكم على خير فى أكلات دسمة أخرى ..بفكر المرة اللى جاية نتقشف أكتر وأعملوكوا...
كاااااااااااااااااات

from the movie : akeelah and the bee

our deepest fear is not that we are inadequate
our deepest fear is that we are powerful beyond measure
we ask ourselves:who am i to be brilliant ,gorgeous,talented and fabulous?
actually,who are you not to be ?
your playing small doesn't serve the world
we were born to make manifest the glory of God that is within us
and as we let our own light shine,
we unconsciously give other people permission to do the same

برنامج : حلة وانا فيها

نظرا لقرب قدوم شهر رمضان بعد شهر شعبان اللى حندخله كمان كذا يوم كده ان شاء الله ..وعشان انا لقيت فى الطبيخ نوع من المتنفس الطبيعى للحاجة الساقعة ..قدحت زناد فكرى ودعبست فى الكتب وطلعت كتاب نظيرة ..انا فكرت انى اعمل برنامج حلة وانا فيها عشان كل لما اطبخ اكله لحد رمضان ما يخلص ان شاء الله اكتبها بوست وحكتبها بنفس طريقة عمايالى ليها ..بس بقول فى ودنوكوا كلمة أهم حاجة فى الطبيخ ودى سمعتها من شيف-بياخود فلوس اكتر منى بالرغم من انى انا وهو بنلبس تقريبا نفس اللبس فى الشغل -بيقول ايه بقى ؟ عوك زى ما انت عاوز فى الطبخة بس أهم حاجة التوابل والبهارات اللى بتستعملها ..قد ايه ونوعها ايه ؟..وانا بقول يا أوختشى ويا اخويا اللى بيقرا كمان عشان فيه ناس بتطبخ لنفسها سواء رجالة أو ستات -بقول ان اهم حاجة كمية الملح والدهون اللى فى الاكل ..انا ملحى يا دوبك يكسر الدلع ومش بحب السمنة بستعمل زيت عباد شمس وساعات نى فى نى كمان ..بفكر فى الحاجات الصحية اكتر ..انا معاكو ان الاكل اللى بسمنة طعمه وريحته جميلة جدا وتهبل بس لو اتطلبت فى شغل بعد اكلة دسمة مش حعرف اقوم من على الكنبة ..المهم اكلى مش سوتيه طبعا طبيخ عادى ..اللى عاوز يطبخ او يتعلم الطبيخ عشان يزغلل عنين بنت الحلا ل أدينى أهوه حتكلم وأقول برنامجى على البوست حلة وانا فيها ..نبتدى بحلة النهارده اللى لسه متشطب عليها من شوية : بطاطس مطبوخة ورز مسلوق
كام بطاطساية تتقشر وتتقطع مش صوابع كلاكيع كده بأى شكل وحجمها متوسط عشان تستوى
نحمر بصلة فى شوية زيت عباد شمس بسيطة ومع البصلة توم متقطع -التوم والبصل محطوط دايما فى البامية والتورلى والفاصوليا الخضرا
نجهز الصلصة -اى حاجة بقى صلصة من السوبر ماركت أو طماطم مسلوقة ومضروبة فى الخلاط انا بحب صلصة ريجينا عاملة زى الطبيعية
نحطها على البصلة لما تصفر ونزود الميه او نحط الشوربة او نزود الميه ونحط ماجى -على حسب المزاج
لما تغلى نحط البطاطس المتقطعة ونسيبها لحد ما تستوى -تطرى يعنى مش تدوب
الرز بقى ..ده موضوع تانى ..مش بستعمل برستو ورز على البخار وبتاع ..لأ انا بنقع كوباية رز فى ميه شوية كده ساعة واللا حاجة عشان تنزل شوية كتير من النشا اللى فيها
المهم بجيب حلة متوسطة واحط فيها 2 كوباية ميه طالما انا ناقعة كوباية رزواحدة
بسيب الميه بس من غير زيت ولا سمنة -تغلى فبصفى الرز من الميه بتاعت النقع وبحطه فى الميه اللى بتغلى وعليه حبة ملح بسيطة -يعنى ميه مغلية ورز وشوية ملح
أول ما احط الرز فى الميه المغلية أوطى النار على طول على الدرجة الهادية جدا واسيبه يستوى براحته خالص
ممكن مثلا تعمل لنفسك فنجال قهوة وتشربه مع الجرنان لحد ما يستوى الرز والبطاطس

أى سلطة معاهم بقى وبالهنا

أى حد يحصله حاجة مليش دعوة ..انا بوصف ورزقى على الله

بس انا طبخت كده النهارده أول ما جيت من المستشفى
نلتقى فى السيشن الجاية ان شاء الله
مع تحيات برنامج
حلة وانا فيها
كاااااااااااااااات

بيقولوا والله أعلم

ان اللى يصوم يوم 27 رجب يتكتب له صيام 60 شهر
وان افضل الليالى ليالى العيد
وليلة نص شعبان
وليلة 27 رجب
مش حدعى على حد فى الليلة دى اصلى زهقت من الدعا على اللى قارص علييا
انا حدعى ربنا زى ما دعيت فى الحسين
انه يفرجها ويصلح الاحوال
ويطرح البركة فى المرتب ويوصل بس 500 جنيه بدل 208

اللهم امين

جملتين وبس

مكان مين ؟ ده المكان هنا هو الحلة وانا مغرفتها
------
جملة سمعتها من بتاعت الشاى فى الوزارة عند الماجستيرات والدكتورات وحبايبى الصغيرين الدبلونات
كنت متنكدة بس لما قالتها لزميلها جات علييا بالضحك

يا بخت اللى امه بتدعيله ومش يا بخت اللى امه بتديله
-------------
جملة مكتوبة على ضهر العربية اللى قودامى عمرى فى حياتى مسمعتها
مش عارفة ليه النهارده بسمع وبقرا حاجات عجيبة كده عمرى ما سمعتها أو قريتها
شفت النهارده كمان كمية ناس فى القصر والوزارة
لا كنت عايزة اشوفهم ولا اسلم عليهم
من امتى واحنا حبايب ؟

عزيزى الماجستير

حتمرد على الوضع الحالى
مش حسهر فى هواك ليالى
ولا يمكن افكر ارجعلك
وفى بعدك عمرى حيحلالى
واستنى الاحلام التانية
بالفرح الموعود جيالى
----------------------------

السيد الاستاذ ماجستير الجراحة العامة

تحية طبية وبعد

والله كان نفسى اكملك يا ضنايا بس انت عارف بقى الظروف والجوابات .حتتسخط وتبقى دبلون بس هو الدبلون وحش؟ ما هو فل فل واللا ها ..ها ؟ ياللا بقى انا حكمل خطوات دفنك الكريم شوية مشاوير كده بين القصر وبين الوزارة حتاخد وقت بس ياللا ..وحبايبى الحلوين اللى بيتفرجوا وبيدفعوا زى الحمير على حاجات ملهاش اى لازمة مسيرها تترمى جنب اخواتها وياكولها الفار اياه ..انا حطاكوا فى وش المدفع ..ياللا زوئوا على الداكتوراه المصرى براحتكم..بس ودين النبى اللى حيطلعلى فى التليفون انا حعرفوه شغله ..واللا اقولكوا ؟ اعتبرونى مش معاكم فى اللعبة وطنشونى خالص
انتوا من امتى بتهتموا بييا واللا انتوا صحاب بجد ..؟ ينعل يحرق
وفى الختام تقبل منى ايها الماجستير وافر التف

مقدمته لنيلتكم

طبيب مطحون مزنوق فى عنق الازازة

ريهام حسن

مش عارفة ايه النظام ؟

كل شوية ايميل يجيلى
انى كسبت فلوس فى لوتارى بالرغم انى مشتركتش فيها ولا عديت على السايت بتاعها
أو محامى يقوللى انه عاوز يبعتلى فلوس عيلة تبعه وماتت فى حادثة عربية
كلهم عاوزين البنك أكونت بتاعى
طب انا اصلا معنديش رصيد
حفتح حساب فى البنك على الهوا ؟
شوفولكوا حد تانى بقى
--------------------
الماجستير بتاعى جاله الوبا
وأصابه الداء
وعجز وحجر
وبقى جملى على رأى االعيال
حيتسخط خلاص
ان شاء الله يتحول بقدرة قادر
الى دبلومة
اللهم امين بحق الشهور المفترجة دى
-------------------
الدنيا لسه زحمة و حر
والعيال حيبتدوا ييجوا من المصيف بقى
عشان الشنط واللبس وحاجات كده
الصيف عدى بسرعة
بس الزحمة زيادة النهارده
عشان مولد السيدة زينب
----------------
كل سنة وانتوا طيبين
الخميس اللى جاى ليلة 27 رجب
صابح يوم الجمعه 27 رجب
الشهر جرى بسرعة جدا
ياللا اللى عاوز يلحق يصوم يوم واللا يطلع حاجة يلحق
-------------------
يا جماعة
اللهم احفظنا طبعا
بس برضة بقول
لازم كل واحدة بعد البريود ما تخلص
بعد 5 ايام واللا ان شاء الله بعد 15 يوم
لازم لازم تفحص صدرها
أبوس ايديكوا والنبى
واللى مش عارفة تفحص نفسها ازاى
تعمل سيرش
breast self examination
حيطلع لها معلومات كويسة

---------------------------
غريب قوى اعلان بيقولوا فيه
ايه؟ هو مش شغال النهارده واللا ايه؟
بيفطسنى من الضحك
ده اعلان دوا بيساعد فى اللامؤاخذة












--------------------

i wish

that the circles am in
slow down a bit
just a bit
swords made of fire
are passing through me
they dig inside of me
and i feel the burn
not getting enough of my body
the burn digs deep in my soul
down deep , the small things i have just let them pass
so that life continues
are all up in front of my face
i did wrong
i had to face the small things on daily basis
before they eat my soul
before they get teeth , sharp teeth
and eat with them my flesh
this burning is like hell
real hell
facing the small things all at the same time
it it hard
people reactions' towards what am in ?
true ones are telling me to hold on ,you are gonna make it reham
fake ones ..huh , wishing the best for me !
this am in , it seems it will last for long time
until i escape from all this shit am in
don't know why 2007 is like that
hard on me
mum tells me coz you are good
god is showing you the reality
yes
i have known all my fault and have seen the reality
had thought that this life am in right now can hold excellent memories
to help me feed on them on emotionless coming days
this is a wrong thought , may be on some other place
i will find love ,shelter ,friends
may be i will find home
i guess i know where is my true home
where i need to be
i won't say where it is coz i do not want to be pessimistic
the coming days want me to be more optimistic
this is just a bad time that will pass
i just want to take some time out to look at these situations carefully
to analyze them well
to know the lesson from them
am learning the lesson the hard way guys

غمضت عينايا

شوية صغيرة مش كتير
فضلت أقللب فى الذاكرة
بدور عن نقطة نور
ابتسامة حلوة
ضحكة صافية
نظرة مطمنة
بارفا ريحته حلوة
شكل فاكهة بحبها
اللمة والضحك فى ايام الروقان
افتكر نفسى وانا بعوم فى البحر
افتكر وانا بغطس بين الصخور
افتكر هدوء الميه
وشكل ممكلة الكائنات اللى تحت الميه
الهدوء والسكينة بتاعة اى مكان حسيت فيه بالراحة
درجات لون الازرق تحت البحر
ألوان السمك الهادية
اشكال هندسية من تصميم ايطالى او فرنساوى
شكل فستان الفرح اللى اتصورنا جنبه فى وسط البلد
ريحة هوا نضيف
هوا يملى الرئة من جوه ويهدى الاعصاب
كتاب قريته وأثر فييا
صحاب زمان قبل ما يتغيروا
مشفتش حاجة فى الثوانى دى بتاعت التدوير فى الذاكرة
اللا اللون الاحمر
لون قطيفة مغطية سلالم طالعة لفوق
واللون الازرق اللى شفته ايام الغطس
لونين بس
وبعدين فتحت عينايا

puzzle .telephone.medicine

دايما كانت هديتى عدة دكتور..ايوه كنت بلعب بمسدسات وعربيات اخواتى والجيران بس كان حبى الكبير للتليفون الاحمر اللعبة البلاستيك..بحب التليفون قوى ومع التليفون فى الحب ..لأ بيفوقه فى الحب..حبى للبازل ..يمكن ده يفسر حبى للسى اس اى وكمان حبى الشديد للطوارئ..معرفش ايه اللى خلانى احب التخصص ده قوى ..فرست لاين دكتور..دكتور اون كول ..دكتور على عربية الاسعاف..زيارات منزلية..عيانين رعاية ..عيانين بوست اوبراتيف..كارديك أرست ..اكيد عشان البحث فيهم ..البازل كده.. بتكون الصورة بتاعت البازل بالتسلسل المنطقى لتكوين الصورة وحتة قبل حتة مع استمرار فى البحث والمحاولة..حل حالات الطوارئ كده ..بحب العيان اللى حالته خطيرة فى حادثة أو اللى تعبان قوى وبحب اتحرك وادعبس بسرعة عشان احل مشكلته واظبطه ..احساس بالسعادة الشديدة والانتصار لما يفتح عينيه ولما يتكلم كلام منطقى له معنى ..ساعات من كترة الصور اللى بكملها فى البازل الطبى بزهق أو بحس انى خالاص عرفت كل الفاريتيز..يقوم ربنا باعتلى حالة أفضل ألف حواليها زى القطة اللى فى ديلها ورقة وابص فى العيان واحط ايدى هنا وصباعى هنا وافتح عينه واشم بقه-مؤرفة دى وساعات بدوخ من الريحة-واحط قسطرة واسحب دم واحط ابرة هنا -فى صدره مثلا-وكانيولا هنا واسحب معامل كاملة وغازات بالدم واشعات و اجيب ابرة تانى واسحب من بطنه يمكن يطلع دم -طريقة بلدى تحمل خطورة-الله يحرقهم لا حد علمنى بد سايد سونار ولا حتى ازاى افتح صدر العيان -لازم اطلب جراحة القلب والصدر واخود رأيهم -ما علينا-كل لما اشوفهم بيفتحوا صدر العيان عادى فى -ايه ار-وبيعملوا شقلاباظات عشان ينقذوا العيان بحس انى لسه حمارصغير وقصادى سنين ضوئية عشان اوصل لمستواهم -مش قوى كده هى ديتها اجمد قلبى واتعلم الاول على عروسة وبعدين اتفرج عن قرب وبعدين اجرب بايدى بقى -نفس الخطوات اللى اتعلمت بيها الطوارئ ..كانت على ماكيتات عروسة ..وخياطة الجراحة مش كانت ورشة عمل على مصارين ارنب واللا فرخة ؟ والله مانا فاكرة ...التليفون بستعمله كتير فى الشيفت بتكلم فيه عشان اعمل ريبورت عن الحالة الى حد متخصص اكتر منى ودايما بيطلعوا بتوع القلب والصدر او السونار..يعنى الحاجات اللى محدش عملنا فيها ترينينج
انا محتاجة بد سايد سونار على الاقل للبطن وشوية حاجات فى النسا وكمان ازاى افتح صدر العيان بالمباعد والمنشار الطبى وكمان الفايبرو اوبتيك ..المنظار يعنى بتاع الشعب الهوائية ...يعنى اللى ناقصنى السونار والقلب والصدر ..نفسى حد يكلمنى فى التليفون يقوللى ليكى دورة تدريبية فى دول

شهر تمانية

يا رب تبقى ضيف خفيف
وتعدى بهدوء وبدون اى وجع قلب او وجع دماغ
ومتبقاش الشمس فيك شديدة
واسمع فيك اخبار حلوة
واعمل فيك خطوة لقودام
وأعدى الامتحان بهدوء وانجح
يا رب تعدى كده زى النسمة

أغنية

كلمنى فهمنى
على قلبى طمنى
علمنى معنى الحب ده انا اول مرة احب
دوبنى شوق القلب والبعد جننى
------------------------------
كلام جميل وعزف اجمل
-------------------------------
بقالى كتير مسمعتش كلام اغانى جميل وعزف ماشى مع الكلام
-----------------
انا كلى ليك بنده عليك
يا ساقينى بنار هواك
ما باشوفش نوم..يا تجينى يوم
يا تسبنى اكون معاك
على ايه عذاب
بعد وغياب
بالراحة...جننى
-----------------
كلام حلو بيضحك كمان

اول مرة اسمع احمد سعد من كام سنة كده عمل اغنية واحدة ضربت جامد عندنا فى السكن على ما اظن واللا ضربت فى النادى واللا الكافيتريا مش فاكرة بس هو السنة دى نازل بتقله كفاية اغنية الفيلم بتاع احمد عز ..بقية شريطه لطيف بس عجبتنى اغنية علمنى وكفاية كده..من فترة مسمعتش عربى وعجبتنى الكلمات ..بس هما ليه بيركزوا فى الصيف ؟ انا اجازاتى متقطعة على طول السنة بحكم شغلى مش على طول اجازة طويلة ..بس السنة دى انا اتنحست واللا اتحسدت..من شهر اتنين اللى فات وانا مليش حاجات جديدة فى حياتى اللا الطبيخ ..والله فكرت فى كلام شريف لما كان عاوز يعمل محل كشرى -جراح عظام-وفضلت ابص للكلام اللى بيتقال قصادى فى قسم العظام وطوارئ العظام وانا على الكرسى المفطوس اياه اللى فى كشك العظام عن فكرة الاستثمار فى محل كشرى واستغربت من انا الدكتور ممكن يبقى شيف او صاحب محل كشرى ..بس مع الخسارات المتتالية من شهر اكتوبر اللى فات حتى الان وانا شغلتى الطبيخ مش عارفة بقى عشان جوز المستقبل واللا عشان اشتغل فى ماك واللا مجرد تنفيس عن اللى جوايا ..مش عاوزة اقول الخسارات ايه عشان انا ابتديت اشوف بعد 10 اشهر اهوه الوجه الايجابى للى انا فيه ..تغييرات فى مجرى حياتى واتجاهى بتحصل ..بس اللى خاضضنى انها بتحصل بسرعة جدا على جميع المستويات ..على مستوى العيلة والجيران والشغل وزمايلى وصحابى اللى كنت فاكراهم قريبين منى وعلى مستوى العربية ومستوى الدراسة والماجستير الله يحرقه ومستوى الدراسة الميدانية والبحث والبريزنتيشان ...بالرغم من انى عملت بريزنتيشان عن كيفية تطويع العاملين لتقبل التغيير فى مكان العمل وكيفية مواجهة السترس الناتج عن كده ..اخدت عليه امتياز والعيال سأفولى وبتاع ..بس على ارض الواقع الواحد بيتعب مع التغيرات الجذرية فعلا خصوصا اللى بتييجى بدون مقدمات ..عشان كده لما حعمل اى تغيير فى الطوارئ بعد كده حبقى اعمله بالراحة وبشويش وبالتدريج..يتهيألى كده العاملين مش حيتعبوا وحيحسوا بالأمان

-------------------------
دعاء فى الاخر
يا رب والنبى فى يوم اخود الدكتوراه
والنبى يا رب مسمعش اخبار فى الدراسات العليا تخلينى اطلع من هدومى
يا رب ميزودوا فلوس الدراسات العليا اكتر من كده
لحسن انا مش عارفة حعمل ايه ساعتها
يا رب والنبى الدكتوراه فى اى حاجة واى تخصص ينفع ألاقى بيه شغل فى مكان عدل يشرح القلب
او تصلح الاحوال العقيمة اللى احنا فيها
اصلها مش حتتحل الا بايدك انت
والنبى يا رب على فبراير اللى جاى تكون حصلتلى حاجات حلوة
اى حاجات حلوة ..اى اخبار عدلة